Celerio Discount Offer


Click on the above image to get even more Discount on Celerio or click here

Doston aaj Maruti-Suzuki ne, khaas CarComparos darshakon ke liye, Celerio pe chaalis-hazaar rupay tak discount ghoshit kiya hain, jiski link yahan, aap ke screen pe maujood ‘i-button’ mein di hui hain. Agar aap Celerio khareedna chahte ho, toh ye iss avsar ka laabh jaroor uthayiye!

Intro:
Doston aaj hum maruti ki piddu-si-SUV, ‘S-Presso’ aur uske samaan keemat mein milne waale Celerio models ki tulana karenge.

Keemat aur Features:
Celerio ka base-model - yane ke LXi, S-presso ke top-end model se sirf das hazaar rupay sasta hain! Matlab samaan keemat mein aap ko S-presso mein saat-aath feature jyada milte hain, jaise Touchscreen-Navigation System with AndroidAuto and Apple CarPlay ityadi, jiski poori jaankaari aap yahan screen pause kar ke dekh sakte hain. Lekin, asli sharam ki baat toh ye hain, ke Celerio LXi mein chaabi-wala Central Locking, Front Power Windows aur Internally Adjustable Mirrors jaise mamooli features bhi nahin milte! Galati se bhi Celerio ka LXi-model kabhi mat khareedna! Usse sirf tees hazaar rupay jyada de kar aaj Celerio VXi mil rahi hain. Yane ke sirf che-sau rupay jyada EMI de-kar aap Celerio LXi ke bajay VXi model le sakte ho. Toh aayiye dekhte hain, VXi aur S-presso ki tulana mein kya hota hain. VXi mein kam-se-kam chaabi-waala central locking toh milta hain, lekin remote waala nahin milta, jo S-presso mein milta hain! Lekin uske badle, Celerio VXi mein Rear Power WIndows milti hain, jo top-end S-presso mein nahin milti. Iska matlab, Celerio VXi aur top-end S-presso mein sirf ek feature ka fark hain, jo hain Infotainment System. Kya sirf Infotainment system ke liye, Celerio ke bajay S-presso khareedna behtar nirnay hain? Iske baare mein hum aage vistaar mein baat karenge… Lekin filhaal ye dekhte hain, ke Celerio ZXi aur top-end Spresso ki tulana mein kya hota hain… ZXi ki keemat, top-end S-presso se pachaas hazaar rupay mehengi hain. Lekin usmein Rear-Wash-Wipe-Defogger, Electrically Adjustable Mirrors aur Tilt Steering jaise features milte hain, jo top-end S-presso mein bhi nahin milte. Celerio ZXi-plus toh S-presso se lagbhag ek-laakh rupay mehengi hain, lekin usmein Celerio ZXi se bhi jyada features mite hain, jaise Alloy Wheels, Fog Lamps, Height Adjustable Driver’s Seat ityadi..

Pick-up aur Smoothness:Dono gaadiyon mein Suzuki ka hazaar cc, K10 engine maujood hain, lekin S-presso ka wajan Celerio se chaalis-pachaas kilo halka hain! Iss wajah se S-presso ka pick-up halka-sa behtar hain. Lekin dono gaadiyon mein low-r.p.m. pe kamjor pick-up ki samasya hain. Rahi baat automatics ki,Celerio aur S-presso, dono ka AMT behat smooth aur tez hain iss baat mein koi sandeh nahin. Dono gaadiyon ke AMT models, manual variants se takreeban pachaas hazaar rupay mehenge hain.

Mileage:S-Presso ke manual athwa automatic model ka ARAI mileage Celerio se lagbhag ded-k.p.l. kam hain! Lekin dainandin istemaal mein aap ko dono gaadiyon mein koi bhi fark nahin milega. Dono gaadiyaan takreeban sola k.p.l. ka mileage dengi. Celerio mein CNG model bhi uplabdh hain, jiska ARAI mileage hain battis kilometre prati KILO! Dainandin istemaal mein aap ko pacchis kilometre prati kilo ka mileage milta hain. Saalana pandrah hazaar kilometre ke running ke hisaab se, Celerio CNG aap ke lagbhag dhai-laakh rupay bachayegi! Lekin aap ko boot-space aur pick-up ki kurbaani deni padegi, aur EMI bhi petrol model se ded-hazaar rupay jyada dena padega, itna yaad rakhna..

Andruni jagah aur Comfort:Celerio, S-presso se paanch-inch lambi aur teen-inch chaudi gaadi hain. Nateeja ye, ke S-presso ke bheetar, Celerio se thodi-si kam andruni jagah uplabdh hain. Dono gaadiyon mein chaar yaatri araam-se baith sakte hain. Lekin jab paanch yaatri bithaane ki baari aati hain, toh Celerio mein behtar shoulder space milti hain, isliye pichli seat par teen yaatri jyada araam se baith paate hain. S-presso ki leg-rooma aur knee-room Celerio ke samaan hain. Oopar se S-presso ki rear seats bhi Celerio se jyada araamdaayak hain! S-presso ka seat-base Celerio se ooncha hone ke kaaran uska under-thigh support Celeriose saaf-saaf behtar hain, aur saath mein bujurg yaatriyon ko gaadi mein baithna aur utarna bhi jyada asaan rehta hain. Rahi baat boot-space ki, toh iss maamle mein bhi S-presso mein Celerio se halki-si behtar andruni jagah milti hain! Interiors ke maamle mein bhi S-presso, Celerio se jyada taazi aur aadhunik lagti hain, lekin thodi bachkaani lagti hain. Saare grahakon ko aise interiors ache nahin lagte, kuch grahak Celerio ke paarampaarik interiors hi jyada pasand karenge.

Pakad aur Suspension:S-presso, Maruti ke heartect platform par bani hain, jo Celerio ke A-star waale platform se pachaas-saath kilo halka hain, lekin usse kai guna kada aur surakshit hain! Aj kal kai saare bewakoof log, heartect pe bani gaadiyon ka wajan dekh kar, apne chote-se dimaag mein, aisa ‘strength-analysis’ karte hain, jo chassis-designers ke computer nahin kar paate! Crumple-zone kya hota hain, bumper pichakne se kya faayda hota hain, ye saari baatein inke samajh se baahar hain. Lekin phir bhi ye mooh-fatt log, teen-ka-dabba, maachis-ki-dibbi chilla-chilla kar, market mein galatfehmiyaan phailane ki koshish kar rahe hain! Agar aisa koi akalmand aap ko mil jaaye toh use samjha dena, ke Heatect pe bani saari gaadiyan Bharatiya crash norms mein pass ho chuki hain. Phir unko ye batana ke unki-pyaari, athra-sau kilo ki, ‘Scoprio’, global-N-cap test mein phail hui thi. Aur aisi burhi tarah se phail hui thi, ke uska A-pillar toot gaya tha, matlab Scorpio ka das-airbags waala model bana kar bhej dete, to bhi wah crash test phail ho jata! Isliye saat-sau-chabbis kilo ki S-presso lene mein bhi safety ki koi dikkat nahin hain, ye baat yaad rakhna. Platform ke alava, dono gaadiyon mein kai saare chote chote fark hain. S-presso ka wheelbase - yane ke agle aur pichle payyon ke beech ki doori, Celerio se do inch kam hain. Lekin S-presso ka ground-clearance Celerio se aadha-inch ooncha hain. S-presso ka suspension, Celerio se kaafi sakhth hain, iss wajah se wah gaddhon aur speed breakers ko Celerio jitni ache se sokh nahin paati. Darasal dikkat ye hain, ke S-presso ki oonchai ki wajah se, usmein body-roll ki samasya maujood hain, matlab modhon par wah kaafi-jyada daaye baaye dolti hain. Iss samasya ko kaaboo mein rakhne ke liye, Maruti ke engineers ne uska suspension sakhth bana diya hain. Body-roll ki wajah se, modhon par uska pakad-niyantran bhi Celerio jitna acha nahin hain. Khurdare raaston par S-presso mein kaafi tez jhatke lagte hain. Lekin Celerio gaddho ko kaafi achi tarah se sokh leti hain. Touchscreen-waali infotainment se sau-guna jyada mahatwapoorn pehelu hain ye jaroor yaad rakhna.

Quality aur maintenance:Pichle chaalis saal mein Suzuki ne ye saabit kiya hain ke unki halke se halki gaadiyan bhi saalon saal bina kisi bigaad ke, bina jyada maintenance ke chalti rehti hain. Iss wajah se aaj bhi unki aath-sau kilo ki, chaar-paanch gaadiyan, har mahine das-hazaar se jyada units bikti rehti hain. Unke spare parts aur service ka kharch bhi kaafi kam hota hain, aur Maruti ke teen hazaar service centres ki badaulat, in dono gaadiyon ke service-centres, desh ke kone kone mein uplabdh hain. Dono ke maintenance ka kharch lagbhag ek-samaan hi rahega. Itna hi nahin, paanch-saat saal baad, jab aap ye gaadiyaan second-hand market mein bechne jaoge, tab aap ko, dono gaadiyaan, lajawaab resale-value dilayegi, iss baat mein koi sandeh nahin!

Antim Nirnay:Doston yahan par hum aap ko sawadhaan karna chahenge, ke Touch-screen ke chakkar mein galat gaadi khareedne se khud ko bacha lo! Toucscreen ke alava, Celerio VXi aur top-end S-presso mein aap ko bilkul ek-samaan features milte hain. Touch-screen toh accessory ke roop mein bhi uplabdh hain, aur wo bhi khud Maruti ke showroom mein, toh warranty paane mein bhi koi dikkat nahin hogi. Lekin Celerio mein aap ko chaudi rear-seat milti hain, jyada comfortable suspension milta hain aur behtar pakad-niyantran milta hain, jo S-presso khareednewaale, apni gaadi mein kabhi nahin laga sakte. Aur yahan par baat khatam bhi nahin hoti, kyonki S-presso abhi-abhi launch hui hain, uspe ek-mahine ka waiting period chal raha hain, isliye discount milne ki koi gunjaish nahin, jabki Celerio pe aaj Maruti seedhe chaalis hazaar ka discount de raha hain, jo oopari variants pe toh aur bhi jyada badh sakta hain! Kul milakar Celerio VXi aap ko touch-screen lagaane ke baad bhi S-presso se sasti mil sakti hain! Aur aisi paristhiti main wah S-presso se saaf-saaf behtar gaadi hain, aur humaari iss tulana ki vijeta bhi.