Triber vs Ertiga Hindi 4 Pros & Cons ट्रायबर v/s अर्टिगा


Aaj hum aap ko nayi Renault Triber ki aisi paanch khoobiyaan batayenge, jo uske mukhya pratispardhi, Maruti Ertiga mein maujood nahin hain! Ab iska matlab aisa nahi hai ke Triber, Ertiga se behtar gaadi hain. Iss liye, humnein isi video ke aakhir mein Ertiga ki bhi aisi saari khoobiyaan batayi hain, just Triber mein milti nahin. Toh doston aayiye dekhte hain, Renault Triber aur Maruti-Suzuki Ertiga ke faayde aur nuksaan kya hain…

T1. AMT
Reanult ne Triber mein di hui sab-se badi khoobi hain Triber ka AMT-automatic gearbox. Aaj Ertiga ka sab-se sasta automatic model, jo hain VXi-AT, uski keemat hain sade-das laakh rupay on road dilli. Triber ka automatic model isse teen-laakh rupay sasta toh jaroor hoga. Oopar se Etriga mein pracheen, four-speed, torque-convertor prakaar ka,  gearbox maujood hain jo behat dheeme-se gear badalta hain aur mileage ka bahut nuksaan karta hain! Iske viparit Renault ke Kwid AMT mein hum ye dekh chuke hain, ke wah behat tez gear badalta hain aur ARAI ke test mein toh manual model se bhi ek k.p.l. behtar mileage de chuka hain! Humare vishleshan ke dauraan Ertiga Automatic ne 11- 12 k.p.l ka mileage diya tha, jabki Triber AMT aap ko kam-se-kam 16-17 k.p.l. ka mileage degi! Nateeja ye, ke saalana pandrah hazaar kilometre ke running ke hisaab se, paanch saat saal mein aap ko Ertiga AT ke petrol pe Triber AMT se ded laakh rupay jyada kharch karne padenge!

T2. Keemat aur Features:
Aaj ki tareekh mein Ertiga ki keemat shuru hoti hain 8.40 lac se, on road dilli. Triber isse takreeban 3 laakh rupay sasti ho sakti hain. Aur Renault-Nissan ke liye koi nayi baat nahin hain. Wo toh aaj bhi saat-seaton waali Datsun Go Plus, 06 laakh mein bech raha hain AC aur Power Steering ke saath. Oopar se Go Plus toh bani hain Nissan ke 'V' platform pe yane ke Micra, Sunny, Renault Pulse aur Scala ke platform pe jo kaafi mehenga platform hain. Triber bani hain unke CMF-A platform pe, yane ke Kwid ke platform pe, jo bahutahi sasta platform hain. Nateeja ye hoga, ke 8.50 laakh mein Triber ka top-end model ayega, jismein aath inch ki touchscreen waali Infotainment System bhi milegi aur ye gaadi Ertiga ke base model ka jeena haram kar degi..

T3. Chapalata aur Niyantran
Ertiga ka wheelbase, yane ke agle aur pichle payyon ke beech ka antar nau foot ka hain, jo ke bahut hi lamba hain. Ertiga ki lambai bhi lagbhag sade-chaudah foot ki hain. Isse shehri sadkon par U-turn lete waqt kaafi dikkat aati hain. Triber ki lambai usse das inch kam hain aur wheelbase bhi chaar inch kam hain. Isliye U-turn lete waqt aur usse bhi jyada jaroori, parking karte waqt Triber, Ertiga se kaafi aasaan rehti hain. Lekin Renault ne paaye bilkul Ertiga jitne hi bade diye hain aur tyres bhi Ertiga jitne hi chaude diye hain. Oopar se ground clearance toh Ertiga se do mm ooncha diya hain. Nateeja ye ke modhon par Triber Ertiga jitni hi badhiya pakad banaye rakhegi lekin jyada chusti aur phoorti se disha badal kar payegi! Itna hi nahin, tooti-phooti sadkon par neeche se ghisne ki sambhavana bhi Ertiga se kam rahegi!

T4. Interiors:
Renault ne Kwid ke interiors ki market mein jo alochana hui wo bahut hi dil pe le li! Isliye Triber banate waqt Renault ne interiors pe khaas dhyaan diya hain! Triber ka aadhunik, dual-tone dashboard design, upholstery ki gunwatta aur trims ki banawat dekh ke wah Ertiga se ek rupay sasti gaadi bhi nahin lagti! Oopar se jab samaan keemat ke models ki tulana hogi tab ek taraf Ertiga ka bilkul khaali, bina features wala interior rahega aur Triber ka saare features se bhara hua top model. Phir to Ertiga LXi, Triber RXZ ke saamne bahut hi pheeki padne waali hain.

Mid-ro
Toh doston Triber ke Ertiga ke oopar kya faayde hain ye toh aap ne dekh liya. Toh ab ye dekhte ke Ertiga mein aise kaunse faayde hain, jo Triber mein maujood nahin?


E1. Andruni Jagah aur Comfort:
Ertiga ki lambai, Triber se achi-khaasi ek-foot-chaar-inch lambi hain. Mana ke Ertiga ka engine kaksh, Triber ke engine kaksh se bada hain, kyonki usmein Triber se ded guna bada engine maujood hain. Lekin iske bawajood Ertiga ka yaatri kaksh Triber se aath-das inch lamba hain. Nateeja ye ke Ertiga ki saari seats mein Triber se behtar leg-room aur knee room milti hain. Oopar se Ertiga ki sabse-pichli seat mein bhi recline adjustment di hui hain, jo Triber mein maujood nahin hain. Aur boot-space bhi Triber se sau-litre behtar milti hain. Triber mein lagbhag puraani Ertiga jitni andruni jagah uplabdh hain, yane ke sade-paanch foot oonchai ke saat yaatrion ko paryapt jagah uplabdh hain, lekin che-foot ke saat yaatri usmein nahin baith sakte. Magar nayi Ertiga mein aaj che foot ke saat yaatri bhi ache-se baith sakte hain.

E2. Pick-up aur Smoothness
Ertiga ka naya ded-litre engine wakai mein badhiya pick-up deta hain. Uska power-to-weight ratio toh Triber se bees pratishat behtar hain, isliye high-r.p.m pe uska pick-up Triber se kaafi behtar hain. Lekin isse bhi jaroori baat ye hain, ke low-r.p.m. pe Triber ka pick-up Ertiga se bahutahi kamjor rahega. Oopar se gaadi mein saat bande baithe ho, to phir aap ko dono ke pick-up mein zameen aasmaan ka fark mehsoos hoga, itna jaroor yaad rakhna. Aur-toh-aur, smoothness ke maamle mein Renault ka three-cylinder engine, Suzuki ke makkhan jaise smooth K-fifteen ki barabari kabhi nahin kar sakta.

E3. Mileage
Ertiga ke automatic model ka mileage jitna burha hain, utna hi manual model ka mileage acha hain. Humare vishleshan ke dauraan usne humein chaudah-se pandrah k.p.l. ka mileage diya tha. Triber-manual aap ko sola-se-satrah k.p.l. ka mileage degi aisa humara anumaan hain. Iski pehli wajah hain ke Renault ko saat yaatriyon ka wajan ddhone ke liye Triber ka gearing kaafi tez rakhna padega - yane keengine ko Ertiga se kaafi oonche r.p.m. pe chalana padega, jisse mileage pe asar jaroor hoga aur doosra kaaran ye - ke Kwid mein humein kabhi acha mileage nahin mila hain - jiski wajah ye ke Suzuki ko pichle-tees saal se, petrol ki ek-ek-boond-se jo mileage nichodne ka tajurba hain, utna Renault ko nahin hain.

E4. Tikaupan aur Service:
Suzuki ki gaadiyon ne pichle tees saal mein apna tikaupan saabit kiya hain. Doosri aur, Renault ki CMF-A platform ki gaadiyon ka tikaupan bilkul bhi acha nahin rahaa hain. Shuruwaat mein toh Kwid mein dher-saare bigaad paaye gaye the. Ab unmein se aadhe bigaad Renault ne sudhaar diye hain. Magar aaj bhi chaar saal puraani, pachaas-saath hazaar chali hui Ertiga aur Kwid ki tulana ki jaaye, toh Ertiga, Kwid se kai-guna behtar haalat mein mil jaati hain. Triber bhi Kwid ke platform par aadharit hain, isliye uska tikaupan Kwid jaisa hi rahega, is main koi sandeh nahin! Oopar se Maruti ke service centres ki karigari Renault ke se kai guna behtar rehti hain. Aur toh aur, Maruti ke teen hazaar se adhik service centres desh ke kone-kone tak pahunch chuke hain, jabki Renault ke mushkil se do-sau service centres apna diwala nikalne se apne-aap ko bacha paaye hain! Agar aap grameen kshetron mein, Renault ke service centres se saikdo kilometre door apni gaadi istemaal karne waale hain, toh aaj bhi Ertiga khareedne ke alava aap ke paas koi paryaan nahin.

Antim Nirnay:
Doston humari raay pooche toh Triber AMT, adhiktar grahakon ke liye, Ertiga se saaf-saaf behtar paryaay hain. Kyonki desh ke adhiktar grahak shehri traffic mein yatayaat karte hue roj ghanto bitaate hain aur clutch-gear ragad-ragad kar pareshaan ho jaate hain. Oopar se Triber ka top-end automatic model Ertiga ke manual gear waale base model ki keemat mein mil jayega! Lekin bache hue grahak, jinke parivaar ke sadasya oonche kad ke hain, unke liye Ertiga ki andruni jagah jyada maine rakhti hain. Doosre wo grahak jo chote-gaon mein rehte hain, jahan se Renault ka service centre bahut door hain, unke liye Maruti ki dealership paas mein mil jaana jyada maine rakhta hain. Aur aise grahak be-jhijak Ertiga khareedein. Kyonki aap ko gaadi khareedte waqt Triber se jyada paise kyon na dene pade, Ertiga ki resale value bhi Triber se do-teen laakh rupay jyada milegi, matlab lambi daud mein aap ka kharcha Triber ke samaan hi rehne waala hain.

Toh Doston, agar aap ko Triber ke aisi aur gaadiyon se tulana dekhni hain, toh iss video ko ‘like’ karien, taaki humein pata chale ke aise videos ki maang kitni hain. Dhanyawaad!

Comments

CareOCar.com - Ultimate Tyre Resource

More from CarComparos