XUV 700 vs Safari Hindi महिंद्रा एक्सयूवी v टाटा सफारी

xuv 700 vs safari hindi review on road price mumbai pune

Vande Mataram doston! Chaliye aaj dekhte hain do shuddh-desi-SUVs ki tulana. Ratan Tata ji ki Safari, aur Anand Mahindra ji ki XUV seven-double-oh. Ek ne khud-se engine banaane ka faisla kiya hain, doosre ne FIAT se khareeda. Ek ne Land Rover ki chassis isteemaal ki hain, doosre ne in-house vikasit hki hain. Ek gaadi mein sirf logo Pratap Bose ne design kiya hua doosri mein logo-ke-siwai sab-kuch Pratap Bose ne design kiya hain! Aisi dher-saari dilchasp baton pe aaj hum gaur karenge aur unka nateeja kya hua hain, ye aap ko dikhaynge. Toh chaliye, shuru karte hain, CarComparos ke andaaz mein XUV-versus-Safari. Iss video ke shuruwaat mein hum aap ko XUV ki kuch aisi khoobiyaan dikhayenge, jo Safari mein maujood nahin hain, magar isi video ke aakhri hisse mein, hum aap ko Safari ki aisi-kuch khoobiyaan dikhayenge, jinka mukaabla XUV nahin kar paati.

Shuruwaat karte hain, XUV ki pehli khoobi-se jo hain Pick-up aur Smoothness:
Agar Tata apna khud-ka, Safari-Storme-Hexa-Aria-wala, two-point-two liter diesel-engine, B.S.six-ke-liye, AVL-ke-saath, vikasit karta, toh kya hota, iska uchit udaharan hain, XUV ka engine! Power FIAT ke multijet-engine-se pandrah h.p. behtar hain aur torque toh multijet-se sau-Nm-tak behtar hain! Itna hi nahin, smoothness mein bhi, XUV ka engine, multijet-se halka-sa behtar hain! Mana ke Mahindra ke engine ka wajan, multijet-engine-se thoda-sa bhaari hain, lekin plastic-tailgate jaisi tarkeebein lada-kar, Mahindra-ne XUV ka wajan Safari se lagbhag ded-sau-kilo halka rakha hain, aur Harrier-se bees-kilo halka! Kul milakar, XUV ka pick-up Safari se thoda-sa-tez-hain, lekin isse bhi jyada mahatwapoorn baat ye hain, ke Mahindra apne gaadi ki keemat Safari se dhai-laakh rupay sasti rakh paaya hain. Isliye,Tata ko jald-se-jald, Harrier aur Safari mein, apna two-point-two-liter lana chahiye, phir chahe wah paryaay ke taur-pe kyon na ho, jaise Vista mein hota tha. Grahakon ko jo paryaay acha lage wah chun sakte the. Agar Safari mein Tata-engine ka paryaay aata hain, toh uski keemat seedhi ded-laakh rupay sasti ho jayegi, iss baat mein koi sandeh nahin. Aur yahan par baat khatam nahin hoti, kyonki XUV mein, samaan-keemat-ki Safari se, poore-pacchis-features jyada milte hain! Yakeen-nahin-aata? Chaliye hum aap ko dikhaate hain...

Value-for-Money:
Safari ki keemat shuru hoti hain athara laakh rupay se on road dilli, jismein aap ko kewal XE-variant mil sakta hain. Theek usi keemat mein aap ko XUV ka seven-seater, AX3-model milta hain. Ab in dono ki Infotainment System mein toh zameen-aasmaan ka fark hain! XUV mein aap ko das-inch touch-screen waali atyadhunik System milti hain, jismein wireless-Android Auto aur Apple Carplay milta hain aur oopar-se Amazon Alexa integration bhi, lekin Safari XE mein touch-creen toh door-ki-baat hain, balki FM-radio bhi nahin milta! Itna hi nahin, XUV-ka speedo-console bhi ten-inch-colour-tft hain, jabki Safari ka teen-inch-monochrome! Iske alava XUV AX3-mein Rear-Wash-Wipe-Defogger, Driver’s Seat Height Adjustment, Front Fog Lamps aur ISOFIX-points bhi milte hain, jo chaaro-features, Safari XE mein nahin milte. Hadd toh ye hain, ke Safari XE mein chaabi-wala-central Locking milta hain, kam se kam XUV-AX3-jaisa, Remote-waala Central Locking toh de-dete! Itna hi nahin, Safari XE mein bulb-waale DRL milte hain, jo wakai-mein bahutahi-bekaar-dikte hain. XUV-AX3 mein LED-DRL milte hain aur Indicator bhi LED hain, Safari XE jaisa bulb nahin. Ek-aur chota-sa-fark ye hain, ke XUV ki sab-se pichli seats mein recline-adjustment maujood hain, jo Safari ki third-row mein uplabdh nahin! Ek-aur mazedaar-purja jo khaas, Anand Mahindra-ji-ke kehne-pe XUV mein laga hain, wo hain uske Tesla-jaise ‘flush’ door-handles, jo AX3 mein bhi maujood hain, bass mechanical-system waale, top-end model ki motorized-system waale nahin. Kul milakar, Safari XE mein sab-se badi dikkat ye ayegi, ke aap ne WagonR-VXi waale dost ko gaadi mein bithaya, toh wah aap ko das baar sunayega, ke jo features uski gaadi mein maujood hain wo-bhi aap ki athara-laakh-rupay ki gaadi se gayab hain!

3. Pakad aur Suspension-Comfort:
Waise-toh Safari aur XUV dono apne Bharatiya Engineers ne, Bharatiya-sadkon-ki halat ke anusaar suspension-ko lajawaab-tune kiya hain. Dono gaaadiyaan, tooti-phooti-sadkon-ko lajawaab roop se sok leti hain. Nexon-aur-XUV-three-double-oh ki tulana mein, Tata-ka-suspension, XUV-se saaf-saaf behtar saabit hua tha. Lekin abki-baar, Mahindra-ne aakhir, Tata Motors se-bhi behtar-suspension bana-ke dikha diya! Aur iske-liye Mahindra-ne do-bemisaal purjon ka istemaal kiya hain. Pehla hain Mahindra-ka ‘Fully-Independent’ Rear Suspension, jabki Safari-mein sirf semi-independent Rear-suspension maujood hain. Darasal, jis-platform-par Tata ne Safari banayi hain wo hain Land-Rover-ki Discovery Sport ka platform. Lekin Discovery Sport-mein toh fully-independent, multi-link rear-suspension maujood hain, jaisa Mahindra-ne XUV-mein diya-hua hain. Lekin Tata-ne, paise-bachaane-ke-chakkar-mein. Safari-ko jugaad-waala, Twist-blade with panhard-rod system daal-diya-hain. Lekin yahan par baat khatam nahin hoti, kyonki Mahindra-ne, XUV-ko lajawaab FSD-dampers bhi diye hain - yane ke Frequency Selective Dampers, aur wo bhi ‘Koni’ naamak, mashoor suspension utpadak se le-kar uske saath vikasit kiye hue. Jeep Compass mein bhi yahi dampers maujood hain, lekin wo bhi XUV-se ek-generation-puraane! Ab iss-sab-ka nateeja-ye, ke modhon-par, XUV, Safari-se thodi-si behtar pakad aur niyantran banaye rakhti hain. Mana ke Safari ka hydraulic-steering, XUV ke electronic steering se behtar feel aur feedback deta hain, lekin XUV jyada chusti-phoorti-se dishabadal karti hain, iss baat mein koi sandeh nahin. Itna hi nahin, XUV gaddhon-ko aur speed-breakers ko bhi Safari se behtar sokh leti hain. Khaas kar pichli seats par baithe yaatriyon ko Safari mein XUV-se jyada jhatke mehsoos hote hain, lekin fark sirf unnis-bees ka hain, kyonki Safari ka suspension-comfort khud iss shreni ki adhiktar gaadiyon-se behtar hain. Toh doston yahan par, bass itna yaad rakhna, ke Land Rover ki chassis lene se apne-aap saare dynamics sudhar nahin jaate, ek shuddh-desi chassis bhi usse behtar ride-aur-handling de-sakti hain. Lekin yahan par bhi baat khatam nahin hoti, kyonki Mahindra ek-aur aisa system XUV mein le-aaya hain, jo Tata nahin laa paaya, chaliye dekhte hain wo kya hain.. 

4. All-wheel-drive:
Tata ko yakeen tha ke wah mahine mein sau all-wheel-drive Safari-bhi nahin bech payega, isliye Tata-ne Safari-mein koi all-wheel-drive system vikasit nahin kiya hain. Vaastav mein iss shreni-ke paanch-pratishat grahak bhi all-wheel-drive model nahin khareedte. Aakhir ye badi-badi SUV khareedne-waale, adhiktar grahak unhe shehri sadkon par chalaate hain. Toh four-wheel-drive-ke-liye do-laakh rupay jyada grahak nahin dena chahte. Iss hisaab se Tata ka kehna galat nahi hain. Har mahine, do-hazaar Safari bhi nahin bikti, toh uske paanch pratishat, matlab sau-se-jyada, four-wheel-drive Safariyaan bechna namumkin hain. Lekin Mahindra toh har-mahine teen-hazaar se jyada, Thar bech raha hain, jo saari-ki-saari all-wheel-drive hain! Isliye, Mahindra ko XUV ke all-wheel-drive models ki khapat achi-hogi aisa lagta hain. Mana ke XUV ka all-wheel-drive system, Thar-jitna upyukt nahin hain. Kyonki na usmein low-ratio-gearbox maujood hain aur na koi locking differential. Lekin jab, keechad ya ret-mein front-wheel-drive-waali ye nayi-Safari phas-jayegi, wahan par all-wheel-drive-waali XUV asaani-se nikal jayegi. Aur wahan par aap ko Safari ka terrain-response system kuch-bhi kaam nahin ayega. Chahe aap Safari-ka terrain-response-knob sau-baar bhi kyon-na ghooma-lo, uski off-roading kshamata, all-wheel-drive XUV jitni achi kabhi nahin honewaali, ye baat hamesha yaad rakhna doston. All-wheel-drive-ke-alava-bhi Mahindra ne ek aur aisi cheez XUV mein di hui hain, jo abhi tak Tata nahin de paaya hain, chaliye dekhte hain kaunsi...

5. XUV 700 Petrol:
Filhaal Tata Motors apni Safari mein petrol-engine bhi nahin de-paaya hain. Ab yahan par bhi wohi dikkat hain. Filhaal iss shreni mein sirf-do-teen pratishat grahak petrol SUVs khareedte hain. Lekin, Creta aur Seltos jaise halki, chote-engine-waali SUVs ke petrol-models ki khapat dekh kar Mahindra ko lagta hain ke petrol-XUV ko bhi theek-thaak maang mil jayegi. Mana ke kuch grahak aise bhi hain, jinka running bahutahi kam rehta hain, sirf do-teen-hazaar kilometer har-saal. Unke liye Safari aur diesel-XUV-se behtar pick-up, behtar smoothness aur sasti keemat wala paryaay Mahindra ne banaya hain. Aur pick-up toh wakai-mein lajawaab hain. Lagbhag nau second mein petrol-XUV sau-ki-raftaar haasil kar paati hain. Lekin ek baat ka dhyaan rakhna doston, XUV-petrol, galati-se-bhi, manual-gear-waali mat-lena. Kyonki iska turbo-petrol-engine, do-hazaar r.p.m. ke neeche behat kamjor pick-up deta hain. Do-hazaar r.p.m. ke oopar jaane ke baad ye engine apna turbocharger ghoomaana shuru karta hain, jiske baad saara pick-up milta hain. Lekin automatic-model mein isse koi dikkat nahin hoti, kyonki uska TCU - yane ke transmission control unit, apne-aap engine ka r.p.m. adjust karke aap ko lajawaab pick-up deta hain. Aur ye petrol-automatic model athara-laakh rupay ki keemat se uplabdh hain, on road dilli! Rahi baat mileage ki, toh aap ko dainandin istemaal mein, saat k.p.l. ka mileage milega, jabki diesel ka araam-se bara k.p.l. mil jayega. Toh mahine ka paanch-sau-kilometre se jyada running hoga, toh petrol-model ke baare mein sochna bhi mat doston.. 

Mid-ro: Doston XUV ki khoobiyaan toh aap ne dekh li. Lekin kya Safari mein bhi aisi koi khoobi maujood hain, jo XUV mein nahin milti? Chaliye dekhte hain…

1. Andruni-Jagah aur Comfort:
Doston, seating ke maamle mein, Mahindra ne aadha-adhoora kaam kar rakha hain, iss baat mein koi doraay nahin. Pehli baat toh Mahindra ne filhaal XUV mein Captain seats ka paryaay bhi nahin diya hain. Mahindra ka aisa daawa hain ke wah captain seats pe kaam kar rahe hain, lekin abhi-se XUV ki middle-row-head-room aur third-row-knee-room itni kharaab hain, ke bade-aakar-ki captain seats XUV mein bithaana namumkin hain. Doosri-aur, Safari ki captain seats jo side-bolstering deti hain, wah modhon par wakai mein bahut araamdayak saabit hota hain, kyonki wah yaatriyon ko apni jagah par banaye rakhti hain. Under-thigh-support bhi bench-seats se behtar hain, kyonki captain seats ka seat-base bench-seats se thooda oopar sthit hain. Iske alava Mahindra ne ek aur bahut badi galati ki hain, ke middle-row-bench-seat ko, sliding adjustment ki suvidha nahin di hain. Yahi galati Tata ne Harrier mein ki thi, lekin Safari mein unhone yaad-se middle-seat ko, aage-peeche slide adjustment ki suvidha di-hain, chahe bench-seat ho ya captain seats. Khaas kar XUV aur Safari jaisi seven-seater gaadiyon mein, sab-se-pichli-seats-ko, Innova-Crysta jitni leg-rrom-aur-knee-room uplabdh nahin hain. Isliye inmein middle-row sliding hona bahutahi jyada jaroori hota hain. Third row mein bithaye gaye yaatriyon-ko ek-do-inch bhi jyada knee-room mil gayi, toh unki discomfort kaafi hadd-tak kam ho jaati hain. Toh doston Mahindra jald hi sliding ki suvidha aur captain seats XUV mein le ayega iss baat ka humein poora yakeen hain. Isliye jaldbaazi jaa kar XUV-book karne ki koi jaroorat nahin. Waise bhi Mahindra ki saari nayi gaadiyon mein, launch-ke-baad che-aath mahine tak dher-saare bigaad paaye jaate hain, ye hum-sab ne KUV aur TUV mein dekha hua hain. Toh bhale-hi che mahine baad Mahindra apni XUV ki keemat pachaas hazaar-se badhayega ye hum jaanate hain, lekin kam-se-kam gaadi ke aadhe-adhik bigaad bhi sudhaar lega aur do-teen jaroori features bhi le ayega, ye baat hamesha yaad rakhna doston.

Safety Features:
Doston pichle do-teen saalon se Tata Motors ne apne gaadiyon ki safety pe jo khaas dhyaan dena shuru kiya hain, uski wakai mein daad deni padegi. Safari aur XUV ki tulana mein bhi ye baat saaf-saaf dikhai deti hain. Safari ke base-model se aap ko ESP-Traction Control System aur Hill Hold jaise anivarya Safety features milte hain. ESP system, modh-lete-waqt, aur pick-up lete samay aap ki gaadi ke payyon ko phisalne se bachaati hain. Wohin Hill-hold system, under-ground parking-ya-flyover jaisi, teevr-dhalaang pe aap ki gaadi ko peeche khisakne-se bachaati hain. Ye dono features aap ko XUV ke MX-model aur AX3 model-mein nahin milte, uske liye aap ko kam-se-kam AX5 model khareedna padta hain. Itna hi nahin, XUV ne Rear Parking Sensors mein bhi gajab kanjoosi ki hui hain. Chaar-sensor ke bajay XUV mein kewal do-sensors maujood hain! Safety features ke alava, XUV ke AX3 model mei do-aur aise features aap ko nahin milte, jo base Safari mein bhi mil jaate hain - wo hain Telescopic steering adjustment aur Projector Headlamp.