Mahindra Thar 2021 Advantages Khhobiyaan BS6 Pros Positives


...yahan par baat khatam nahin hoti. Low-ratio ke aage jaa kar gaadiyon ki off-roading kshamata badhaane waala ek purja, aaj apne market mein pacchis laakh ke neeche sirf do gaadiyon mein milta hain, Thar aur Gurkha. Ye kaunsa purja hain aur kaise kaam karta hain ye hum ab aap ko batayenge..


3. Mechanical Locking Rear Differential:

Toh Doston, jaise low-ratio gearbox aap ko sadhaaran gaadiyon ke do-teen guna teevra dhalaang chadhne ki kshamata deta hain, waise usmein ek aur system maujood hain, jo keechad mein gaadi ke payye phisalne se bachata hain. Iss system ka naam hain Mechanical Locking Rear Differential. Ab ye system kaise kaam karta hain ye hum aap ko batayenge. Jab aap gehre keechad pe aur oobad-khaabad raaston pe gaadi chalaate gaadi chalate ho, tab sadhaaran gaadiyon ka ek payya apni pakad kho deta hain, aur tezi se ghoomne lagta hain. Engine ki saari taakat uss payye ki taraf chali jaati hain. Uske bagal wala payya, jo vaastav mein zameen par hota hain, jo wakai mein gaadi ko aage kheech sakta hain, wah poori tarah se ghoomna band ho jaata hain. Lekin Thar aur Gurkha mein ye dikkat nahin aati. Unka jo payya tez ghoomne lagta hain, use gaadi apne aap rok leti hain aur bagal waala payya ghoomane lagti hain. Vaastav mein iss system ke andar dono payyon ki raftaar, ek-samaan karne waale do ‘clutch’ hote hain, jo kisi bhi ek payye ko akele ghoomne nahin dete. Isi liye sadharan gaadiyan registaan ki ret mein aur pahaadi keechad mein asaani se phas jaati hain, magar Thar aur Gurkha wahan pe asaani se aage nikal jaati hain! Darasal Gurkha yahan par Thar se bhi do kadam aage hain, kyonki Thar mein sirf pichle payyon mein mechanically locking differential hain aur aage brake-lock-differenntial maujood hain, jabki Gurkha mein aage bhi mechanical diff lock milta hain. Toh doston, yaad rakhna, brochure mein likha hua payyon ka size, tyres ki chaudai aur ground clearance se gaadi ke off-roading ki kshamata ka andaaza mat lagana. Four-wheel-drive, low-ratio gearbox aur locking differential jaisi systems maujood hone se gaadi sacchi off-roader banti hain! Sharam ki baat toh ye hain, ke aaj market mein jin gaadiyon ko SUV kaha jaata hain, unmein off-roading ke koi bhi systems nahin hote! Usmein utpadak ‘Terrain modes’ ka jhootha-mootha switch de kar uspe ‘mud’, ‘sand’, ‘snow’ likh rahe hain. Lekin is pharji switch ko chahe sau-baar ghooma lo, wo gaadiyan kabhi asli-off-roaders ke aadhi off-roading bhi nahin kar payengi!


4. Puraani versus Nayi Thar

Toh doston ab tak hum ne aap ko Thar ki wo khoobiyaan bata di, jo usse saari pharji SUVs se behtar banati hain, lekin ab hum aap ko naye Thar ki kuch aisi khoobiyaan batayenge, jo puraani Thar mein nahin milti thi. Nayi Thar ke door-handles ke alava, uska lagbhag har-ek purja naya hain. Sab-se bada fark hain naye Thar ki ladder-frame chassis, jo darasal TUV300 se li hui hain aur chota wheel-base, bade payye, all-wheel drive system, ityadi ke liye pari-vartit ki gayi hain. Body panels bhi poori tarah se naye hain. Nayi Thar ki lambai aur oonchai lagbhag puraani Thar jitni hi hain, lekin uski chaudai puraani Thar se poore chaar inch jyada hain. Doosra bada fark hain engine mein. Nayi Thar ka diesel engine, puraani Thar se paanch-sau-cc chota hain, lekin iske bawajood wah pacchis horsepower jyada shatishaali hain aur uska torque bhi pachaas Nm behtar hain. Itna hi nahin, ab zindagi mein pehli baar, Thar mein petrol engine ka vikalp bhi aa gaya hain jo do-hazaar-cc ka turbo-charged maamla hain, aur wah Thar ke naye diesel engine se bhi bhi bees horsepower jyada deta hain aur saath mein bees newton-metre jyada torque bhi! Yahan par Mahindra ki khaas prashansa karna chahenge, ke Thar ki lambai chaar metre se kam hone ke bawajood, unhone sub-4-metre shreni ki tax bachat karne ki koi lalach nahin ki, warna Thar mein piddu sa bara-sau-cc petrol aur pandra-sau-cc diesel engine milta. Lekin phir, Mahindra ne iski lambai kyon nahin badhaai? Creta/Seltos jitni lambi kar dete toh achi-khaasi bootspace aur rear-seat-space bhi mil jaati. Filhaal in dono pehelu mein kaafi badi dikkat hain..


5. Off-Roading ki kshamata:

Off-roading ki baat karein, toh nayi Thar ka Front-overhang - yane ke payyon ke aage-ka-hissa, puraani Thar se lamba hain, isliye uska approach angle puraani Thar se thoda kam hain. Matlab pahadi ilakon mein uske bonnet-ka-nichla-hissa ghisne ki sambhavana, puraani Thar se thodi jyada hain. Lekin nahi Thar ka ramp-over-angle aur departure angle dono puraani Thar se jyada hain, matlab payyon ke beech ki under-body aur dikki ke neeche ka hissa ghine ki sambhavana, puraani Thar se kam hain. Nayi Thar ka ground clearance bhi puraani Thar se ek inch behtar hain. Rahi baat diff-locks ki, jinka faayda toh hum aap ko pehle hi bata chuke hain, toh nayi Thar mein ab front-wheels ko brake-locking differential milta hain, jo puraani Thar mein uplabdh nahin tha. Agar Thar ka agla payya hawa mein uth gaya aur tezi se ghoomne laga toh gaadi apne-aap brake laga ke usko ghoomne se rokti hain. Iss feature ke peeche kaam karne waali naye Thar ki ESP - yane ke Traction Control Sytem bhi poori tarah nayi hain, jo puraani Thar mein maujood nahin thi. Usse off-roading hi nahin balki naye Thar ki Safety mein bhi bahut sudhaarana hui hain. Aur safety ke maamle mein nayi Thar ab B.N.V-sap Crash-test ko bhi pass karti hain, jo puraani Thar nahin kar paati thi, aur isi wajah se Mahindra ko pooori nayi chassis aur naye body body panels banane pade, warna wah puraani Thar mein B.S.Six engine laga ke kaam chala leta, jaisa usne Scorpio aur Bolero mein kiya hain..


6. Naye Features:

Engine aur chassis jaisi mollabhoot cheezon ke alava, nayi Thar mein dher saare chote mote features aur electronic khilone bhi aa chuke hain. LED DRLs, touchscreen infotainment System, Automatic Climate Control, Height Adjustable Driver’s Seat, Colour-TFT driver-information display, Cruise Control, Steering wheel switches, remote waala central locking aur Hill Hold. Itna hi nahin, ab nayi Thar mein do aise naye features aaye hain, jo market ki kisi bhi gaadi mein nahin milte. Pehla hain washable foot-wells, jo aap paani se dho sakte hain aur doosra uska chatt. Puraani Thar jaise fixed soft-top ke alava, ab nayi Thar mein convertible soft-top ka paryyay bhi aa gaya hain. Apne panoramic-sunroof waale doston ko sabak sikhaane ke liye isse behtar koi feature nahi. Aur agar aap ko canvas-ka-chatt acha nahin lagta toh ab aapko factory-fitted hard-top ka paryaay bhi milega.


7. Front Facing Rear Seats:

Toh doston, Mahindra bolta hain ke unki Thar ke peeche sattar saal ka itihaas juda hua hain. Iska matlab, Mahindra ko apne tamaam grahakon ki front-facing, rear-seats ki maang poora karne mein sattar saal lag hain! Lekin shukar hain ke ab toh kam se kam chaar yaatri, gaadi ke saamne dekhte hue safar kar payenge. Warna Thar saat-sau aane se pehle, sirf aage ki do seats front facing milti thi aur baaki saari side-facing. Side facing seats ki sab-se badi samasya ye hoti hain, ke unpe nausea - yane ke utli hone ki sambhavana kaafi jyada rehti hain. Pata hain kyon? Yaad kar ke dekho, ke sadhaaran gaadiyon mein aap ko sirf modhon par aur ghoomaawdar raaston par hi ulti hoti hain. Aisa isliye ke jab aap ka sar daaye baaye dolta hain, tab aap ke kaan ke peeche jo drav hota hain, wo uchhalta hain aur ulti ki ehsaas deta hain. Side facing seats pe baithe yaatriyon ka sar seedhe raaste pe bhi daaye baaye dolta hain, jab gaadi accelerate aur brake karti hain tab. Ab hisaab lagao, ke side facing seats pe ulti hone ki sambhavana kitni jyada ho sakti hain! Aut to aur, in seats par yaatriyon ko aamne-saamne baithna padta hain, jiske kaaran unke ghutne ek doosre se takraate hain aur har baar kisi ek yaatri ne apne pair hilaye, toh saamne waale yaatri ko bhi uske pair hilaane padte hain! Lambi safar mein ye saari baatein aapke comfort ki dhajjiyan uda deti hain! Isi liye yaad rakhna ke galati se bhi side-facing rear-seats waala model mat kareedna!


Thar vs Sonet Hindi Comparison:

Namashkaar doston! CarComparos mein aapka swagat hain! Main hoon aap ka dost xyz, aur aj hum aap ke liye le kar aaye hain Thar aur Sonet ki tulana. Ab isse pehle ke aap comments mein alag segment ki gaadiyaan ityadi likhna shuru kar de, usse pehle ek baar google trends pe dekh lijiye, aaj hazaaro log Thar aur Sonet ki tulana khoj rahe hain. Iski wajah hain, ke hazaaro grahak aaj soch mein pad gaye hain, ke char-मीटर  श्रेणी metre-shreni-ki pharji-SUVs khareedne ke bajay, agar usi keemat mein Thar khareed lenge toh koi dikkat toh nahin ayegi? Wah soch rahe hain ke Thar mein chaar-paanch-features kam milenge toh kya hua, uske badle mein wo Thar le kar jo tashan dikha payenge, wo unke Creta-Seltos waale dost bhi nahin dikha payenge! Toh chaliye dekhte hain ke unki soch sahi hain ya nahin, CarComparos ke Sonet vs Thar comparison video mein....


1. Toh chaliye shuru karte hain Keemat aur Features se:

Thar ka top-end, LX-diesel-manual-model milta hain sade-pandrah laakh rupay ko on road dilli. Sonet ka top-end, diesel-manual usse ded-laakh rupay sasta hain. Lekin sharam ki baat ye hain, ke itni mehengi hone ke bawajood, Thar mein Sonet se bees-pachhis features kam milte hain! jaise Side aur Curtain Airbags, Ventilated Seats, Front Parking Sensors, Rear Parking Camera ityadi, jinki poori list aap yahan screen par dekh sakte ho. Mana ke Thar mein Four-wheel-Drive-System, Low ratio gearbox aur mechanically locking differential milta hain, lekin yahan par hum zindagi bhar shari traffic mein gaadi chalane waale grahakon ki baat kar rahe hain, jo kewal tashan karne k liye thar khareed lenge. 

 offroading karne ki himmat inko kabhi nahin hone waali! Aise bandon ko jyada paise dene ke -bawajood bhi dher saare features se haath dhone padenge ye baat hamesha yaad rakhna. Darasal Thar be-faltu mein kaise loot macha rahi hain ye dekhna ho, toh usse paanch laakh rupay sasti Sonet se tulana dekh lo. Yahan par bhi Sonet mein aap ko Thar se das-pandrah features jyada milte hain! Mana ki  Thar ka four-wheel-drive mehenga jaroor hoga lekin itna bhi mehenga nahin ke Mahindra ko uske paanch laakh rupay dene pad rahe ho! 


Pickup:

Thar ka diesel engine, Sonet se 700 - cc bada hone ke bawajood, uska pick-up Sonet se kaafi kamjor hain, khaas kar automatic Sonet ka, kyonki uska wajan Thar se poora 600 kilo halka hain, lekin power sirf 15 h.p. kam hain. Smoothness mein bhi Sonet, Thar se saaf saaf behtar hain. Ab manual Sonet mein Kia ne 15-horsepower kyon ghatayee hain pata nahin, lekin phir bhi uska pick-up Thar se thoda-sa behtar hi hain. Toh doston Thar khareed kar aap ko features ki kurbaani toh deni hi padegi lekin itne paison mein aaj jitna acha pick-up mil sakta hain, wo bhi nahin milne waala.   

Model

Power

Torque

Kerb Weight

Power to Weight

Torque to Weight

Thar

130@3750

300@1600-2800

1775

73

169

Sonet

100@4000

240@1500-2750

1175

85

204

Sonet

115@4000

250@1500-2750

1195

96

209

Rahi baat petrol models ki, toh Thar ka pick-up, Sonet ke turbo-petrol model ke aas-paas bhi nahin hain. Hadd toh ye hain, ke Sonet ke turbo-petrol engine ka akaar, Thar ke engine ke aadha hain! Iske bawajood uska pick-up Thar se behat tez hain! Toh doston, bhol kar bhi engine ke akaar se gaadi ke pick-up ka anumaan mat lagaana! Sirf Sonet ke bina-turbo-waale kamjor engine se Thar ka pick-up thoda-sa behtar hain. Lekin Thar petrol ki asli pareshaani hain uska mileage, jiske baare mein hum aage baat karenge..

Model

Power

Torque

Kerb Wt.

Power to Weight

Torque to Weight

Fuel

Variant

Thar

150@5000

300@1250-3000

1725

87

174

Turbo Petrol

Manual

Thar

150@5000

320@1500-3000

1750

86

183

Turbo Petrol

Automatic

Sonet

120@6000

172@1500-4000

1125

107

153

Turbo Petrol


Sonet

83@6000

115@4200

1075

77

107

Petrol



Mileage:

Model

Petrol Manual

Petrol Automatic

Diesel-Manual

Diesel-Automatic

Thar

11.6

10.9

15.2

13.5

Sonet

18.4

18.3 (DCT), 18.2 (iMT)

24.1

19.0

Diesel-manuals ki tulana ki jaaye, toh dono gaadiyon ke ARAI mileage mein nau k.p.l. ka fark hain! Dianandin istemaal mein Sonet unnis k.p.l. ka mileage deti hain, jahan Thar sirf bara k.p.l. ka mileage degi. Diesel-Automatics ke ARAI mileage mein sade-paanch kpl ka fark hain. Vaastav mein, Sonet lagbhag satrah k.p.l. ka mileage deti hain jahan Thar das-se gyarah ka mileage degi. Yane ke salaana pandrah hazaar kilometre ke running-ke-hisaab-se, aap ko paanch-saat-saal mein, Thar ke diesel pe, Sonet se do laakh rupay jyada kharch karne padenge. Petrol-models ke ARAI mileage mein bhi saat k.p.l. ka fark hain. Dainandin istemaal mein Sonet-petrol mushkil se bara k.p.l. ka mileage deti hain, wohin Thar jyada-se-jyada saat k.p.l. ka mileage degi. Yane ke paanch-saat saal mein Thar-petrol pe aap ko das-bara laakh rupay kewal uske petrol pe kharch karwayegi.


Andruni Jagah aur Comfort:

Model

Boot-space

Length

Width

Height

Thar

100 fold 400

3985

1820 (AX), 1855 (LX)

1920 (Soft), 1844 (Hard)

Sonet

392

3995

1790

1610

Sonet ki lambai Thar se aadha-inch jyada hain aur chaudaai Thar se ek inch kam. Lekin Thar ka yaatri kaksh Sonet se kaafi chota hain. Aisa kyon? Kyonki Thar ka engine Sonet se kaafi bada hain aur wah longitudanally-mounted hain - yane ke dakshin-uttar, jabki Sonet ka transverse mounted hain - yane ke poorab-paschim. Iss wajah se Thar ka engine-kaskh Sonet se kaafi bada rakhna pada hain, aur yaatri kaksh ke liye bahutahi kam jagah reh gayi hain. Iski wajah se Thar ke rear-seat ka sab-se jyada nuksaan hua hain. Usmein sirf-sur-sirf do yaatri hi baith paate hain. Teesra yaatri bithaane ki koi gunjaaish nahin. Thar ki ek aur dikkat ye hain, ke uske bade-bade-payyon ke liye, usmein bade-bade wheel-wells rakhne pade hain, aur yah wheel-wells theek uski pichli-seat ke bagal mein sthit hain. Nateeja ye ke Thar ke rear seat ki chaudaai bahutahi kam karni padi hain. Iske vipareet Sonet ki pickhi seat pe teen hatte-katte yaatriyon ke liye paryaapt leg-room, knee-room aur head-room uplabdh hain. Oopar se ye mat bhoolna ke Thar ki pichli seat ke liye alag se darwaaje maujood nahin hain. Unmein ghusne ke liye kaafi kasrat karni padti hain. Rahi baat bootspace ki, toh Sonet ka boot apne shreni ka sab-se chota boot hone ke bawajood wah Thar se chaar-guna bada hain!


5. Tikaupan aur Service:

Sonet jis platform pe bani hain, yane ke Hyundai Venue, wah apne shreni ki sab-se tikau aur bharausemand gaadi saabit ho chuki hain. Doosri aur Mahindra ki sirf Bolero-Scorpio mein wah bigaad kaboo mein rakh paaye hain, kyonki Mahindra ka dhanda in do gaadiyon pe nirbhar hain, isliye unhone unke aadhe-aadhik bigaad sudhaare hain aur teesri Marazzo jo Mahindra ne America mein vikasit ki hain, unke desi R&D mein nahin. In teeno ke alava baaki saari Mahindra gaadiyon mein dher saare bigaad maujood hain, khaas kar unki saari nayi gaadiyaan jaise TUV, KUV ityadi. Ab Thar mein mahindra pehli baar naya petrol engine le aaya hain aur uski four-wheel-drive-system, saare body panels aur adhiktar electronics poori tarah se naye hain, isliye unmein bigaad aane ki sambhavana kaafi jyada hain. Toh doston josh-mein-aa-kar hosh mat kho dena, aur agle paanch che mahine Thar ki delivery mat lena. Pehle team-bhp jaise forums pe Thar grahakon ko milnewaale bigaad padhte rehna aur jab aap ki tasalli ho jaaye ke Mahindra ne unko sudhaar diya hain, tabhi ye gaadi khareedne ka phaisla karna. 


Pakad Santulan:

Model

Tyre Size

Wheelbase

Ground Clearance

Variant

Thar

255/65R18

2450

226

LX

Thar

245/75R16

2450

219

AX

Sonet

195/65R15

2500

211

HTE

Sonet

215/60R16

2500

211

HTK, HTK+, HTX, HTX+, GTX+

Doston, sirf bade-payye hone se suspension comfort acha hoga aisi galatfehmi mein kabhi mat rehna. Yahan par, Thar mein Sonet se kaafi-bade payye lage hue hain, lekin phir bhi usmein yaatriyon ko teevr jhatke lagte hain, jitne Sonet mein nahin lagte. Aisa kyon? Iski wajah hain Thar ka chota wheel-base - yane ke agle-aur-pichle payyon ke beech ki doori, jo Sonet se do-inch kam hain. Chota wheelbase waali gaadiyon mein gaddhon pe yaatri jyada uchalte hain. Lekin ye iklauti wajah nahin hain. Iske alava, ek-aur-badi wajah hain Thar ki ladder-frame chassis, jiski wajah se uski oonchai hadd-se-jyada hoo gai hain. Aur oonchai jyada hone se aati hain body-roll ki samasya - yane ke modh lete waqt gaadi daaye baaye dolti hain. Iske kaaran gaadi ka santulan jaldi khone ki sambhavana badh jaati hain aur gaadi-palatne ka darr hamesha rehta hain. Iss museebat se bachne ke liye engineers ko gaadi ka suspension sakhth karna padta hain, jisse ride-quality kharaab ho jaati hain. Aur-toh-aur, gaadi-oonchi-hone se handling bhi utna hi bigad jaata hain - kyonki gaadi ka C.G. yane centre-of-gravity oopar aata hain, jiske kaaran gaadi tez-raftaar pe aur modhon pe achi pakad-aur-niyantran nahin rakh paati. Iske viparit, monocoque chassis-waali Sonet kaafi jyada chapalata se dishabadal kar paati hain. Lekin Sonet ek pharji-SUV hain, kyonki wah front-wheel-drive gaadi hain, jo off-roading mein Thar jaisi four-wheel-drive aur low-ratio-gearbox aur uske oopar mechanical locking rear differential waali sacchi-S.U.V ke aas-paas bhi nahin hain.   


Antim Nirnay:

Toh doston, jis sawaal se humne ye tulana shuru ki thi, kya wakai mein nayi Thar, shehri sadkon pe, dainandin istemaal ke liye, lagbhag saari aadhunik SUVs jitni achi ho gayi hain? Jawaab hain - bilkul bhi nahin! Agar top-end-Thar ki keemat das-laakh ke neeche hoti, jaise Jimny ki hone-waali hain, toh maamle alag ho jaata, lekin pandrah laakh mein Thar khareedna bilkul bhi uchit nirnay nahin hain. Aaj market mein pandrah laakh rupay ko top-end Thar se pacchis features jyada mite hain aur wo bhi aise lajawaab features jo un gaadiyon ko Thar se kai guna jyada comfortable aur asaan banate hain, jaise Ventilated Seats, Front Parking Sensors, Hill Hold, Android Auto ityadi.. Lekin sirf features pe baat khatam nahi hoti. Pandrah laakh mein aaj Thar se takreeban bees-pratishat behtar pick-up milta hain, tees-pratishat behtar andruni jagah milti hain, chaalis pratishat behtar mileage milta hain, aur teen-sau pratishat behtar bootspace milti hain! Aur toh aur, behtar pakad, araamdyak suspension aur lajawaab tikaupan athwa Service bhi milti hain. Kul milakar ye nayi Thar le kar aap ghar-se-office pahunch gaye toh aap ke colleagues aap ko ‘macho’ kam aur ‘buddhu’ jyada kahenge, jaise aaj wah bullet waalon ko kehte hain!