Hyundai Venue vs Baleno Hindi Review हुंडई वेन्यू 🆚 बलेनो


Aaj hum Hyundai ki nayi Venue aur Baleno ki tulana karenge, lekin thodi hatke! Dono gaadiyon ke sirf top-end models ki tulana ke bajay, hum ye dekhenge ke saat laakh mein, aath laakh mein aur nau laakh mein dono gaadiyon ke kaunse variants milte hain. Har ek price range mein kaunsa utpadak behtar features, behtar engines aur behtar automatic transmissions de raha hain ye aaj hum aap ko batayenge. Iske alava, dono mein se kaunsi gaadi jyada tez hain, araamdayak hain, surakshit hain, tikau hain, kiska pakad-santulan acha hain? In saare sawaalon ka jawaab paane ke liye, dekhte rahiye, CarComparos ka Venue versus Baleno comparison...

1a. 7 laakh mein Features:
Agar aap ka budget saat laakh rupay hain, toh ab tak aap ne Baleno Delta jaroor shortlist ki hogi, lekin phir aa gayi chamchamaati nayi Hyundai Venue, jiska base model yane ke ‘E-petrol-manual’ mil raha hain saat-laakh paintees hazaar rupay mein on road Dilli, yane ke Baleno Delta se sirf bees hazaar rupay mehenga. Toh kya wah Baleno Delta se behtar paryaay hain? Bilkul bhi nahin! Venue ka base model, features ke maamle mein itna gareeb hain, ke usse sasti keemat ki Baleno mein aap ko Venue se pandrah-bees features jyada mil jaate hain! Venue-base mein toh Parcel shelf bhi nahin milta, central locking bhi sirf chaabi waala hain, remote wala nahin. Iske viparit Baleno delta mein Automatic Climate Control, Music System, LED Projector Headlamps, Rear wash-wipe-defogger aur anya kai saare features milte hain, jinki poori soochi aap yahan screen par pause karke padh sakte ho!

1b. 7 laakh mein Pick-up aur smoothness:
Waise toh dono gaadiyon mein turbocharged-petrol, smart-hybrid aur automatic gearbox waale models uplabdh hain, lekin iss keemat mein milte hain sirf bina-turbo waale, non-hybrid, manual transmission models. K12 aur Kappa-2 ki tulana aaj tak ek-dozen gaadiyon mein ho chuki hain. Dono makkhan jaise smooth, bara-sau cc ke four-cylinder engines hain jo lagbhag samaan power aur torque dete hain, lekin, Venue Baleno se takreeban do-sau kilo bhaari hain! Nateeja ye, ke uska pick-up behat kamjor reh gaya hain. Itni bhaari gaadi ke liye ye piddu-sa engine bilkul bhi paryapt power nahin de paata. Oopar se low-r.p.m. pe toh uska pick-up hadd-se jyada kamjor hain. Galati-se bhi aap ne ye model khareed liye toh aanewaale paanch-saat saal aap burhi tarah se pachtaoge! Baleno mein bhi low r.p.m. pick-up kaafi kamjor lagta hain, lekin phir bhi Venue se toh kai guna behtar pick-up milta hain, iss baat mein koi sandeh nahin!

2a. 8 laakh mein features:
Agar aap ka budget aath laakh hain, toh aap ke paas teen vikalp uplabdh hain, Venue ka ‘S-petrol-manual’, Baleno ka Zeta-manual, Delta-hybrid-manual aur Baleno ka Delta-automatic! Baleno ka Zeta model aap ko Venue-S se tees hazaar sasta padega aur das-pandrah jyada features bhi mil jayenge. Doosra paryaay hain Baleno ka naya, dual-jet engine waala, Delta-smart-hybrid model, jiski keemat bilkul Venue-S jitni hain, lekin phir bhi Venue se chaar paanch features jyada hain. Baleno hybrid ka faayda ye hain, ke non-hybrid model se aap ko ekhaad k.p.l. Behtar mileage milega. Lekin uske badle mein Baleno Zeta se das features kam milenge aur keemat bhi tees hazaar rupay jyada deni padegi. Iss wajah se Baleno hybrid khareedne mein filhaal toh koi samajhdaari nahin hain. Samajhdaari hain toh sirf Baleno Delta-CVT khareedne mein. Wah manual gear-waali Venue-S se sirf chaalis hazaar rupay mehengi hain. Usmein Venue-S se chaar paanch chote-chote features bhi jyada milte hain, jo hain Automatic Climate Control, LED Projector Headlamps, Rear wash-wipe, ityadi aur saath mein ek behat mahatwapoorn faayda milta hain, jo hain Suzuki ka makkhan jaisa smooth CVT-auto-gearbox.


2b. 8 laakh mein Pick-up aur smoothness:
Iss keemat mein aap ko teen prakaar ke engine gearbox milte hain. Pehla hain non-turbo, non-hybrid manual, jo Baleno Zeta aur Venue S mein milta hain, jiski tulana hum saat laakh ke models mein kar chuke hain. Doosra hain Baleno ka non-turbo, Hybrid-manual. Jo sirf brochure pe saat h.p. jyada power dikhaata hain, lekin jiska wajan thoda-sa bhaari hone ki wajah se, bina-hybrid-ki Baleno jitna hi pick-up deta hain. Lekin teesra aur iss keemat mein milne waala sab-se lajawaab vikalp hain Baleno ka CVT auto-transmission. Shehri sadkon pe uska smoothness wakai mein bemisaal hain aur haighway par uske rubber-band effect ke bawajood uska pick-up bina-turbo waale Venue se burha nahin! 

3a. 9 laakh mein Pick-up aur Smoothness:
Agar aap ka budget nau laakh rupay hain, toh achanak se aap ko Venue mein 80hp ke bajay, 120hp engine mil jaata hain! Torque bhi 113 se badh-ke 170 ke oopar pahunch jaata hain! Ab pick-up ke maamle mein Venue, iss keemat ki Balenos ke chaar kadam aage nikal jaati hain. Lekin ek baat yaad rakhna, iss turbocharger waali Venue ka lo-r.p.m. pick-up kappa-2 jitna hi kamjor hain. Dhai hazaar r.p.m. ke neeche aap ko bahut hi nirbal pick-up se gear badal-badal kar joonjhna padta hain! Agar aap shehri traffic mein roj do ghante gaadi chalate hain, toh samaan keemat mein Baleno ka Zeta-CVT-automatic model uplabdh hain, jo aap ko clutch-gear ragadne ki chikchik se chutkara dila sakta hain. Magar aap ka highway running jyada hota ho, toh Baleno ke baare mein bhool jao!

3b. 9 laakh mein Features:
Features ke maamle mein 9-laakh ki Venue Baleno se meelo peeche reh jaati hain, kyonki iss keemat mein toh Baleno ka top-end Alpha model mil jaata hain, jismein Venue-S se bees features jyada milte hain. Isi keemat mein Baleno ke hybrid-manual aur non-hybrid-automatic models bhi milte hain, aur wo bhi ‘Zeta’ trim mein, jo aap ko Venue-S se pandrah features jyada dete hain. Features ki poori ssochi aap video ko pause kar-ke padh sakte hain.

4a. 10 laakh mein Pickup aur Smoothness:
Agar aap ka budget das-laakh rupay hain, toh aap ke budget mein ab Venue ka automatic model bhi mil sakta hain. Aur jab ye aap ke budget mein aata hain, to Baleno ke taraf dekhne ki bhi jaroorat nahin, kyonki iski power aur torque dono Baleno automatic pachaas pritshat behtar hain! Oopar se Venue mein atyaadhunik dual-clutch automatic transmission diya hua hain, jo rubber-band effect ki samasya waale Baleno CVT se kai guna tez aur smooth hain. Shehri traffic ho ya highway pe overtaking, kisi bhi isthiti mein Venue-automatic Baleno se das-guna behtar hain. Baleno ki samasya ye hain, ke uska CVT gearbox, highway pe overtake karte waqt badi dikkat deta hain. Overtake karne ke liye jab aap accelerator dabaate ho, to sirf engine ka r.p.m. badhta hain, gaadi ki raftaar badhne mein sadiyaan beet jaati hain, isi ko ruber-band effect kehte hain.
Das laak ki manual-geared Baleno mein turbo-petrol engine uplabdh hain, jisko Maruti Baleno RS ke naam se bachta hain, uski power aur torque Venue se kam hain, lekin wjan bhi Venue se halka hain. Isliye wo Venue ke samaan pick-up de paata hain. Lekin yaad rakhna, dono gaadiyon ke manual models mein turbo lag ki samasya hain, dhai hazaar r.p.m. tak pick-up kaafi kamjor hain. Shehri traffic mein baar baar clutch gear badalna aniwarya hain. Aur jab aap ke budget mein seven-speed dual-clutch mil rahi hain, toh manual ke baare mein sochne ki bhi kya jaroorat hain?

4b. 10 laakh mein Features:
Venue-S-automatic ke lajawaab turbo-engine aur atyaadhunik features ke khaatir aap ko features ki kurbaani deni padti hain. Das laakh mein Baleno-Alpha-Automatic aap ko Venue se pandrah bees features jyada deti hain, jiski soochi aap video pause kar-ke padh sakte hain. Lekin ek baat yaad rakhna. In mein se adhiktar features aap gaadi khareedne ke baad bhi laga sakte ho, lekin Baleno khareedne ki galati karne ke baad, usmein tubo-petrol engine ya dual-clutch gearbox kabhi nahin laga sakte! Rahi baat manual models ki, toh das laakh saattar hazaar rupay mein Venue ka SX model milta hain, jismein Electric Sunroof, Rear AC Vents, Cornering Lamps aur bada touchscreen, Telematics aur dual-tone models mein leatherette Upholstery milti hain jo Baleno RS mein bhi nahin milti. Doorsi taraf Baleno RS mein Rear-wash-wipe, Telescopic Steering Adjustment, Auto Dimming inside mirror aur Push Button Start & Smart-key milti hi jo Venue SX mein nahin milte.

5. Diesel Pick-up & Smoothness:
Petrol ke baare mein itne vistaar se vishleshan dekne ke baad aap soch rahe honge ke shayad hum diesel ke baare mein bhool gaye hain, lekin aisa koi baat nahin! Dikkat ye hain ke in dono gaadiyon ke diesel models unke petrol model se ded laakh rupay mehenge hain aur unmein turbo-lag ki bahut badi samasya hain. Oopar se unmein koi automatic paryaay bhi uplabdh nahin hain. Turbo-petrols aane ke baad diesel-engine waale models khareedne mein koi samazdaari nahin bachi. Ab Venue ka udaharan le lo. Uska S-diesel model, manual gear waale S-turbo-petrol se pachpann hazaar rupay mehenga hain aur hadd to ye hain, ke S-diesel-manaul aaj dual-clutch automatic waale S-turbo-petrol se sirf pachaas-saath hazaar rupay sasta hain! Lajawaab pick-up aur smoothness waale S-automatic ke bajay diesel-manual khareedne mein bilkul bhi samajhdaari nahin hain doston!

Mileage:
Petrol engines ki baat ki jaaye, toh bina turbo waale manual-geared Venue ka ARAI mileage hain 17.5 k.p.l. jo Baleno ke non-hybrid model se 3.5 k.p.l. kam hain aur hybrid Baleno se 6.5 k.p.l. kam! Petrol-turbo-manuals ki tulana ki jaaye, toh Venue ka ARAI mileage hain athara dashamlav do k.p.l., jo Baleno RS se teen k.p.l. Kam hain. Petrol-automatics ki tulana ki jaaye, toh Venue dual clutch ka ARAI mileage Baleno CVT se sirf ded k.p.l. kam hain. Venue diesel ka ARAI mileage hain, 23.7 kilometer prati liter, jo diesel-Baleno se lagbhag chaar k.p.l. Kam hain!

Andruni Jagah aur comfort:
Dono gaadiyon ke aakar mein kuch khaas fark nahin hain. Lekin andruni jagah mein Baleno Venue se do kadam aage hain. Dono gaadiyon mein paanch yaatriyon ke liye paryapt jagah uplabdh hain. Baleno ka pichla seat Venue se thoda-sa spacious hain, lekin Venue ka boot Baleno se thoda-sa bada hain. Magar jab interiors ki tulana karte hain, toh dono mein zameen aasmaan ka fark mehsoos hota hain. Baleno ke interiors bahut hi gareeb aur halke darje ke lagte hain. Doosri aur Venue ke interios behat ucch darje ke lagte hain. Venue mein istemaal kiye gaye plastics ki gunwatta, texture, fabrics aur trims sabhi Baleno se das-pandrah laakh rupay mehengi gaadi ka ehsaas dete hain.

Pakad aur Suspension:
Venue ka suspension Baleno se naram hain. Iss wajah se wah gaddon aur speed breakers ko Baleno se behtar sokh leti hain. Darasal Baleno ka suspension travel kaafi kam hain. Isliye wah gaddhon ko ache se sokh nahin paati. Khurdare raaston par Venue, Baleno se thodi-si jyada araamdayak lagti hain. Lekin naram suspension ki wajah se Venue mein kaafi body roll hain aur steering bhi kuch jyada hi halka hain, jiske kaaran modhon par wah Baleno jitna confidence nahin deti. Modhon par Venue, thodi jaldi understeer karne lagti hain - yane ke phisalne lagti hain. Iske viaprit Baleno modhon par kaafi achi pakad aur niyantran darshati hain. Agar aap gaadiyon ke shaukeen ho, toh modhon par aap ko Baleno chalane mein Venue se jyada mazedaar lagegi.

Quality aur maintenance:
Hyundai ne pichle bees saal mein saabit kardiya hai ki wah market ke sabse tikau, aur bahrausemand car utpadakon mein se ek hain, magar Maruti jitna nahin! Suzuki ki gaadiyan Hyundai ki gaadiyon se thodisi jyada tikau saabit hui hain. Suzuki ki  gaadiyon mein Hyundai ki gaadiyon se bhi kam bigaad paaye gaye hain, isliye aaj Toyota bhi Baleno ko apne naam se bechne laayak samajhta hain, jaise aachuki Glanza! Hyundai ke service centres ki karigari bhi Maruti se kam nahin. Lekin Hyundai ke maintenance aur repairs ka kharch Maruti ki gaadiyon se thoda-sa mehenga hota hain. Venue ke spare aur service bhi Baleno se kaafi mehengi padegi, iss baat mein koi sandeh nahin. Hyundai ke aathsau service centres ka vistaar bhi kaafi acha hain, lekin wah Maruti ke teen hazaar se adhik service centres ki tulana nahin kar sakta.

Antim Nirnay:
Toh doston, aap ke liye in dono mein se kaunsi gaadi behtar hain, ye poori tarah se aap ke budget par nirbhar hain. Agar aap ka budget saat laakh hain, toh Baleno Delta aap ke liye sab-se badhiya vikalp hain. Kamjor pick-up aur features mein gareeb Venue-E model khareedna sarasar bewakoofi hain!

Agar bughet aath laakh hain, toh Baleno Delta-Automatic sab-se badhiya vikalp hain. Smaan keemat mein Venue-S ka non-turbo, manual geared model aap ko ghatiya pick-up, kam features aur clutch gear ragadne ki jhanjat deta hain.

Agar budget nau laakh hain, toh Baleno Zeta-Automatic ya Venue S-turbo-manual, ye do vikalp sab-se ache hain. City traffic mein zindagi bitaane walon ke liye Baleno-Auto sahi hain, aur Highway par jyada running ho toh Venue-turbo manual behtar hain.

Das laakh budget ho toh Venue ka dual-clutch automatic milta hain, jiski tulana mein phir Baleno-CVT, Baleno RS ya Venue SX-manual teeno bilkul bekaar hain. Bara laakh budget hoga to bhi Venue-S-auto hi sab-se badhiya paryaay hain. Agar budget usse bhi jyada hain, toh tera laakh ki Venue SX-plus-auto ka vikap uplabdh hain, jiske saamne Venue ka top-end-petrol-manual bhi ekdam faaltu vikalp hain kyonki usmein chaar extra features toh milte hain lekin saath mein dher saara turbo-lag aap ko bhi, compulsary lena hi padta hain!

Agar aap ko Venue ki aisi aur comparisons dekhni hain, toh iss video ko like karein taaki humein aapki maang pata chale aur comments section mein apni raay jaroor likh bhejiye! DHANYAWAAD

Comments

CareOCar.com - Ultimate Tyre Resource

More from CarComparos