Thar 700 Vs XUV500 Hindi महिंद्रा थार v/s महिंद्रा XUV 500 हिंदी Comparison Review


Aaj hum Mahindra ki Thar 7OO aur XUV 5OO ki tulana karenge. Toh kyon kar rahe hain hum aisi tulana? Aaj market mein kai saare grahakon ko ye galatfehmi ho gayi hain ke agar  Leh-ladakh jana hain, toh Thar se behtar koi gaadi nahin! Lekin kya wakai mein ye baat sach hain, ya Thar sirf Royal Enfield ki tarah ek dikhawa hain? Haal hi mein Mahindra ne XUV5OO ka base-model market mein launch kiya hain, jiski keemat rakhi hain sirf 12.2Lac ex-showroom Dilli. Doosri aur Mahindra ne Thar ka Special Edition ‘7OO’ naam ka model launch kiya hain, aur neeche ke saare variants band kar diye hain. Nateeja ye ke Thar aur XUV ki keemat ka antar bahut kam ho gaya hain! Isliye ab ye sochna behat jaroori ho gaya hain, ke sirf Thar ki 4WD system ki wajah se wah Leh-Ladakh ki safar mein XUV se behtar saabit hoti hain? Kya XUV leh-ladakh tak nahin jaa sakti? Kya XUV mein Thar se behtar comfort nahin milti? Kya XUV mein Thar jitne yaatri aur samaan nahin baith paata? Kya XUV mein Thar se kam thand aur garmi nahin lagegi? Kya XUV ka pick-up thar se kamjor rahega? Aakhir Thar mein aisi kaunsi baat hain, jiske kaaran log usse Leh-ladakh jaane ki gaadi samajhte hain? Iss sawaal ka vistrit vishleshan janane ke liye dekhte rahiye CarComparos ka nayi Thar vs XUV comparison video...

Keemat aur Features:
Thar 700 ki keemat 11.7 Lac on road Dilli. XUV ka W3-base-model usse 3Lac rupay mehenga hain! Lekin sharm ki baat ye hain ke XUV ke base model mein, Thar ke top-end-special-edition model se aath das features jyada milte hain! XUV W3 mein aap ko Central Locking, Keyless Entry, Power Windows, Tilt Adjustable Steering, Rear Defogger, Mileage dikahne waale display, Rear AC Vents, Electrically Adjustable Mirrors aur Projector Headlamps milte hain, jismein ek bhi features Thar7OO mein uplabdh nahin hain. Thar mein sirf ek aisa feature hain, jo XUV W3 mein nahin milta aur wo hain Scorpio ke puraane design waale Alloy Wheels! Rahi baat XUV ke four-wheel-drive model ki, lekin wo sirf top-end W11-O trim mein maujood hain, jiske kaaran wah bahut mehenga hain - lagbhag baaiis laakh rupay on road dilli.

Pick-up aur Smoothness:
XUV ka engine Thar se 300cc chota hone ke bawajood, usmein Thar se 50 h.p. jyada power milti hain aur 113 Nm jyada torque bhi milta hain! Mana ke XUV Thar se takreeban 200 kilo bhaari hain, lekin iske bawajood XUV ka pick-up Thar se kai guna behtar hain. Smoothness ke maamle mein bhi XUV ka aadhunik m-Hawk engine, Thar ke pracheen dhai-litre engine se behat shreshth hain! Oopar se Thar mein tez raftaar par bahut jyada wind-noise aur tyre-noise aati hain - kyonki Thar ka soft-top sadhaaran gaadiyon ki tarah, gaadi ko bahar ki aawaazon se seal-band nahin rakh paata.

Andruni Jagah aur Comfort:
Andruni jagah aur comfort ke maamle mein toh Thar XUV se bahutahi kharaab hain. Pehli baat toh XUV Thar se kaafi badi gaai hain. XUV, Thar se 2 foot se jyada lambi gaadi hain aur 6 inch se jyada chaudi! Toh jaahir hain, ke XUV ke yaatri kaksh mein Thar se kaafi jyada andruni jagah uplabdh hain. Oopar se XUV ke seats bhi Thar se kaafi jyada araamdayak hain. Thar mein toh sirf agli do seats front-facing hain, uske peeche do side-facing seats maujood hain, jispe chaar yaatri baith sakte hain. Lekin ye bilkul bhi araamdayak nahin hain. Pehli samasya to ye hain, ke side facing seats pe baithe yaatriyon ke ghutne ek-doosre se taktraate hain. Doosri ye ke side-facing seats mein nausea aur ulti hone ke sambhavana kaafi jyada rehti hain. Kyonki front-facing seats mein sirf modhon par aap ka sar daaye-baaye ghoomta hain, lekin side-facing pe seedhe raaste par bhi, har baar brake lagate waqt, yaatriyon ka sar daaye-baaye dolta hain.

Iske viparit XUV mein aap ko saat front-facing seats milti hain, jo sab-se jyada comfortable seating paryaay hain! Agar dono gaadiyon mein paanch yaatri baithe ho, toh samaan rakhne ke liye Thar mein kaafi kam jagah bachti hain, jabki XUV mein 700litre ki boot-space mil jaati hain. Opar se Thar mein ek-aur badi samasya hain, jo hain uska soft-top. Uski wajah se Thar ka AC ki asar kam ho jaata hain. Kyonki wah XUV ki lohe ki body aur chatt, jaise thandi hawa ko andar seal nahin rakh paata. Kul milakar iss sab ka nateeja ye, ke jab aap sach mein leh-ladakh ki road-trip par jayenge, toh XUV ka ye comfort aap ko Thar ke four-wheel-drive system se sau-guna jyada upyukt saabit hoga, itna jaroor yaad rakhna.

Mileage:
Thar saat-sau ka ARAI mileage hain tera dashamlav teen k.p.l. yane ke XUV ke two-wheel-drive, manual-model se do k.p.l. kam aur XUV four-wheel-drive se ded k.p.l. kam! Humare vishleshan ke duraan humein XUV ne lagbhag gyarah k.p.l. ka mileage diya tha, lekin Thar CRDe mushkil se das k.p.l. de paayi thi.

Pakad aur Suspension:
Dono gaadiyaan bilkul alag prakaar ki chassis par bani hain. Thar bani hain Mahindra ki sadiyon puraani laader frame chassis par, jabki XUV bani hain Mahindra ki sab-se pehli monocoque chassis par. Tez raftaar pe XUV, Thar se sau-guna behtar pakad aur santulan banaye rakhti hain, ye baat toh bilkul saaf hain. Iski pehli wajah ye hain, ke XUV ka wheelbase Thar se das inch lamba hain - yane ke uske agle aur pichle payyon ke beech Thar se lagbhag ek foot jyada antar hain. Doosri wajah ye hain, ke Thar ki chassis sirf dikhti XUV se rough-and-tough hain. Vaastav mein XUV Australian NCAP test mein chaar stars ka rating paa kar pass ho chuki hain, jabki Thar ko kisi crash test mein bhejne ki bhi Mahindra himmat nahin kar sakta. Aane waale B.N.V.-sap norms mein Thar pass nahin ho paayi, isi wajah se October mein nayi Thar aa rahi hain, warna Mahindra agle das saal isi Thar ke rang badal-badal ke bechta rehta… Kehne ka matlab ye, ke char-staar rating waali XUV ki chassis Crash-test phail Thar se kai guna jyada kadi aur majboot hain, toh doston, bhool kar bhi, gaadi ki styling dekh kar majbooti ka andaza lagane ki galati mat karo.
Kade chassis ke kai saare faayde rehte hain. Pehla ye, ke gaadi mein roll, pitch aur yaw ki samasya kam rehti hain. Iske kaaran modhon par XUV Thar se behtar pakad aur niyantran banaye rakhti hain. Doosra ye, ke chassis jitni kadi hoti hain, utna suspension naram rakhne ki engineers ko azaadi mil jaati hain. Iss wajah se XUV gaddhon aur speed breakers ko bhi Thar se kai guna behtar sokh leti hain. Thar ka suspension comfort itna ghatiya hain, ke peeche baithe yaatriyon ki toh graameen sadkon par haddi-pasli ek ho jaati hain! Toh doston bade-payye aur chaude tyres waali gaadiyaan gaddhon pe sab-se araamdayak rehti hogi, ye galatfehmi bhi dimaag se hata do! Lekin Thar mein aisi ek khaasiyat hain, jismein XUV uski barabari nahin kar sakti, aur wo hain uski off-roading ki kshamata. Mana ke XUV mein bhi four-wheel-drive model milta hain, lekin moolabhoot roop se wo ek front wheel drive gaadi hain, jo sirf payye phisalne par peeche ki paayon ko ghoomati hain. Oopar se XUV mein koi low-ratio gearbox maujood nahin hain aur na hi Thar jaisa mechanical locking differential. Iss wajah se XUV kabhi bhi Thar ki tarah pahadi-ilakon mein aur chattanon ko laangh nahin sakti.

Quality aur maintenance:
Itne saalon se ya gaadiyan chalti aa rahi hain, phir bhi Mahindra unke adhiktar bigaad sudhaar nahin paaya hain. Ismein sab-se badi samasya ye hain, ke Mahindra apni saari mehnat bigaad sudhaarne ke bajay bigaad chupaane mein laga deta hain! Iska nateeja dikhai deta hain saare tikaupan naapne waale sarvekshanon mein. Jaise JD Power ke VDS aur IQS ye do sarvekshan, jinmein Mahindra ki gaadiyon mein sab-se jyada bigaad paaye jaate hain. Baaki ke JD Power surveys mein Mahindra oopar rehti hain, kyonki wo tikaupan nahin ginate. Sirf VDS aur IQS ye do sarvekshan gaadi ki gunwatta dikhaate hain, kyonki wo seedhe ye dikhaate hain ke har gaadi mein kitne bigaad paaye gaye. Baaki ke saare sarvekshan sirf grahakon ki raay darj karte hain, jisse sirf grahakon ki bhawanaaein pata chal sakti hain, gaadiyon ki gunwatta nahin! Waise toh Thar mein kuch features bhi nahin hain, jo kharaab ho sakte hain, iske bawajood usmein dher saare bigaad paaye jaate hain. Oopar se Mahindra ke service centres pe Mahindra ka koi niyantran nahin hain. Poore desh mein Mahindra ke sirf gine-chune dealerships pe achi service milti hain, baaki jagah pe sirf bill bade-bade banate hain aur bigaad bhi nahin sudhaar paate.

Antim Nirnay:
Aaj market mein Leh-Ladakh jaane ki kshamata SUVs ki izzat ka sawaal ban chuka hain! Humein pata hain ke vaastav mein ek pratishat grahak bhi unki SUVs ko Leh-ladakh le kar nahin jaane waale.Lekin aap chale bhi gaye, toh XUV aap ke liye Thar se kai guna behtar gaadi saabit hogi. Har saal laakho front wheel drive gaadiyan Leh-Ladakh pahunch jaati hain. Agar XUV jaisi gaadi Leh ladakh ki kathor paristhiti jhel sakti hain, toh aap ki dainandin yataayaat kyon nahin jhel sakti? Aap use aisi kaunsi jagah le kar jaane waale hain jahan ki paristhiti Leh-Ladakh se jyada kathor hain? Thar ke grahak use chaar-paayon waali Royal Enfield ki tarah istemaal karte hain, yane ke sirf raub jhaadne ke liye. Warna toh off-roading ki racing karne waalon ke alava koi uski asli kshamata istemaal bhi nahin kar sakta. Bache hue saare grahakon ke liye XUV ka base model, Thar ke Special edition model se sau guna jyada upyukt aur araamdaayak paryaay hain. Aur iss wajah se XUV five-double-oh humari iss tulanaki nissandeh vijeta hain.

Agar aapko Thar saat-sau ki, baki gaadiyon ke saath comparison dekhne mein dilchaspi hain, toh iss video ko ‘like’ karein taaki humein aap ki maang pata chalein. DHANYAWAAD!

Comments

CareOCar.com - Ultimate Tyre Resource

More from CarComparos