Hector vs Harrier Hindi Price Features Comparison 16 18 & 20 Lakh Rupee Variants


Aaj hum aap ko sirf top-end models ke bajay, in dono gaadiyon ke sola, satrah aur athara laakh rupay on road keemat waale models ki tulana dikhayenge! Har ek budget mein in mein se kaunsi gaadi ka kaunsa variant khareedna sab-se faaydemand paryaay hain, ye janane ke liye, dekhte rahiye, CarComparos ki Hector vs Harrier vistrit tulana…

1. Budget Chaudah laakh:
Agar kisi ke mann mein MG ke Chinese hone ka shaq tha, toh keemat dekh kar wah yakeen mein badalne waala hain! Innova Crysta jitni badi iss Hector SUV ki keemat shuru ho rahi hain sirf chaudah laakh rupay se, aur wo bhi On Road Dilli - yane ke Harrier se seedhe-ssedhe ded laakh rupay kam! Sharam ki baat to ye hain, ke Harrier ded laakh rupay mehengi hone ke bawajood usmein Hector ‘Style’ se aath-das features kam milte hain, jaise ESP Traction Control, Hill Hold, Central Locking ka Remote, Rear Wash-Wiper aur Defogger, Height Adjustable Drivers Seat ityadi. Mana ki chaudah laakh ki Hector petrol pe chalti hain, jiske kaaran usmein diese-Harrier se sau Nm torque kam milta hain, lekin itna jaroor yaad rakhna ke, Hector ka Style-diesel model bhi Harrier ke base model se pacchis hazaar rupay sasta hain aur usmein Harrier se tees h.p. jyada shaktishaali engine bhi milta hain!

2. Satrah laakh mein Features aur Smoothness:
Jinka budget satrah-laakh rupay hain, wo aaj tak Harrier ka XM model khareedne ka soch rahe the, lekin ab unke paas Hector diesel-Super-manual model aur usse bhi lajawaab, petrol-Hector ka Smart-dual-clutch-automatic, aise do lubhawane paryaay uplabdh hain! Hector Super Diesel Harrier se tees hazaar rupay sasta hain, lekin phir bhi usmein Harrier XM se das-bara features jyada milte hain, jaise Front Parking Sensors, Remote se khulne waali Khidkiyaan, ISOFIX Child Seat Points, Alloy Wheels, Android Auto aur Apple Carplay, Cruise Control, Reverse Parking Camera aur ESP! Lekin yahan par baat khatam nahin hoti, kyonki Hector ke dual-clutch-automatic waale ‘Smart’ model mein toh usse bhi aath-das features jyada milte hain, jo hain Mobile se engine aur AC chalane ki suvidha, Leather Upholstery, Push Button Start Smart Key, Tyre Pressure Monitoring System, Electrically Adjustable Driver’s Seat, aur Side Airbags. Oopar se Dual-clutch Automatic gear ka makkhan jaisa smoothness aur tez gearshifting aap ko har roj ki clutch-gear ghisne ki jhanjhat se bachayega ye bhi yaad rakhna! 

3. Unnis laakh mein Features:
Harrier ka top-end ‘XZ’ model ab bees laakh rupay mein milta hain on road dilli. Hector ka top-end ‘Sharp-diesel’ model usse bees hazaar ruapy sasta hain. Yahan pe bhi Hector mein Harrier se jyada features milte hain, jaise chaar camere - jo parking karte waqt aap ko gaadi ke chaaro taraf ka drishya dikhaate hain, Electrically Adjustable Driver aur Co-driver Seats, Panoramic Sunroof, ded-inch bada touch-screen, Front Parking Sensors, ityadi. Lekin yahan par baat khatam nahin hoti, kyonki Hector ka top-end, petrol-automatic model diesel-manual se bhi tees hazaar rupay sasta hain aur usmein Diesel-manual model se do features jyada milte hain, jo hain Electric Parking Brake aur Remote se gaadi ka engine aur saath mein AC on-off karne ki suvidha.

Andruni Jagah aur Comfort:
Hector toh harrier se bhi do inch lambi aur do inch oonchi gaadi hain. Lekin harrier usse do inch chaudi gaadi hain. Chaudai ki wajah se harrier ko SUV-jaisa look jaroor mila hain lekin, Hector ko jyada upyukt yaatri kaksh mila hain. Pehli baat toh hector ki boot space, harrier se achi-khaasi ded-sau litre jyada hain. Doosra faayda ye ke hector ki pichli seat mein recline adjustment diya hua hain. Yane aap usko seedhi ya tedhi kar sakte ho jo harrier mein mumkin nahi hain. Iske alava dono gaadiyon mein paanch yaatriyon ke liye paryapt jagah uplabdh hain. Interiors ke maamle mein dono utpadakon ki soch thodi-bahut alag hain. Tata ne electronic khilono see jyada textures aur fabrics pe dhyaan diya hain. Wohin MG ne sadhaaran gunwatta ke plastics aur upholstery de kar aryaadhunik features dene pe poori jaan laga di hain. Lekin ek baat toh maanani padegi, ke tees laakh ki Fortuner aur Pajero jaisi gaadiyon ke interiors bhi Hector ya Harrier jitne mehenge nahin lagte!

Pakad aur Suspension:
Bharatiya sadkon ke liye suspension kaise tune kiya jaaye ye toh koi Tata ke Bharatiya engineers se seekhe! His Tarah see Harrier gaddhon aur speed breakers ko sokh leti hain waisa hector nahin sokh pati. Oopar se MG ne usko bahut hi piddu se wheels aur tyres diye hain. Hector ke tyres Harrier se do centimetre patle hain aur unka aspect ratio - yane ke rim aur sadak ke beech jitna rubber hota hain wo bhi Harrier see dhai centimetre kam hain. Nateeja ye ke khurdare raaston par Hector ke andar baithe yaatriyon ko kaafi jhatke sense paste hain, magar Harrier mein unmein se adhiktar jhatke mehsoos bhi nahin hote. Modhon par bhi Harrier Hector see saaf saaf behtar pakad aur chapalata darshati hain.

Mileage:
Hector diesel ka ARAI pramaanit mileage hain satrah dashamlav k.p.l. chaar k.p.l. jo Harrier se point-seven k.p.l. behtar hain. Hector petrol-manual ke hybrid model ka mileage hain pandrah dashamlav aath k.p.l. jo sola-sau kilo ki petrol gaadi ke hisaab se bilkul lajawaab hain! Bina hybrid waale model ka ARAI mileage hybrid model se ded k.p.l. kam hain. Hector ke petrol-automatic model ka ARAI mileage hain chaudah k.p.l. matlab dainandin istemaal mein aap ko das-se-gyarah k.p.l. ka mileage mil payega.

Quality aur Maintenance:
MG pe iss waqt bharausa rakhna bade jokhim ka kaam hain. Pichle das-pandrah saal mein hum ye dekh chuke hain, ke General Motors ka har ek brand India mein fail ho chuka hain. Pehle Opel-Vauxhaull ki Asta, Vectra aur Corsa jaisi European gaadiyaan, uske baad Daewoo ki Optra, Aveo aur Spark jaisi Korean gaadiyaan aur aakhir mein S.A.I.C. ki Enjoy, Sail aur Sail Yuva jaisi Chinese gaadiyaan. In saaro ke ghatiya tikaupan aur usse bhi battar service ki wajah se hazaaro grahakon ko pachtana pada hain. Vaastav mein Hector ye G.M. ki pehli Chinese gaadi nahin hain. Enjoy, Sail aur Sail U-VA bhi S.A.I.C ki gaadiyaan thi. Magar unki wajah se ‘Chevrolet’ brand itna badnaam ho gaya tha, ke General Motors, jo gaadi nayi Chevrolet Captiva ke naam se, baaki markets mein bechne waala hain, use Bharat mein MG Hector naam dena pada. Waise bhi General Motors ka Bharat mein bartaav kitna aneytik raha hain ye humne dekha hi hain. Unki Tavera, pradooshan niyam ka paalan na karne ke liye doshi paayi gayi thi. Oopar se pichle do saal mein Chevrolet ke bache-kuche service centres bhi band ho gaye hain. Tata ke tikaupan aur service ka haal bhi kuch khaas nahin raha hain, lekin General Motors se toh acha hi raha hain. Haal hi mein Tata Motors ke CEO ne Harrier mein aaye hue bigaad jald-se-jald sudhaarne ki ghoshana ki thi. Service ke maamale mein shehri dealerships ke mechanic ki theek-thaak training ho chuki hain. Hector aap ko kitni bhi pasand kyon na aayi ho, kam-se-kam agle che-aath maine uski service aur tikaupan ka feedback liye bina, jaldbaazi mein booking karne ki galati bilkul bhi mat karna. 

Antim Nirnay:
Toh Doston humaari raay mein, Hector petrol-automatic iss tulana ki saaf saaf vijeta hain. Khaas kar Hector ke dual-clutch petrol-automatic model. Usmein bhi Smart model, jo sade-satrah laakh mein on-road mil raha hain, wo wakai mein Hector ka sab-se behtareen value-for-money model hain! Darasal Hector Smart-automatic ka EMI - yane ke uske kishte, aap ko Harrier ke base model se sirf chaar hazaar rupay prati mahina mehenge padenge. Harrier XE ke pacchis hazaar rupay prati mahina aur Hector Smart-automatic ke untees hazaar rupay prati mahina. Mana ke Hector pakad-santulan ke maamle mein Harrier se char-kadam peeche hain, lekin iss pehelu se sirf gaadiyon ke sacche shaukeen logon ko fark padega, jo saare grahakon mein se ek-pratishat bhi nahin hote. Sirf unke liye Harrier, Hector se badhiya vikalp hain. Lekin bache hue saare grahakon ke liye Hector ka dual-clutch automatic model, Harrier se saaf saaf behtar paryaay hain.

Agar aap ko Hector ke Creta, Compass aur XUV jaisi SUVs ke saath tulana dekhne mein dilchaspi hain toh iss video ko like kijiye, taaki humein aap ki maang pata chal paaye. Dhanyawaad!

Comments

CareOCar.com - Ultimate Tyre Resource

More from CarComparos