Innova Crysta Discount Offer


Click on the above image to get even more Discount on Celerio or click here

Doston aaj Toyota ne, khaas CarComparos darshakon ke liye, Innova Crysta pe 55,000 - 75,000 rupay tak discount ghoshit kiya hain, jiski link yahan, aap ke screen pe hain. Agar aap Innova Crysta khareedna chahte ho, toh iss avsar ka laabh jaroor uthayiye!

Intro:
Namashkaar doston! Aaj hum aap ko Innova Crysta ki kuch aisi khoobiyaan batayenge, jo usey Kia Seltos se behtar gaadi banaati hain! Mana ke Seltos mein bhi aisi kuch khoobiyan hain, jo Innova mein maujood nahin hain, jinke baare mein hum aap ko isi video mein aage bataane waale hain. Lekin aaj, bees laakh de-kar jo grahak Seltos ka top-end model khareed rahe hain, unhe hum Crysta Automatic ka paryaay yaad dilana chahte hain, jo top-end Seltos ki keemat mein milta hain! Toh doston aaiye dekhte hain ke Seltos aur Crysta ke pros aur cons kya hain, yane ke unki khoobiyaan aur khaamiyaan kya hain CarComparos ke iss sansani khez video mein…

1. Diesel-Automatic ka Pick-up:Aaj Crysta ke 55% grahak uska diesel-automatic model kharidte hai. Yane ke iss shreni mein automatic models, manual se jyada lokpriy ho chuke hain. Aur jab diesel-automatics ki baat aati hain, toh Crysta mein aap ki Seltos se 1300 cc bada engine milta hain! Power bhi Seltos-diesel se 59 hp jyada hain aur torque 110 Nm jyada! Mana ke Seltos ka wajan Crysta se 500 kg halka hain, lekin uske bawajood Crysta ka pickup Seltos se saaf saaf behtar hain. Smoothness ke maamle mein Crysta ka engine thoda truck-jaisa hain, lekin iske baare mein hum aage baat karenge..

2. Rear Wheel Drive:Kacche raaston par Crysta ki pakad aur niyantran Seltos se saaf-saaf behtar hain, kyonki Innova Crysta rear-wheel-drive gaadi hain aur Seltos front-wheel-drive! Matti aur keechad mein Crysta ke phas-jaane ki sambhavana, Seltos se kai guna kam hain. Toh doston, agar aap ko graameen ilakon mein, kacche raaston par, apni gaadi le kar jana padta hain, toh Seltos ki taraf dekhna bhi mat. Oopar se Crysta ke lambe-wheelbase aur naram suspension ki badaulat, wah gaddhon aur speed-breakers ko bhi Seltos se thodi-si behtar sokh leti hain…

3. Saat Seats:Crysta ka Seltos ke oopar sab-se bada faayda hain uske do-extra seats. Crysta ki sab-se pichli seats, market ki adhiktar seven-seaters se saaf saaf behtar hain. Usmein avsar-kad ke do yaatriyon ke liye paryapt, leg-room, knee-room aur head-room uplabdh hain. Aur-toh-aur, Crysta ki saat seats ke peeche, achi-khaasi teen-sau litre ki bootspace uplabdh hain, jo paanch-seat waali Seltos se sirf ek-sau-tees litre kam hain. Aur aap ne Crysta ki pichli seats fold kar di, toh aap ko saat-sau litre ki vishaal boot-space mil jaati hain! Interiors ke maamle mein dono gaadiyaan behat majboot aur ucch-darje ke interiors deti hain, lekin design ke maamle mein Seltos ke interiors Crysta se jyada aadhunik lagte hain, iss baat mein koi sandeh nahin…

4. Features:Mana ke Crysta mein Seltos jitne features toh uplabdh nahin hain, lekin phir bhi do-teen aise features mil rahe hain, jo Hyundai-aur-Kia Seltos mein dena bhool gaya hain. Pehla feature hain Driver's knee airbag, jo accident ke waqt, sirf front airbag ke mukaable, chalak ko kai guna jyada surakshit rakhta hain. Doosra feature hain soft-close tailgate - yane ke dikki ka darwaja jor se patakne ki koi jaroorat nain, sirf use neeche kheech lo, gaadi apne-aap use aakri ka ek inch kheech leti hain aur lock kar deti hain!

Toh doston Crysta ke Seltos ke oopar kya faayde hain ye toh aap ne dekh liye. Ab ye dekhte hain ke Seltos mein aise kaunse faayde hain, jo Crysta mein maujood nahin?

1. Features:
Sharam aani chahiye Toyota ko ke bees-laakh rupay mein jo Crysta ka model milta hain, usmein samaan keemat waali Setos se poore paintees-features kam milte hain! Pehla feature hain, Ventilated Seats, Doosra hain, Front Parking Sensors, jo oonchi bonnet waali gaadiyon mein behat jaroori hote hain . Teesra feature hain three-sixty degree camera system, jo parking karte waqt gaadi ke chaaro taraf ka drishya dikhaata hain. Chautha feature hain AndroidAuto aur Apple CarPlay jo aaj paanch laakh ki gaadiyon mein aa chuka hain, lekin Crysta mein nahin milta. AndroidAuto aur Apple Carplay ka navigation aur connectivity, gaadi mein lagi infotainment se sau guna behtar kaam karte hain. Paanchwa feature hain Electric Sunroof, jo Ford EcoSport aur Honda WR-V jaisi sasti-sasti SUVs mein milta hain, lekin Crysta jaisi mehengi gaadi mein nahin. Chautha feature hain Heads-up-display, matlab speedo-meter ke oopar laga hua ek kaanch ka tukda, jispe projector ki tarah raftaar aur navigation ki jaankaari dikhti hain, taaki chalak ko raaste se nazar hataaye bina ye jaankaari dikhti rahe. Saatwa feature hain ‘Bose’ jaise mashoor brand ne ki hui audio-tuning, jinke sab-se saste headphones bhi bees hazaar rupay ke neeche nahin milte! Nauwa feature hain Connectivity-suite, jisse aap apne mobile se gaadi ka engine aur saath mein uska AC ‘On’ kar sakte ho, taaki dhoop mein khadi gaadi bhi aap andar baithne se pehle thandi ho jaaye! Iske alava bhi Seltos mein aise paanch saat features hain, jo Crysta mein nahin milte, jinki poori list aap yahan screen par dekh sakte hain.

2. Indhan ka satyanaash - yane ke pick-up aur mileage ki ek-saath tulana:Seltos-diesel ka pick-up Crysta-automatic se kamjor hain, lekin Seltos ke paas turbo-petrol model bhi maujood hain, ye baat yaad rakhna! Seltos-turbo-petrol toh Crysta-automatic se bhi tez pick-up deti hain, jiski pehli wajah ye, ke uska lajawaab power-to-weight ratio, jo Crysta se bees pratishat behtar hain, aur doosri wajah ye, ke Seltos turbo-petrol ka dual-clutch gearbox Crysta ke paarampaarik torque-convertor se behat tez gear badalta hain! Lekin yahan par baat khatam nahin hoti. Kyonki Seltos-turbo-petrol ka mileage bhi Crysta diesel-automatic se do k.p.l. behtar hain. Matlab Seltos-turbo se kamjor pick-up hone ke bawajood Crysta ko usse kaafi jyada indhan jalaana padta hain! Isse aap ke paise toh barbaad hote hi hain, lekin agar aap ko paison ki koi chinta nahih toh kam-se-kam paryawaran ki toh chinta karo.

3. Pakad aur Niyantran:Apne market mein phaili hui sab-se badi galatfehmiyon mein se ek ye hain, ke body-on-frame banawat waali gaadiyaan behtar off-roading kar sakti hain. Vaastav mein vishwa ki sab-se kaabil off-roaders ek-ek karke monocoque prakaar ki chassis apna rahi hain. San do-hazaar-do se Range Rover monocoque ho chuki hain, aur kuch din pehle toh sab-se-kattar-off-roader maani jaanewaali Land Rover Defender bhi monocoque ho gayi! Apne desh ke kuch utpadakon ke paas apni gayi-gujari SUVs monocoque karne ki kshamata aur himmat nahin hain, isliye wah ladder-frame ki jhoothi-majbooti aur off-roading kshamata ka vehem phaila rahe hain! Ye phaila hua vehem mitaane ki mehnat karne ke bajay, Toyota jaise raees utpadak, dono prakaar ki chassis waali gaadiyaan vikasit karte hain, jaise ladder frame waali Innova Crysta aur Fortuner aur monocoque-chassis waali Siena-MPV aur Raav-four-SUV.

Lekin Bharatiy market mein monocoque waale saare paryaay nahin le aate, sirf ladder-frame waale le-aate hain. Matlab, ladder-frame-SUVs ke bewakoof aashiq apne market mein Siena aur Raav-four jaisi lajawaab gaadiyon ko aane se rokh rahe hain, ye baat kabhi mat bhoolna. Toh ladder-frame chassis ka faayda kuch nahin ismein koi sandeh nahin, lekin nuksaan kya hain ye dekhte hain. Ladder frame chassis ki wajah se gaadi ka wajan be-faaltu-mei badh jaata hain, jisse pick-up aur braking dono ka nuksaan hota hain. Oopar se ladder frame gaadiyon ka CG - yane ke centre of gravity kaafi ooncha rehta hain. Iski wajah se ladder-frame gaadiyan body-roll se pareshaan rehti hain. Iski wajah se modhon par Fortuner ki pakad aur niyantran bahutahi wahiyaat lagta hain. Uske mukaable Seltos ka pakad-santulan kai guna behtar lagta hain.

4. Smoothness:Waayu pradooshan ke saath-saath Crysta kaafi jyada dhwani pradooshan bhi karti hain! Bees laakh rupay ki keemat ke hisaab se Crysta ka smoothness kaafi kharaab hain. Andar baithe yaatriyon ko engine aur drive-line ka kaafi shor sunai deta hain aur hadd toh ye, ke vibration bhi mehsoos hote hain, jo itni mehengi gaadi ke liye wakai mein badi sharmnaakh baat hain. Iske vipareet Seltos ka smoothness alag starr pe pahunch gaya hain! Sirf petrol-Seltos hi nahin balki Diesel-Seltos bhi kamaal ki smooth aur shaant ho gayi hain. Gaadiyon ki banawat aur smoothness ke maamle mein Hyundai-aur-Kia din-ba-din German Luxury Cars ke kareeb pahunch rahi hain doston!

Antim Nirnay:Doston in dono gaadiyon mein se aap ke liye kaunsi gaadi jyada uchit paryaay hain, ye tay karne se pehle aap ko khud ki jaroorat ko theek se parakhna padega. Agar aap wakai mein har hafte, ya kam-se kam har mahine mein saat-yaarti gaadi mein bithaane waale ho, tabhi Crysta lene mein faayda hain. Aaj market mein saat-seater gaadiyaan khareedne-waale adhiktar grahak, saal mein ek baar lambi-sair par jaate hain, jab unke saare seats kaam aate hain aur bacha hua poora waqt wah seats khaali padi rehti hain. Agar aisa honewaala hain, toh uss ek trip ke liye Zoomcar se Innova kiraye pe le lo! Aur bache hue saare din, atyaadhunik features, behtareen pick-up aur badhiya mileage ka faayda uthao! Aaj market mein saat-seats ka upyog karne waale grahak bahutahi kam hain. Adhiktar grahakon ke liye paanch-seat aur Seltos mein milne waali boot-space unki jaroorat ke hisaab se kaafi hain. Aur isi liye Seltos humaari iss tlana ki nissandeh vijeta hain.