Tata Tigor EV 0-100 Top Speed VBOX Pros & Cons Hindi Review

Tigor EV 0-100 Top Speed Range Subsidy

Aaj hum aap ke liye le kar aaye hain, nayi Tata Tigor EV ke performance ka, sab-se jyada vistrit vishleshan. Iss video mein, hum aap ko Tigor EV ka, zero-to-hundred k.p.h. acceleration toh dikhaane hi waale hain, lekin uske saath, uski Top-speed kitni hain aur uski ‘driveability’ kaisi hain - yane ke uski overtake karne ki kshamata kaisi hain iska gehra vishleshan dikhayenge. Kyonki dainandin yatayaat mein, zero-to-hundred acceleration, ya top-speed se bhi ‘drivability’ jyada jaroori hoti hain, jiske baare mein hum aage baat karenge. Aur isi video ke aakhir mein, hum aap ko Tigor EV ki kuch aisi khhobiyaan aur khaamiyaan batayenge, jo aap ko baaki kisi bhi YouTube video review mein dekhne ko nahin milne waali. Lekin wo sab baad mein. Shuruwaat karte hain zero to hundred kph pick-up-se...

Speedo Error:

Doston aaj hum iss testing ke liye ek atyaadhunik Satellite Equipment ka istemaal karenge, baaki Youtube videos ki tarah sirf stop-watch ka nahin. Kyonki market ki adhiktar gaadiyaan speedometer pe thodi-bahut jyada hi raftaar dikhaati hain. Ye dekhiye, jab Tigor EV apne speedometer pe, sau-ki-raftaar dikhaati hain, tab asal mein wah sirf nabbe k.p.h. pe hoti hain. Isliye sirf Speedometer ka video-shooting dikhaane waale saare-Youtubers aap ko galat timing dikha rahe hain, ye baat hamesha yaad rakhna doston. Lekin aisa mat sochiye ke sirf Tigor EV mein Speedo Error maujood hain. Darasal market ki saari gaadiyon mein thodi-bahut speedo error hoti hain. Itna hi nahin, balki Bharat sarkar ke niyamon ke anusaar, speedometer pe, true-speed se das-pratishat jyada raftaar dikhaane ki anumati bhi hain, bass true-speed se kam raftaar speedo pe nahin honi chahiye. Aaj ke badhte hue speed-limits aur speeding camera ke daur mein, iss speedo error ka, ek chota-sa faayda bhi hone laga hain, ke galati se aap speedometer pe, speed-limit-se, do-chaar k.p.h. tez bhi chale gaye, toh aap ko speed camera pakdega nahin!

Pick-up aur Top-speed:

Humaari testing ke dauraan, hum ne Tigor EV ko uske dono drive modes mein alag se time kiya. Tigor EV ke ‘S’ mode - yane ke Sports-mode mein usko zero-to-sixty k.p.h-ki raftaar haasil karne ke liye, six-point-four seconds lage aur zero-to-hundred ke liye fourteen-point-one seconds lage, jo Petrol-Tigor se lagbhag ded-second behtar hain. Wohin ‘D’ mode - yane ke ‘Drive’ mode mein Tigor EV ka zero-to-sixty timing tha ten-point-nine seconds, aur zero-to-hundred time tha twenty-eight seconds. Rahi baat top-speed ki, toh humari testing ke dauraan, Tigor EV, one-hundred-and seventeen k.p.h. ka, ‘true’-top-speed haasil kar paayi. Aur tab speedometer pe uski raftaar thi one-twenty-two-k.p.h. Iski tulana mein petrol-Tigor ka top-speed chaalis k.p.h. Behtar hain. Lekin dosto, Tigor EV ki asli taaqat hain uska ‘roll-on’ acceleration. Aap ko jab highway par kisi truck ya bus ko overtake karne ke liye turant pick-up ki jaroorat padti hain, tab aap ko ache ‘driveability’ ki jaroorat hoti hain, jismein Tigor EV bilkul lajawaab hain...

40-100:

Highway par kai baar aisa hota hain ke teeno lanes mein truck, apni-apni speed se ek-doosre ko overtake karne mein lage hote hain. Tab aap ko apni raftaar chaalis-k.p.h. tak ghataani padti hain aur jab ek-lane khaali ho jaaye, tab aap ko jald-se-jald sau k.p.h. tak pick-up lena padta hain. Aisi paristhiti mein, Tigor EV ko, sports-mode mein, forty-to-hundred ke liye sirf 10-second ka time lagta hain. Yahi jab aap petrol-Tigor se tulana karte ho, toh pata chalta hain, EV ka sab-se bada faayda. Kyonki, petrol-Tigor ko, fifth-gear-mein, forty-to-hundred ke liye poore tees second lagte hain - yane ke Tigor EV se bees second jyada. Itna hi nahin, fourth gear mein bhi usko zero-to-forty ke liye, twenty-two-seconds lagte hain. Aur-toh-aur, third gear mein bhi Tigor-petrol pandrah second se pehle zero-to-forty nahin kar paati. Yahi hain electric gaadiyon ki sabse-badi khoobi, aur dukh ki baat ye hain, ke saare adhoora gyaan pelne waale YouTubers Tigor EV ki ye khoobi kabhi nahin bataane waale, kyonki unko khud iss khoobi ka koi andaaza bhi nahin hain! Wo toh apna saara waqt video camera chalane mein bitaate hain, gaadi chalaane mein nahin! Khair, ab iske alava Tigor EV ki kya khoobiyaan hain, ye dekhte hain.

Khoobiyaan:

Doston, ‘tractability’ ke alava, Tigor EV ki sab-se badi khoobi jo aap ko mehsoos hogi wo hain uski bemisaal smoothness. Na koi engine ki awaaz na vibration, na transmission-whine, honda ke ‘makkhan-jaise-smooth’-kehlaane-waale iVTEC engines bhi Tigor EV ki tulana mein khurdare-se lagte hain! Oopar se Tata Motors ne road-noise, tyre-noise aur wind-noise ko bhi ache-se kaaboo mein rakha hain. Khaas kar EV mein ye jyada jaroori hota hain, kyonki engine ke awaaz na hone ke kaaran, yaatriyon ko baaki saari awaazein jyada sunai deti hain. Doosri khoobi hain Tigor EV ki pakad aus suspension comfort. Hamesha ki tarah Tata Motors ke Bharatiya engineers ne Bharatiya sadkon ki sachhai samajh kar, Tigor EV ka suspension bilkul uchit tune-kiya hain. Gaddhon aur speed breakers ko wah lajawaab roop se sokh leti hain aur tez raftaar pe bhi badhiya sunatulan banye rakhti hain. Mana ke petrol-Tigor ki tulana mein suspension thoda sakhth hain, kyonki Tigor EV ka wajan petrol-model se do-sau kilo bhaari hain, lekin phir bhi Dzire jaise pratispardhiyon se kai guna behtar hain. Tigor EV ki aakhri aur sab-se badi khoobi hain uski kamaal-ki ‘value-for-money’. Petrol-Tigor ke mukaable, saat-aath-saal mein, pichattar hazaar kilometre ke running pe, wah aap ka kam-se-kam, paanch-laakh rupay ka indhan-ka kharcha bachayegi. Oopar se Kendra-sarkaar ki subsidy, rajya sarkaar ki subsidy aur tax-exemption mila ke aap ki teen-laakh rupay bachat ho sakti hain. Aur kya pata saat saal baad aap ko koi inverter banaane waali company uski lithium-ion battery aap ke ghar mein bitha ke paanch AC chalane ke kaabil U.P.S. system bana ke degi.

Khaamiyaan:

Doston Tigor EV ki khoobiyaan kya hain ye toh aap ne ab tak dekh liya, lekin aap ko toh pata hain ke har gaadi mein khaamiyaan bhi hoti hain, aur unko aap ke saamne le aana humara farz hain. Humaari raay mein, Tata Motors ko jald se jald unki EVs mein Traction Control aur Hill Hold ye do mahatvapurn features dene chahiye. Passive-safety mein Tigor aur Nexon, Global NCAP test mein badhiya saabit kar chuki hain, lekin Active-safety mein bhi sudhaarna jaroori hain. Aaj aath laakh rupay mein on-road milne waali Swift AMT mein ye dono features uplabdh hain. Nausikhiye chalakon ke liye hill-hold feature hona behat jaroori hota hain, warna flyover ya underground parking pe pick-up lete waqt, peeche khadi gaadi se takra sakti hain. Itna hi nahin, electric motor apna peak torque zero-r.p.m. se deti hain, iss wajah se Tigor aur Nexon slow-speed pe, full-throttle dene par wheel-spin karti hain. E.S.P system iss samasya ko poori tarah se mita degi. Rahi baat ‘range’ ki, toh Tigor EV ki ARAI pramaanit range hain teen-sau-che kilometer. Dainandin istemaal mein aap ko dhai-sau kilometre tak range milegi. Matlab one-stop Pune-se-Goa trip karna mumkin hain, kyonki fast-charger se Tigor EV ko full-charge karne mein sirf ek-ghanta lagta hain. Filhaal fast chargers asaani se uplabdh nahin hain, hum khud Tigor EV ko charge karne ke liye Tata ki Navi-Mumbai showroom gaye the, lekin wahan par sirf ek socket tha, jismein pehle se Nexon EV charge ho rahi thi, isliye humein kaafi waqt wahan par rukna pada. Ek aakhri pehelu jiske baare mein aap ko jaankaari dena jaroori hain, wo hain Tigor EV ki boot-space, jo petrol-tigor se kaafi choti hain, kyonki spare-wheel ki jagah battery ne le-li hain aur iss wajah se spare wheel boot-mein rakhna pada hain. Phir bhi aap ko Swift-ya-Tiago jaisi hatchbacks se jyada hi bootspace milti hain, ye baat yaad rakhna dosto.