GLA vs X1 2021 Hindi मर्सिडीज बेंज GLA v बी एम् डब्लू X1 तुलना हिंदी

GLA vs X1 2021 Hindi मर्सिडीज बेंज GLA v BMW X1 SUV Comparison Review
Introduction:

Doston, swaagat hai aapka carcomparos ke ek aur video me. Kyuki SUVs ki dhoom machi hui hai toh hum bhi SUVs ko he compare kiye jaare hai. Aur zaahir hai ki SUVs as a segment ek swiss knife ka kaam krti hai. Jack of all trades type. Space, power, performance aur road presence sab saath me. Aaj hum compare krne waale hai BMW X1 ko Mercedes GLA se. Dono he gaadiyan luxury brand ke entry level SUVs me aata hai. Hum shuruaat krenge pricing se , dekhnge konsi mehnagi hai aur konsi sasti, fir nazar daalenge features par, dekhnge ki konsi gaadi zyaada feature loaded hai, uske baad hum tulna karenge performance aur ride quality ki, dono gaadi ke exterior looks. Fir aaegi baari, Aur ant me safety ki. Toh bina kisi deri ke shuru krte hai aaj ka comparison.

Qeemat:

Shuruaat krte hai, qeemat se, jo ki sabse important factor hai. Dosto Mercedes Benz GLA ka base model ‘200’ on-road aapko padti hai rs 50 lakh ki, aur BMW X1 ka base model sportx ki on-road qeemat hai Rs 44 lakh jo ki Mercedes Benz GLA ke base model 200 se 6 lakh rupee sasti hai. Dono base models petrol engine aur DCT transmission ke sath aate hai. Aur ye dono gaadiyan front wheel driven cars hai. GLA ka top model 220d ki qeemat hai Rs 53 lakh rupee, jabki X1 ke top model xline diesel ki qeemat hai Rs 50 lakh. Mercedes Benz GLA ka top model, 220d 4Matic Rs 55 lakh ka hai jo diesel engine aur DCT configuration ke sath milta hai jo ki 4 wheel driven bhi hai, aur ye GLA ke 200d variant se 3 lakh rupee mehangi hai. BMW x1 ke Xline petrol variant ki qeemat hai Rs 47 lakh. Dono fuel ke daam me aaj ke waqt zyada antar nahi hai. Dekha jaye toh Mercedes ki GLA zyada mehangi hai X1 se. Ab kya wajah is price difference ki aur kitna ye difference justified hai, isqa pata krte hain.

Features and interiors:

Doston ab baat krte hai features ki, shuruaat krte hai Mercedes Benz GLA se, Sabse pehle toh doston pehli nazar me he GLA ka cabin contemprory aur fresh lagta hai X1 ki tulna me. X1 ka cabin outdated sa feel krta hai, umeed ye hai ki X1 ko jald he ek upgrade milegaa kyuki SUVs ki market me demand boht hai aur BMW shayad sahi time ka wait kr ra hai, jaise ki festive season, jo ki ek bht smart move hga. GLA ka cabin luxurious aur plush nazar aata hai, jski wajah hai iska beige color ka upholstery aur sath me wood trim accents, jo ek bht he upmarket feel deta hai. Fir aate hai hum sabse bade feature par jo hai integrated instrument cluster aur infotainment system. Dosto, GLA ka infotainment system 3 inch bada hai X1 ke infotainment screen se aur iska instrument cluster 5 inch bada toh hai he, sath me digital bhi hai. Ye 10 inch ke do alag screens hai jisko sath me jod diya gya hai jis wajah se dashboard par ye bht dominant nazar aata hai. Sath me MBUX voice control ko bhi use kiya ja sakta hai. Centre console me touch bad bhi available hai. Iske Aircon vents bhi dekhne me kaafi sundar hai, ek airplane ke cockpict ki feet deta hai pura cabin. Isme aapko Alexa aur google home integration ke sath geo fencing, vehicle status check, vehicle monitoring, vehicle setup jaise features milte hai. Vehicle setup me remote engine start, traffic update, speed alert, jaisi suvidha milti hai. Ye saare features BMW X1 miss out krta hai 

Dosto, BMW X1 me 8.8 inch ka touch display jo aur 5.7inch ke analog instrument cluster sath me M sport steering wheel, Apple Carplay, aur instrument panel par accent stitching jaise features milte hai. Doston BMW X1 me android Auto nahi milta hai jo ek missed opportunity hai. Mercedes GLA ki tulna me X1 kaafi features ko miss krta hai. GLA me ANdroid auto aur apple carplay bhi milta hai, lekin woh wireless nai hai. Uske alawa over all jo cabin feel hai wo GLA ka superior sabit hta hai. X1 ka panoramic sunroof aur rear head space thda behtar hai GLA ki tulna me lekin uske alawa GLA ka cabin aur feature list zyada behtar hai X1 se. 

Iske alawa dono gadion me steering mounted audio, 12v power outlets, rear parking sensors, electrically adjustable rear view mirrors, tilt adjustable steering wheel, ambient lighting, automatic AC with 2-zone climate control, cruise control, wireless charging jaise features maujood hai.

Andruni jagah aur comfort:

Shuruaat krte hai Mercedes GLA se, dosto ye gaadi dikhne me bohot he luxurious aur elegant nazar aati hai. Iska radiator grille bohot upright hai aur isko chrome treatment diya gya hai. Grille ke beech me Mercedes Badging hai aur iske pinheads bhi chrome me hai. Iske bonet pe lines aur creases diye gaye hain jo iska thda sporty stance deta hai. Grille ke dono taraf LED headlamps milte hai aur gaadi ke front aur rear bumper ke neeche skid plates mlte hai jo sporty stance ko accent karte hai. Side profile se dekhe toh windows pe bhi chrome element ka use kia gya hai. Upar ki taraf roof rail jaisa look aata hai aur gaadi ke peeche ki taraf sloping roofline pe spoiler effect diya gya hai. Aur two piece LED tail light setup ke sath twin exhaust setup milta hai aur mock diffuser bhi use kia gaya hai. Is gaadi ka rear design thda wide hai jis wajah se boot lid ka opening chauda hai.  

Ab baat krte hai BMW X1 ke baare me, doston is gaadi ka front face har BMW gaadi ki tarah aggressive dikhta hai jiska majority credit jaata hai front bumper pe laga chrome finished kidney grille. Grille ke dono taraf aapko LED headlamps milte hai with DRLs aur uske neeche he LED fog lights bhi milte hai. Side mirrors me X1 ka LED projection bhi milta hai aur gaadi ke windows me chrome elements ka istamal kia gaya hai. Peeche ki taraf two piece LED tail light setup milta hai aur iske tailpipe ko bhi chrome treatment diya gya hai. 

Doston dono gaadiya dikhne me kaafi khoobsurat hai, jaha Mercedes benz GLA sporty aur luxurious nazar aati hai waha BMW X1 aggressive aur loud nazar aati hai. Mercedes GLA 200 aur 220d 18 inch ke wheels ka istamaal krti hai aur BMW X1 17 inch ke wheels ka istemal karti hai. Dono gaadiyon me sunroof bhi available hai, lekin X1 ka sunroof zyada bada hai. 

Agar hum dimensions ki baat kare Mercedes Benz GLA ki lambai 2 inch kam hai, oonchai aur chaudai ek inch zyada hai X1 se. Waise toh dono gaadi ke dimensions identical hai, 14 foot lambi, 6 foot chaudi and 5 foot oonchi aur inka wheelbase 8 feet ka hai. Agar hum seat contouring ki baat kre toh Mercedes GLA ki seating thdi zyada comfortable soft aur behtar dikhti hai. Iska under thigh support bhi kafi acha hai, isme artico man made leather ka use kia gaya hai. GLA me aapko electrically adjustable seats milte hai with memory function aur sath me lumbar support bhi hai. X1 ka cabin thda roomier zyada lagta hai, jiski wajah hai iska panoramic sunroof, ye GLA ki tulna me kaafi bada hai aur ye ek roomier cabin ki feel deta hai, khaas taur ki tab jab GLA ka roof rear end me slope krne lag jaata hai. 

Engine and performance:

Doston aage bhadte hai aur baat karte hai performance ki. Overall performance ki baat kre toh BMW X1 zyada behatr saabit hti hai GLA se. X1 .6 seconds zyada taez hai GLA se 0-100 ke sprint me. GLA 8.7 seconds me 0-100 ki raftaar pakad leti hai. Dono gaadiyan petrol DCT configuration ke sath aati hai. Aur doston GLA ke diesel engine 0.5 seconds zyada taez hai X1 se, ye 0-100 7.4 seconds me paa leti hai. Mercedes GLA 29 bhp kam power banati hai X1 se, GLA ka engine 163 bhp ka power banati hai. Aur 250nm torque banati hai jo 30 Nm hai X1 se. Doston mercedes benz GLA ka engine kaafi smooth aur refined hai, iska power band zyada wide nai hai, iska mid range zyada strong hai, yani ki 2000-4000rpm tak. Aapko slow moving traffic me thdi dikkat ho sakti hai. Otherwise highway jaunts me aapko overtakes aur acceleration ek seamless affair lagega.

Doston BMW x1 ki top speed 12 kmph zyada hai Mercedes benz GLA se, GLA ka top speed 210kmph. Doston, Mercedes benz gla aur X1 me 4 driving modes milte hai. Dono gaadiyon me Eco, sport, comfort modes upladbh hai. GLA me aapko individual drive mode milta hai aur X1 me PRO. Dosto, Mercedes GLA ka individual mode aapko liberty deta hai engine ke behaviour ko apne personal prefrence ke according set krne ka, isme aap suspension, throttle response jaise factors ko apne hisaab se alter kr skte hai jisse aap aapna personal driving style experience kr skte hai. BMW X1 me pro driving mode uplabdh hai jo gaadi ke suspension ko stiff krdeta hai aur fuel intake aur throttle input ko bhi behtar kr deta hai, is wajah se pro mode me jo experience hai wo kaafi dynamic aur spirited lagta hai. Comfort mode me iska gear box immediate inputs ko execute krne se pehle thda hesitate krta hai jo ki almost na ke barabar hai. Aur sport mode me wo hesitation bhi gayab ho jata hai.

Mileage:

Doston, Mercedes benz GLA ke petrol engine ka average 1litre  (round off) kam hai X1 se aur diesel engine ka average 2 litre (round off) kam. (re-check the kam jyadaz) BMW X1 ka petrol engine 14.82km ka average deti hai aur diesel engine 19.62kmpl.

Pakad aur Suspension:

Ab baat krte hai ride quality ke baare me, Doston GLA ka ride quality pliant aur relaxed hai, Iska steering feel bhi boht accurate hai. Corners me thda body roll aapko pta chalega, lekin wo almost negligible hai. High speeds me gaadi ki pakad kaafi achi hai. Road undulation ko ye kaafi aaram se absorb kar leta hai. 

Ab baat krte hai BMW X1 ki, Iska suspension soft hai jis wajah se aapko rough roads pe zyada dikkat nai hogi aur iska steering wheel bhi kaafi light rehta hai low speeds pe aur high speeds me apne apne weigh up ho jaata hai aur ride comfort bhi X1 ka thda smooth aur supple hai. Dono gaadiyon me se agar thdi sharp aur spirited experience ko nazar me rakkhe toh BMW X1 Mercedes benz GLA ko out perform krti hai. Iska driving experience thda aur engaging hai GLA se.

Safety:

Dosto, baat krte hai safety ki, Shuruaat krte hai Mecedes GLA se, Isme pre safe system hai jo accident ya emergecy situations me gaadi ke interior elements ko safe aur favourable banata hai. Jaise ki emergency braking me seat belt apne aap tight ho jaega, sunroof band hojaega, window glass band hojaega aur agar seat ka angle zyada reclined hai toh use bhi adjust kr dia jaaega. Isme active brake assist hai jo khud he brakes ko engage kr deta hai jab ye potential collision ya accident detect krta hai, Isme active bonnet bhi hai, mtlb collison hone par ye bonnet ke peeche ka hissa upar kr deta hai taaki engine aur pedestrian ke beech me sapce bane. Aur Gla me knee bags bhi milte hai, BMW x1 me 6 airbags milte hai aur GLA me 7.  Aur ye saare features BMW X1 me maujood nai hai. BMW X1 me cornering brake control, iska mtlb hai gaadi corners pe jab extreme brake hoti hai toh brake ka pressure aysymetrical hta hai jis wajah se gaadi zyada control me rehti hai. Isme park distance control maujood hai jo apko alerts deta rahega gaadi ke exterior environment ke baare me jab aap park krne ki koshish krnge. aur attentiveness assistant bhi hai jo gaadi ke 70kmph mark cross hote he activate ho jaata hai, ye driver ke behaviour pattern ko observe krta hai aur kab brake krna hai iski soochna pehle he dedeta hai. Iske alawa dono gaadion me electric parking brake, driver and passenger airbags, side airbags, curtain airbags. ABS with brake assist, dynamic stability control, traction control, tyre pressure monitoring system jaise features milte hai.

Dosto, euro Ncap ke hisaab se Mercedes GLA me adult occupant 6 per cent zyada safe hai, child occupant ek per cent zyada aur pedestrian 7 per cent kam safe hai X1 ki tulna me. BMW x1 me adult 90 percent, child occupant 87 per cent, aur pedestrian 74 per cent safe hai. Dono gaadiyo ko 5 star rating mili hai euro NCAP test me.  

Doston, agar hum thda aur perspective laane ki koshish karien toh MG ki Gloster, jiska top model Rs 44 lakh ka hai aur same price me aapko BMW X1 ka base model milta hai.  Gloster me 360 degree around view camera, automatic emergency braking, blind spot detection, driver and co driver seat heating, driver seat massage, lane departure warning, pm 2.5 filter, Automatic parking assist, fully automatic powered tailgate, find my car, geo fence, 12 inch touch infotainment system jaise features hai. 

Verdict:

Doston, dono gaadiyan kaafi achi entry level luxury SUVs hai. Pricing me dekha jaaye toh mercedes zyada mehangi hai, features aur interior ki baat krien toh GLA superior saabit hoti hai X1 se. Engine specs ki baat krien to X1 zyada powerful hai on paper. Magar performance me wo difference kaafi negligible hai. Aur baat ki jaye safety ki toh, tab bhi Mercedes Benz GLA thda zyada features offer krta hai X1 ki tulna me. 

Doston, is comparison se yehi pata chalta hai ki GLA ek zyada behtar car hai X1 se. Thdi mehnagi zaroor hai lekin feature rich aur zyada better option GLA sabit hta hai. Humara ye video poora dekhne keliye dhanyawaad.