Thar 700 vs Scorpio Hindi महिंद्रा थार v/s महिंद्रा स्कॉर्पियो हिंदी Comparison Review


Aaj hum Mahindra ki Thar aur Scorpio ki tulana karenge. Toh kyon kar rahe hain hum aisi tulana? Aaj market mein kai saare grahakon ko ye galatfehmi ho gayi hain ke Leh-ladakh jane ke liye Thar se behtar koi gaadi nahin. Lekin kya wakai mein ye baat sach hain, ya sirf Thar ka dikhawa hain? Aaj Thar ke CRDe model aur Mahindra ki khud ki Scorpio ke S3 lagbhag samaan keemat mein milti hain. Kya Scorpio S3 leh-ladakh nahin jaa sakti? Kya Scorpio S3 mein Thar jitni comfort nahin milti? Kya Scorpio S3 mein Thar jitne yaatri aur samaan nahin baith paata? Kya Scorpio S3 mein Thar se jyada thand aur garmi lagegi? Kya Scorpio ka pick-up thar se kamjor rahega? Aakhir Thar mein aisi kaunsi baat hain, jiske kaaran use log Leh-ladakh jaane ki gaadi samajhte hain? Janane ke liye dekhte rahiye CarComparos ka nayi Thar vs Scorpio comparison...

Keemat aur Features:
Thar Signature ki On Road keemat bara laakh rupay aur CRDe model ki gyarah laakh rupay, Dilli mein. Scorpio ka base model, yane ke ‘S3’ usse pacchis hazaar rupay SASTA hain! Hadd to ye hain, ke Scorpio ke base model mein Thar ke top-end Signature aur CRDe models se chaar-paanch features jyada milte hain, jo hain central locking, Power Windows, Rear AC Vents, Tilt Adjustable Steering aur Hydraulic Bonnet Struts. Thar mein aap ko milte hain Alloy Wheels aur four-wheel-drive system. Lekin agar Scorpio ka two-wheel-drive model Leh-ladakh ja sakta hain, toh usse jyada off-roading kar-ke kya ukaadna hain? Sirf dikhawa? Waise toh Scorpio mein bhi four-wheel-drive model uplabdh hain, jiski keemat hain baees-laakh rupay on road dilli, kyonki four-wheel-drive ka paryaay sirf top-end variant mein muajood hain. Lekin phir aap ko Thar se tees-chaalis features jyada mil jaate hain, jinki poori soochi aap screen pause kar-ke yahan par padh sakte hain.

Pick-up aur Smoothness:
Scorpio S3 aur Thar, dono mein Mahindra ka dhai litre m-2 D. i. C. R. engine hain, lekin uski tuning alag hain. Thar mein Mahindra ne tees hp aur saintaalis Nm jyada torque wala tuning diya hain. Iss wajah se uska pick-up Scorpio S3 se kaafi behtar hain. Agar ache pick-up waali Scorpio khareedni ho, toh chaudah laakh saath hazaar mein aap ko Scorpio ka S5 variant mil jayega, jismein Thar se bhi pandrah h.p. jyada power aur taintees Nm jyada torque milta hain. Kyonki usmein Mahindra ka baais-sau cc m-Hawk engine mil jaata hain, jo Thar aur Scorpio S3 ke pracheen dhai-litre-engine se har pehelu mein behtar hain. Isi liye Scorpio S5 ka pick-up, smoothness aur revs-pakadne-ki tezi, teeno Thar se kai guna behtar hain. Agar Scorpio ke four-wheel-drive model se tulana ki jaaye, toh Thar ki batti-gul ho jaati hain, kyonki uski power Scorpio se paintees h.p. Kamhain aur torque lagbhag pichattar nm kam hain! Isliye Scorpio four-by-four aur Thar ke pick-up mein zameen aasmaan ka fark hain.

Andruni Jagah aur Comfort:
Andruni jagah aur comfort ke maamle mein Thar Scorpio se bahutahi kharaab hain. Pehli baat toh Scorpio Thar se kaafi badi gaai hain. Scorpio, Thar se lagbhag do foot lambi hain, teen inch chaudi. Toh jaahir hain, ke Scorpio ke yaatri kaksh mein Thar se kaafi jyada andruni jagah uplabdh hain. Oopar se Scorpio ke seats bhi Thar se jyada araamdayak hain. Bhagwan ka shukr hain ke Mahindra ne Thar Signature mein front-facing rear seat toh di hain, lekin ye Scorpio ki middle-row seats jitni comfortable nahin hain aur na hi Thar mein utni, leg-room, knee-room aur shoulder space milti hain. Scorpio ke S7 models se toh aap ko captain seats aur front-facing third-row seats mil sakti hain, jo sab-se jyada comfortable seating paryaay hain. Agar dono gaadiyon mein paanch yaatri baithe ho, toh samaan rakhne ke liye Thar mein kaafi kam jagah bachti hain, jabki Scorpio mein dher saari-boot-space milti hain. Opar se Thar mein ek-aur badi samasya hain, jo hain uska soft-top. Uski wajah se Thar ka AC ki asar kam ho jaata hain. Kyonki wah Scorpio ki lohe ki body jaise thandi hawa ko andar seal karke nahin rakh paata. Itna hi nahin, wo tez raftaar pe aanewaali wind-noise aur tyre noise pe bhi niyantran nahin rakh paata. Kul milakar iss sab ka nateeja ye, ke jab aap sach mein leh-ladakh ki road-trip par jayenge, toh Scorpio ka ye comfort aap ko Thar ke four-wheel-drive system se sau guna jyada upyukt saabit hoga, itna yaad rakhna.

Mileage:
Thar CRDe ka ARAI mileage hain tera dashamlav teen k.p.l. yane ke Scorpio S3 se dhai k.p.l. kam aur Scorpio four-wheel-drive se ded k.p.l. kam! Humare vishleshan ke duraan humein Scorpio ne lagbhag gyarah k.p.l. Ka mileage diya tha, lekin Thar mushkil se das k.p.l. de paayi thi.

Pakad aur Suspension:
Scorpio ka wheelbase yane ke aage aur peeche ke paayon ki doori, Thar se das inch lambi hain. Iska faayda ye ke tez raftaar pe Scorpio, Thar se behtar pakad aur santulan banaye rakhti hain. Lekin Thar ke ghatiya santulan ki wajah sirf ye nahin. Thar ka sabse badi khaami hain uski sadiyon puraani chassis, jismein itna flex hain - yane ke lacheelapan hain, ke modhon par wah market ki sab-se battar gaadiyon mein se ek hain. Waise toh Scorpio bhi modhon par bilkul bhi achi pakad aur niyantran nahin deti, lekin Thar ke mukaable toh Scorpio bhi das-guna behtar hain! Suspension comfort ki baat ki jaaye toh Scorpio kaafi kharaab hain. Wah gaddhon aur speed breakers ko ache se sokh nahin paati, aur andar baithe yaatriyon ko tez jhatke pahunchati hain. Sab-se pichli seat par baithe yaatriyon ki toh haddi-pasli ek ho jaati hain. Lekin jab aap Thar ko khurdari sadak pe le jaate ho, tab pata chalta hain ke isse toh Scorpio bahut-hi behtar thi. Aaj bhi market mein adhiktar logon ko aisi galatfehmi hain, ke bade payye aur chaude tyres waali gaadiyaan gaddhon ko sab-se behtar sokh leti hain. Aise bewakoofon ko Thar ki pichli seat par bitha kar, pahadi ilakon mein rawana kar dena chahiye. Das minute mein unki ye galatfehmi door ho jayegi, itna yaad rakhna!

Quality aur maintenance:
Itne saalon se ya gaadiyan chalti aa rahi hain, phir bhi Mahindra unke adhiktar bigaad sudhaar nahin paaya hain. Ismein sab-se badi samasya ye hain, ke Mahindra apni saari mehnat bigaad sudhaarne ke bajay bigaad chupaane mein laga deta hain! Iska nateeja dikhai deta hain saare tikaupan naapne waale sarvekshanon mein. Jaise JD Power ke VDS aur IQS ye do sarvekshan, jinmein Mahindra ki gaadiyon mein sab-se jyada bigaad paaye jaate hain. Baaki ke JD Power surveys mein Mahindra oopar rehti hain, kyonki wo tikaupan nahin ginate. Sirf VDS aur IQS ye do sarvekshan gaadi ki gunwatta dikhaate hain, kyonki wo seedhe ye dikhaate hain ke har gaadi mein kitne bigaad paaye gaye. Baaki ke saare sarvekshan sirf grahakon ki raay darj karte hain, jisse sirf grahakon ki bhawanaaein pata chal sakti hain, gaadiyon ki gunwatta nahin! Waise toh Thar mein kuch features bhi nahin hain, jo kharaab ho sakte hain, iske bawajood usmein dher saare bigaad paaye jaate hain. Oopar se Mahindra ke service centres pe Mahindra ka koi niyantran nahin hain. Poore desh mein Mahindra ke sirf gine-chune dealerships pe achi service milti hain, baaki jagah pe sirf bill bade-bade banate hain aur bigaad bhi nahin sudhaar paate.

Antim Nirnay:
Toh doston agar aap ko chaar payyon waali Bullet khareedni hain, yane ke sirf dikhaawe ke liye, raub jamaane ke liye aur goonda-gardi karne ki khwaish se gaadi leni hain, toh aap ab tak Thar jaisi bakwaas gaadi khareedne ki galati kar chuke honge. Kyonki waise bhi aap zindagi mein kahan kisi ki koi achi baat maante ho? Lekin agar aap wakai mein hazaaron kilometre ki road-trips ke liye gaadi dhoond rahe hain, toh Scorpio aap ke liye Thar se sau-guna behtar paryaay hain. Har maamle mein Scorpio Thar se behtar gaadi hain. Phir chahe wo andruni jagah ho ya comfort, ya phir bootspace, ya mileage ho ya phir features. Har pehelu mein Scorpio Thar se behtar gaadi hain. Akhirkar sirf itna yaad rakhna, ke Scorpio ka two-wheel-drive base model bhi Leh-ladakh ki safar ke liye, Thar se jyada uchit gaadi hain. Aur isi liye Scorpio humari iss tulana ki nissandeh vijeta hain.

Agar aapko Thar ki, baki gaadiyon ke saath comparison dekhne mein dilchaspi hain, toh iss video ko ‘like’ karein aur comments mein unke naam likhe taaki humein aap ki maang pata chalein. DHANYAWAAD!

Comments

CareOCar.com - Ultimate Tyre Resource

More from CarComparos