Eeco vs WagonR Hindi | मारुती ईको vs वैगन आर

Namashkaar doston! CarComparos mein aapka swagat hain, jahan par hum nabbe pratishat waqt gaadiyon ka gehra vishleshan karne mein bitaate hain, baaki saare YouTubers ki tarah, sirf Videography karne mein nahin! Toh aaj hum aap ke liye le kar aaye hain Maruti Eeco aur WagonR ki vistrit tulana, humaare ‘Khoobiyaan-Khaamiyaan’ waale andaaz mein - matlab hum iss video ke aadhe hisse mein aap ko Eeco ki kuch aisi khoobiyaan dikayenge, jo WagonR mein maujood nahin hain aur uske baad WagonR ki aisi khoobiyaan dikhayenge, jo Eeco mein uplabdh nahin. Lekin in dono gaadiyon ki tulana hum aakhir kyon kar rahe hain? Ye toh bilkul alag-segment ki gaadiyaan hain, ek hatchback hain, aur doosri Van. Toh baat aisi hain, ke Google Search Data ke mutabik har roj hazaaro log in dono gaadiyon ki tulana khoj rahe hain. Khaas unke liye hum-ne aaj ye video banaya hain! In dono gaadiyon mein se jyada upyukt taxi kaunsi gaadi saabit hogi ye toh hum aap ko jaroor dikhayenge, lekin hum ye baat bhoole nahin hain, ke aaj bhi chote-gaon aur grameen ilakon mein hazaaro parivaar apne ghar-parivaar ke liye private-number plate waali - yane ke safed number plate waali Eeco khareedte hain, aur kyon na khareedein? Jinke parivaar mein saat sadasya hain aur budget paanch laakh se kam hain, unke liye, poore market mein Eeco ke siway aur koi bhi paryaay uplabdh nahin hain. Iss wajah se kai jagah pe Eeco kaafi lokpriy family-car ho chuki hain aur padosi ki Eeco dekh kar chaar-paanch sadasya waale parivaar bhi Eeco apnaate rahe hain. Aise grahakon ke liye, WagonR jaisi aadhunik gaadi behtar paraay toh nahin? Ya phir Eeco mein kuch aise khaas purje lage hue hain, jo matti-aur-keechad se bhari hui sadkon pe usse WagonR se behtar pakad aur niyantran dete hain? Aise saare sawaalon ka jawaab aaj hum aap ke saamne pesh karenge, CarComparos ke WagonR versus Eeco comparison video mein. 


2021 Eeco vs WagonR CNG

1.1 - Toh chaliye shuru karte hain Eeco ki pehli khoobi se jo hain uski Off-roading ki kshamata :

Aaj bade durbhagya ki baat hain, ke dher saare grahak, gaadi khareedne se pehle, uske brochure mein likha hua ground clearance aur payyon ka aakar padh-ke, gaadiyon ki off-roading kshamata ka mann-hi-mann andaaza laggate hain. Aisa karna kitna galat saabit ho sakta hain, iska behtareen udaharan hain ye dono gaadiyaan. Ab gaur farmayiye, yahan par WagonR ke wheels, Eeco se ek-inch bade hain. Uska ground-clearance bhi Eeco se aadha-inch ooncha hain. Lekin jab ye dono gaadiyan matti-aur keechad mein utarti hain, toh Eeco, WagonR se kai-guna behtar pakad aur niyantran rakh paati hain. Jiss keechad mein WagonR phas jaati hain, whan se Eeco arram se nikal jaati hain! Aisa kyon? Kyonki Eeco aur WagonR ki banawat mein ek bahut bada fark hain. WagonR ek front-wheel-drive gaadi hain, jabki Eeco Rear-wheel-drive. Yane ke WagonR ka engine sirf uske agle payye ghoomaata hain, jabki Eeco mein engine pichle payye ghoomaata hain. Iska nateeja ye hota hain, ke jab ye gaadiyaan matti-aur-keechad mein chalti hain, tab WagonR ke agle payyon ko gaadi kheechni padti hain, wohin Eeco mein uske pichle payye gaadi ko keechad se baahar dhakelneka kaam karte hain. Paanch laakh ki keemat mein milne waali iklauti Rear-Wheel-Drive gaadi hain Eeco. Darasal nau-laakh ke neeche aaj poore market mein Eeco ke alava koi bhi Rear-wheel-drive gaadi nahin milti. Sade-nau laakh pe jaa ke Bolero ki keemat shuru hoti hain. Iska matlab, jo grahak kacche-raaston pe apni gaadi istemaal karne waale hain, lekin jinka budget nau-laakh se kam hain, unke liye Eeco khaaredne ke alava aur koi paryaay nahin hain. Har mahine, Bharat ki top-ten, sab-se jyada bikne waali gaadiyon mein se ek Eeco hone ki, ye ek bahut badi wajah hain. Shehri logon ko toh ye andaaza bhi nahin hota ke har mahine Creta ya Seltos jitni bikti hain lagbhag utni hi Eeco bhi bikti hain apne market mein! 


Model

Tyre Size

Wheelbase

Ground Clearance

Variant

Eeco

155/80R13

2350

160

all

WagonR

165/70R14

2435

170

V, Z

WagonR

155/80R14

2435

170

L


1.2 7-Seats:

Doston paanch-se che laakh ke budget mein, saat seats waali sirf teen gaadiyaan market mein upladh hain. Renault Triber, Datsun Go-plus aur Maruti Eeco. Lekin Triber aur Go-plus mila-ke Eeco ke aadhi bhi nahin bikti. Darasal Triber ki pichli-seats Eeco se kaafi jyada araamdaayak hain, lekin Renault aur Datsun ke service centre abhi tak chote gaon tak nahin pahunche, aur na-hi agle kuch saal tak pahunchne waale hain. Isliye chote gaon mein, bade-parivaar waale grahakon ko, Eeco khareedne ke bajay koi paryaay nahin. Ab jinke parivaar mein saat-sadasya hain, unke liye paanch-seat waali WagonR khareedne ek bahut bada nuksaan ho sakta hain, ke unko jab-jab ek-saath sair pe jana hoga, toh koi seven seater gaadi kiraye pe leni padegi.

 

1.3 Boot-space:

Model

Boot-space

Length

Width

Height

WagonR

341

3655

1620

1675

Eeco

540

3675

1475

1800

Lekin sirf bade-parivaar waale grahak Eeco ki andruni jagah ka laabh utha sakte hain aisa bilkul nahin. Jo grahak apni khud ki gaadi apne business ke liye istemaal karte hain, unke liye bhi Eeco WagonR se behtar paryaay hain. Pehli baat toh Eeco mein WagonR se do-sau-litre jyada boot-space uplabdh hain - yane ke WagonR se lagbhag saath pratishat jyada. Ab gaur farmayiye, WagonR aur Eeco ki lambai mein kuch khaas fark nahin hain, aur chaudai mein toh Eeco WagonR se poore che-inch choti hain. Phir Eeco ke andar WagonR se jyada jagah kaise ho sakti hain? Iss sawaal ka jawaab paane ke liye aap ko Eeco ka bonnet khol-ke dekhna padega. Phir aap ko turant pata chal jayega ke Eeco ke bonnet ke andar engine hi nahi hain! Kyonki uska engine toh agle seat ke neeche sthit hain. Jabki WagonR ka engine Driver ke aage sthit hain, jiske kaaran uska yaatri kaksh Eeco jitna lamba nahin ho paaya. Rahi baat payload ki, toh dono gaadiyon mein sirf pandrah kilo ka fark hain, dono gaadiyon mein paanch-sau kilo ka samaan dhona (ढोना) mumkin hain.



1.4 Sliding Rear Doors:

Doston Eeco mein WagonR ke mukaable ek aur chota-sa faayda hain, jo kabhi-kabhi bade kaam ka sabit hota hain, jo hain uska sliding door. Jahan par parking bahut sikuda hota hain, wahan Eeco ke sliding-darwaaje bade kaam aate hain. Samaan rakhte waqt bhi ye sliding door kaafi upyukt saabit hota hain, kyonki Eeco ka door-sill bhi bilkul flat hain, jabki WagonR ka door sill thoda sa oopar utha hua hain, ye baat jaroor yaad rakhna.


Mid-ro:

Toh doston, bade parivaar waale aur kharaab raston waale ilakon mein rehne waale grahak Eeco hi kyon khareedte hain, ye toh aap ne dekh liya, lekin agar aap ke gaon-sheher mein theek-thaak-se raste maujood hain, aur parivaar mein chaar-paanch hi sadasya hain, magar aap ke padosi ke paas Eeco hain aur wah apne gaadi ki hamesha tareef karta hain, isliye aap Eeco khareedne ki soch rahe honge, toh aap ek bahut badi galati kar rahe hain. Aap ki jarooraton ko WagonR kai guna behtar poori kar sakti hain aur oopar se aap ke dher saare paise bhi bacha sakti hain. Kaise? Chaliye dekhte hain.. 


2.1 Mileage:

Doston, shuruwaat karte hain mileage se. Petrol-models ki tulana ki jaaye, toh Eeco ka mileage, bara-sau-cc engine waali WagonR se sade-chaar k.p.l. kam hain aur hazaar-cc engine-waali WagonR-se lagbhag che k.p.l. kam. Dianandin istemaal mein Eeco-petrol aap ko lagbhag tera k.p.l ka mileage degi aur dono WagonRs sola-se satrah k.p.l. Ka mileage deti hain. Iska matlab, salaana pandrah-hazaar-rupay ke hisaab se, saat saal mein, aap ko Eeco ke petrol pe, WagonR se, lagbhag do-laakh rupay jyada kharch karne padenge. Thande dimaag se phir ek baar iss baat pe gaur farmayiye aur phir sochiye ke saat saal mein aap ko das-pandrah baar koi saat seater gaadi kiraye pe leni padi, toh uska kharcha ded laakh se jyada nahin hone-waala. Toh Eeco khareedne se pehle das-baar sochiye, kya wakai mein aap ko saal mein do-teen-baar se jyada, saat-seats ki jaroorat padne waali hain ya nahin. Rahi baat dono ke CNG models ki, toh unmein bhi WagonR ka ARAI pramaanit mileage Eeco se takreeban bara k.p.l. behtar hain! Toh agar aap mein se koi Ola/Uber ya taxi purpose ke hisaab se in dono gaadiyon ki tulana kar rahe hain, toh WagonR aap ko lambi daud mein Eeco se kaafi sasti padne waali hain, ye baat kabhi mat bhoolna. 


Model

Petrol Manual

Petrol Automatic

CNG Manual

Eeco

16.11

-

20.9

WagonR

21.8 (1.0), 20.5 (1.2)

21.8 (1.0), 20.5 (1.2)

32.5 (1.0)


2.2 Safety

Doston aaj bhi market mein adhiktar grahak gaadiyon ka wajan dekh kar unke safety ka andaaza lagate hain, isse bade durbhaagya ki baat koi nahin. Yahin dekhiye, WagonR ka wajan Eeco se sau-kilo halka hain, lekin Global NCAP ke crash test mein

Eeco, Zero-star ka rating paa ke, fail ho gayi thi, jabki WagonR do-star ka rating paa ke pass ho gayi thi. Mana ke testing ke liye bina Airbag waali Eeco istemaal ki gayi thi, jabki WagonR mein driver-airbag maujood thi. Lekin yahan par sirf crash-test rating dekhna kaafi nahin hain. Eeco ki oonchai bhi hadd se jyada hain - WagonR se poore paanch inch jyada. Jiske kaaran uska- C.G. - yane ke centre of gravity itna ooncha sthit hain, ke tez raftaar pe modh lete waqt gaadi palti khaane ki sambhavana kaafi jyada hain. Aur yahan par baat khatam nahin hoti. Eeco ki oonchai ka ek aur bada nuksaan hain, jiske baare mein hum aage baat karenge..


Model

Total Star Rating

Adult Rating

Child Rating

Agency

WagonR

2

6.9/17

16.3/49

Global NCAP

Eeco

0

1.1/17

24.2/49

Global NCAP


2.3 Pakad Santulan:

Eeco ki hadd-se-jyada oonchai ka doosra bada nuksaan hua hain uske suspension comfort pe. Modh lete waqt Eeco ka santulan sudhaarne ke liye, Maruti ke engineers ko uska suspension behat sakht karna pada hain. Iss wajah se wah gaddhon aur speed breakers ko bilkul bhi sokh nahin paati. Anadar baithe yaatriyon ko kaafi teevr jhatke lagte hain. Market ki sab-se ghatiya suspension comfort waali gaadiyon mein se ek hain Eeco. Iske viparit WagonR ka suspension comfort kai guna behtar hain. Iski aur ek wajah hain WagonR ka lamba wheelbase - yane ke agle aur pichle payyon ke beech ka antar, jo Eeco se teen-chaar inch lamba hain. Iss wajah se highway par WagonR, Eeco-se behtar santulan darshaati hain. Modhon par bhi WagonR mein Eeco jitni, under-steer ki samasya nahin hoti. Eeco kaafi dheemi raftaar pe under-steer karne lagti hain, yane ke phisalne lagti hain. Eeco mein body-roll ki samasya bhi WagonR se kaafi jyada mehsoos hoti hain, matlab wah modh lete waqt kaafi maatra mein daaye-baaye dolti hain. WagonR ka ‘handling’ bhi Eeco se kaafi badhiya hain - yane ke wah modhon par behtar pakad banaye rakhti hain aur uska steering-feel athwa feedback bhi Eeco se acha hain. Aur jab baat aa pahunchi hain steering pe, toh yahan par Eeco ki sab-se badi khaami nikal ke saamne aati hain, ke usmein aap ko Power-Steering ka paryaay bhi nahin milta, top-end-model mein bhi nahin. Parking karte waqt aap ko iski dikkat jaroor mehsoos hogi. Doosri-aur, WagonR mein base-model se power-steering standard milta hain.


Model

Tyre Size

Wheelbase

Ground Clearance

Variant

Eeco

155/80R13

2350

160

all

WagonR

165/70R14

2435

170

V, Z

WagonR

155/80R14

2435

170

L


2.4 Comfort & Ergonomics:

Doston Eeco mein WagonR se do seats jyada jaroor milte hain, lekin Eeco ke seats bilkul bhi comfortable nahin hain. Unka cushioning, lumbar support, side bolstering sabhi WagonR ke aas-paas bhi nahin hain. Kehne ka matlab, WagonR mein Eeco se do-yaatri kam baith paate hain, lekin un paanch yaatriyon ko jo seating comfort milta hain wah Eeco mein aithe hue yaatriyon se kai-guna behtar hota hain. Oopar se ye bhi yaad rakhna ke WagonR ki chaudai Eeco se che-inch jyada hone ke kaaran usmein Eeco se behtar shoulder-space maujood hain - matlab, Eeco ki sab-se pichli seat pe jab teen yaatri baithte hain, tab unko sikud kain baithna padta hain, jabki WagonR ki pichli seat pe jab teen-yaatri baithte hain toh wah araam se baith paate hain. Itna-hi-nahin, WagonR ke andar Eeco jitni wind-noise, tyre-noise aur road-noise bhi sunai nahin deti. Kul milakar in saari baaton ka asar ye hota hain, ke jab yaatri in dono gaadiyon mein lambi safar karte hain toh WagonR mein baithe hue yaatriyon ko Eeco waalon se kaafi kam thakaan mehsoos hoti hain.

 

2.5 Pick-up:

Mana ke iss shreni ke grahak pick-up jaise pehelu ko jyada ahmiyat nahin dete, lekin phir bhi agar unki gaadi, teevr dhalaang pe theek-se pick-up nahin le paayi, toh unko pareshaani jaroor hoti hain. Iss maamle mein WagonR, Eeco se beat shreshth hain. Darasal WagonR ka hazaar-cc-engine-waala-model bhi Eeco se behtar pick-up leta hain. Kyonki uska power-to-weight ratio, Eeco se halka-sa behtar hain. Rahi baat bara-sau-cc waali WagonR ki, toh uska power-to-weight ratio Eeco se pachis-tees pratishat behtar hain. Isliye wah Eeco se kaafi-tez pick-up le paati hain. Khaas kar jab ye dono gaadiyaan poori tarah se bhari-hoti hain, tab dono-ke pick-up mein zameen-aasmaan ka fark mehsoos hota hain.  


Model

Power

Torque

Kerb Weight

Power to Weight

Torque to Weight

Fuel

Variant

WagonR

83@6000

113@4200

835

99

135

Petrol

1.2

WagonR

68@5500

90@3500

815

83

110

Petrol

1.0

Eeco

73@6000

98@3000

940

78

104

Petrol

all


Rahi baat CNG waale models ki, toh WagonR mein sirf hazaar-cc engine waale model mein CNG ka paryaay uplabdh hain, jiska pick-up Eeco CNG se milta julta hain. Lekin yahan par ek baat jaroor yaad rakhna doston, ke CNG pe chalte waqt in dono gaadiyon ka pick-up petrol se bahutahi kamjor mehsoos hota hain.


Model

Power

Torque

Kerb Weight

Power to Weight

Torque to Weight

Fuel

Eeco

63@6000

85@3000

1050

60

81

CNG

WagonR

59@5500

78@3500

910

65

86

CNG


2.6 Keemat aur Features:

Waise toh Eeco ki keemat chaar-laakh-pachaas hazaar se shuru hoti hain, on-road Dilli, lekin, chaalis hazaar jyada de-kar uska AC model mil sakta hain. Matlab saat-sau rupay jyada EMI de kar aap AC waali Eeco khareed sakte ho. Usse das hazzar rupay mehengi hain WagonR LXi. Lekin yaad rakhna, AC-waali Eeco sirf paanch-seater paryaay mein aati hain. Uske seat badalwaane mein aap ka das-hazaar rupay tak kharcha hoga, matlab uski keemat bilkul WagonR LXi jitni hi ho jayegi. Rahi baat features ki, toh WagonR ka base-model mein bhi top-end Eeco se jyada features milte hain, ye baat hamesha yaad rakhna. WagonR LXi mein Front Power Windows, Chaabi wala Central Locking, Fuel Computer aur Electric Power Steering milta hain, jo Eeco ke kisi bhi model mein nahin milta.


Antim Nirnay:

Toh doston, jaisa hum ne dekha, lagbhag saare pehelu mein WagonR, Eeco se behtar gaadi hain. Aakhir Eeco jis platform pe bani hain wah ikkis-saal puraana platform hain, jabki WagonR ka heartect platform lagbhag che-saal puraana hain - yane ke WagonR, Eeco ke pandrah saal baad vikasit hui hain. Ab pandrah saal mein gaadiyon ki banawat mein zameen-aasmaan ka fark hua hain ye aap ne apni aankon se dekha hain. Pandrah saal ka fark matlab Indica aur Altroz ka fark, pandrah saal ka fark matlab Qualis aur Innova Crysta ka fark. Tabhi WagonR ka pick-up, uska mileage, uska padak-santulan, uska comfort aur uski safety sabhi Eeco se saaf saaf behtar hain. Nateeja ye, ke wah market ke nabbe pratishat grahakon ki jarooratein Eeco se behtar poori karti hain aur isi liye humaari iss tulana ki vijeta hain. Sirf das pratishat grahak aise hain, jinko wakai mein bahutahi oobad-khaabad raaston pe gaadi chaleni padegi, sirf das pratishat grahak aise hain jinko baar-baar, saat-seats ki jaroorat padti hain, sirf das pratishat grahak aise hain jinko baar-baar apni gaadi mein samaan dhona padta hain. Unn das-pratishat grahakon ke liye aaj paanch-laakh ke neeche aaj doosra koi paryaay uplabdh nahin hain. Sirf unke liye Eeco, WagonR se behtar vikalp saabit hota hain.  



ThrottleStore:

Doston aaj ThrottleStore ki taraf se khaas CarComparos darshakon ke liye, unke saare tshirts, hoodies, keychains, masks aur stickers pe pachiss pratishat ka discount offer, hum aap ke liye le kar aaye hain. ThrottleStore pe aap apni pasandeeda gaadiyon ke design waale products khareed sakte hain aur wo bhi sab-se kifayati daam mein. Unki ek jhalak yahan aap ke screen par pesh hain. Iss limited period offer ka laabh uthaane ke liye, video ke oopar-sthit i-button par click kijiye ya phir video ke neeche, description mein di-hui link par click kijiye aur C.C.T.S.Twenty-five promo code istemaal kijiye



OfferS:

Doston aaj khaas CarComparos darshakon ke liye, Maruti apni Eeco aur WagonR pe chaalis-hazaar rupay tak ka discount de raha hain, jiski link aap ke screen par maujood ‘i-button’ mein, aur video ke neeche sthit description mein maujood hain. Agar aap Eeco ya WagonR khareedna chahte hain toh iss avsar ka jaroor laabh uthayiye.