Hector vs Compass Hindi Price Features Comparison 18 20 22 Lakh Rs Variants


Aaj hum aap ke liye le kar aaye hain MG Hector aur Jeep Compass ki ek alag prakaar ki tulana. Baaki Youtubers ki tarah sirf top-end models ki tulana karne ke bajay, aaj hum athara laakh se le kar pacchis laak ki on road keemat mein, dono gaadiyon ke kaun-kaunse variants mil rahe hain, aur unmein se kaunsa paryaay sab-se acha hain, ye aaj hum aap ko batayenge! Toh ayiye dekhte hain CarComparos ka Hector vs Compass comparison video.

1. Athara laakh mein Features aur Pick-up
Compass ne market mein kaisi loot macha rakhi hain, ye Hector ki keemat dekhne ke baad saaf saaf pata chalta hain. Jeep Compass ka base petrol-manual model, jo hain ‘Sport’ aaj athara laakh bees hazaar rupay ko bech raha hain, on road Dilli. Hector ka lajawaab dual-clutch gearbox wala, higher-mid model, jo hain Smart-petrol-automatic usse chaalis hazaar rupay sasta hain! Sasti hone ke bawajood Hector mein Compass se das-pandrah features jyada milte hain, jo hain Side Airbags, Parking Camera, Electrically Adjustable Seat, Tyre Pressure Monitoring System, Cruise Control, LED Headlamps, Alloy Wheels Leather Upholstery aur sed-das-inch ka bada sa touchscreen waali Infotainment System with Android Auto aur Apple Carplay. Dono gaadiyon mein turbo-petrol engines maujood hain. Ab brochure ke ank padh ke anumaan lagane waale yahan par jabardast chot khayenge! Unhe lagega Compass mein bees h.p. Jyada power hain aur wajan do-sau kilo kam hain, matlab wo chalane mein behtar gaadi rahegi, lekin asal mein iske bilkul ulta hain. Iss keemat ki Compass hain manual-geared, isliye usmein milta hain dher saara turbo-lag, jabki Hector hain dual-clutch Automatic, isliye usmein milta hain makkhan jaisa smooth aur tez gear-shifting. Compass waale shehri traffic mein turbo-lag se joonjhte reh jayenge aur Hector waale bade araam se unke automatic ka maza lenge! Aur doston yahan par baat khatam nahin hoti. Jinko isse bhi damdaar pick-up chahiye, unke liye Hector mein do-hazaar cc ka Smart-diesel model bhi uplabdh hain, jo Compass se das h.p aur sau Nm jyada torque deta hain!

2. Bees laakh mein Features aur Pick-up:
Jinka budget bees laakh hain, wo Compass ka base-diesel model khareed sakte hain. Lekin usi keemat mein ab aa gaye hain Hector ke top-end petrol automatic aur top-end diesel-manual models! Wakai mein Hector toh Compass ke nichle models ki bikri toh poori tarah se band kar dega! Toh doston bees laakh ki keemat mein toh MG aap ko Jeep se tees-chaalis features jyada deta hain, jinmein se kuch anokhe features hain three-sixty-degree Camera - matlab gaadi mein chaar camere lage hain, jo aap ko Parking karte waqt gaadi ke chaaron aur ka drishya dikhate hain, Panoramic Sunroof, Front Parking Sensors, ELectrically Adjust hone waali dono front Seats ityadi.. Poori soochi padhne ke liye video pause kar-ke dekhiye. Pick-up ke maamle mein Compass, Hector se halki si behtar hain, kyonki wah Hector se kaafi choti hain aur iss wajah se halki bhi hain. Lekin dono gaadiyon mein Fiat ka do-hazaar cc Multijet engine hain, jo Jeep ko Fiat-Chryseler ki shaadi mein dahej mila hain aur Hector ko GM-S.A.I.C ki shaadi mein dahej mila hain, kyonki General Motors ne FIat ke saath mil kar ye engine vikasit kiya tha! Lekin in diesel models se tees hazaar sasti hain Hector ki top-end petrol automatic, jo diesel jitni tez nahin, lekin behat smooth aur suvidhajanak hain!

3. Top-end Model ke Features
Sharam ki baat toh ye hain, ke Jeep ke sattais laakh rupay ke model mein bhi Bees laakh se sasti Hector jitne features nahin hain! Hector mein Tyre Pressure Monitoring System, Mobile se Gaadi ka engine aur saath mein AC on-off karne ki suvidha, Electrically khulne-aur-band hone waala dicky ka darwaja, 360-degree Camera System, ded guna bada Touchscreen ityadi.. Features bhare hue hain jo Compass ke Limited Plus model mein nahin milte. Darasal Compass ke taintees-laakh rupay waale Trail-hawk model mein bhi ye features nahin milte! Mana ke Compass mein four-wheel drive system milti hain, jo Hector mein filhaal uplabdh nahin hain, lekin Hector ne bilkul Jeep jaisi system banayi to bhi wah Compass se das laakh rupay saste mein usko bade araam se bechega! Ab Jeep apni gaadi pe kuch jyada hi munafa kamane ki koshish kar raha tha ya usse saste mein gaadi bana nahin paa raha, ye sirf wohi jaane. Lekin ab market mein rehna hain toh usse Compass ki keemat toh kam karni hi padegi!

Andruni Jagah aur Comfort:
Hector, Compass se lagbhag das inch lambi gaadi hain! Darasal Hector ki lambai, Innova Crysta se sirf sirf teen inch kam hain! Hector ki oonchai bhi Compass se paanch inch jyada hain. Lekin chaudai Compass ke samaan hain. Iss wajah se Hector ka aakar thoda-bahut MPV jaisa dikhta hain, lekin andruni jagah ke maamle mein wah Compass ko chaar-kadam peeche chod deti hain! Hector ke pichle seat pe Compass se do-chaar inch behtar leg-room aur knee-room milti hain. Oopar se Hector ki pichli seat mein recline-adjustment ki suvidha di hui hain - yane ke pichle yaatri unki pasand ke anusaar seat ko seedha-ya-tedha kar sakte hain. Ye suvidha Compass mein uplabdh nahin hain. Hector ki boot-space bhi Compass se takreeban ded-sau litre jyada hain. Interiors ke maamle mein Compass ke plastics jyada majbood aur ucch darje ki lagti hain, lekin Hector uske bade touch-screen, panoramic sun-roof aur dashboard pe leather trims de kar grahakon ko apne taraf aakarshit karti hain!

Pakad aur Suspension:
Ek SUV ka pakad niyantran kaisa hona chahiye, ye koi Compass se seekhein. Uske saamne Hector ka suspension bilkul pheeka pad jaata hain. SUV hone ke bawajood, Compass modhon par usss keemat ki kai saari sedans se behtar pakad aur niyantran darshati hain! Compass ka steering feel aur feedback bhi lajawaab hain aur wah behatareen chusti-phoorti se dishabadal karti hain! Ghoomawdaar raston par chalane ke liye, Compass sab-se behtareen SUVs mein se ek hain! Hector ki pakad usse kaafi kharaab hain. Body-roll bhi Compass se jyada hain. Yane ke modhon par Hector kaafi jyada daaye-baaye dolti hain. Hector Compass se kaafi dheemi raftaar pe understeer karne lagti hain. Aur steering feel aur feedback toh Compass ke das-pratishat bhi nahin. Lekin aisa bhi nahin ke sakhth suspension ki wajah se Compass ka ‘handling’ Hector se behtar hain. Darasal Compass ka suspension comfort bhi Hector se saaf-saaf behtar hain. Sirf dheemi raftaar pe Hector ka suspension gaddhon aur speed breakers ko compass se behtar sokh leta hain, lekin jaise raftaar badnhne lagti hain, Hector ka suspension lehrane lagta hain aur jyada uschalne lagta hain. Compass ka suspension tez raftaar pe bhi lajawaab santulan banaye rakhta hain aur andar baithe yaatriyon ko kam se kam jhatke pahunchata hain.

Mileage:
Hector diesel ka ARAI pramaanit mileage hain satrah dashamlav chaar k.p.l. jo diesel-Compass ke two-wheel-drive, manual-model se point-three k.p.l. behtar hain! Compass-diesel mein four-wheel-drive-manual model bhi uplabdh hain, jiska mileage, two-wheel-drive model se point-eight k.p.l. kam hain aur four-wheel-drive-automatic ka sola k.p.l. Hector petrol-manual ke hybrid model ka mileage hain pandrah dashamlav aath k.p.l. jo Compass se ded k.p.l. behtar hain! Bina hybrid waali Hector-petrol-manual ka ARAI mileage hain chaudah-dashamlav do k.p.l. jo bilkul Compass ke samaan hain. Hector ke petrol-automatic model ka ARAI mileage hain chaudah k.p.l. jo Compass-automatic ke samaan hain!

Quality aur Maintenance:
General Motors ka Bharat mein kamayaab hone ka ye teesra prayaas hain! Pehle prayaas tha ‘Opel’ ke naam se, uski Asta, Vectra aur Corsa jaisi European gaadiyon ke saath. Doosra prayaas tha ‘Chevrolet’ ke naam se, uski Daewoo se mili Optra, Aveo aur Spark jaisi Korean gaadiyon ke saath aur baad mein G.M. ke Chinese hissedaar, ‘S.A.I.C.’ ki Enjoy, Sail aur Sail-Yuva jaisi gaadiyon ke saath. Ye dono prayaas burhi tarah nakamiyaa rahe, kyonki G.M. apni gaadiyon ka tikaupan nahin sambhaal paaya aur usse bhi battar service pe toh bilkul bhi niyantarn nahin rakh paaya. Iss wajah se hazaaro grahakon ko unki gaadiyaan le kar pachtana pada. Vaastav mein Hector ye G.M. ki pehli Chinese gaadi nahin hain. Enjoy, Sail aur Sail U-VA bhi unke Chinese hissedaar ki hi gaadiyaan thi. Magar unn gaadiyon ki wajah se ‘Chevrolet’ naam itna badnaam ho gaya tha, ke General Motors, jo gaadi, nayi-Chevrolet-Captiva ke naam se, baaki markets mein bech raha hain, use Bharat mein ‘MG-Hector’ naam dena pada! Waise bhi General Motors ka Bharat mein bartaav kitna aneytik raha hain ye hum sab dekh chuke hain. Unki Tavera-gaadi, pradooshan niyam ka paalan na karne ke liye doshi paayi gayi thi. Oopar se apne saare paap ‘MG’ naam se door rakhne ke liye, Chevrolet ke service centres se alag Dealerships banayi hain, taaki agle do saal mein Chevrolet ki dealerships band pad jayegi aur puraane grahak aa kar service ke liye pareshaan nahin karenge! Jeep ke service centres ki kahaani kuch alag nahin! Fiat ke dealers ka bhi waisa hi diwala nikal gaya jaisa GM ke dealers ka ab nikal raha hain. Fiat Chryseler ne bhi Jeep ke liye, jaan-boojh kar adhiktar dealerships nayi banayi, taaki Fiat gaadiyon ke grahak aa kar Jeep dealerships pe pareshaan na karein. Jeep ke naye dealership pe grahak ko mili hui thappad ka video toh aap ko yahin Youtube pe mil jayega. MG dealership ki haalat Jeep jitni behaal rahegi ya nahin ye janane ke liye che-aath mahine intezaar karna mein hi filhaal samajhdaari hain. 

Antim Nirnay:
Doston agar hum in dono gaadiyon ko sirf takniki nazariye se dekhte hain, toh Compass Hector se behat shreshth gaadi hain. Hector se chaar din pehle launch hui Compass Trail-hawk toh behat ucch darje ki gaadi hain. Uska nine-speed automatic gearbox aur atyaadhunik four-wheel-drive system use aisi-aisi jagah le jaa sakti hain, jahan Hector sapne-mein bhi nahin jaa sakti! Lekin ye sab dekhne waale shaukeen log, market mein maujood grahakon ke ek-pratishat bhi nahin hain! Aur taintees laakh rupay kharch karne ho, toh gaadi Mercedes, BMW aur Audi ke daayre mein chali jaati hain. Toh Trailhawk ki tulana hum unse karenge aur neeche description mein aap ke liye link daal denge. Yahan par sawaal sirf itna hain, ke bees-baais laakh tak dono mein se kaunsa utpadak behtar gaadi de raha hain. Toh yahan par saara vishleshan sirf aap ke budget par nirbhar hain. Agar budget athara laakh hain, toh Hector ka Smart-automatic model baaki ksi bhi models se das-guna behtar paryaay hain. Lekin agar budget bees laakh se thoda-sa bhi oopar kheech sakte ho, toh baais laakh rupay mein Compass ka Longitude-O-Automatic model uplabdh hain. MAna he usmein Hector se aath-das Features kam milenge, lekin mann ki shanti aur sukoon MG se jyada milega. Filhaal MG ki gaadiyon ka tikaupan saabit nahin hua hain. Yaad rakhna ye gaadi ussi General Motors waale Halol plant mein ban rahi hain, jahan S.A.I.C. ki ghatiya gaadiyon par Chevrolet ka logo chipkaya jaata tha! MG ke service centres bhi abhi-abhi bane hain. Wahan ke mechanics ka training aur poori wyavastha set hone mein, kam-se-kam ek saal toh lag hi jayega. Jeep pichle do saal mein iss bhasad se gujar chuka hain! Oopar se compass ka pakad aur niyantran bhi Hector se behat shreshth hain. Toh agar agle ek saal mein MG apna tikaupan aur service saabit kar deta hain, toh hum ye video dobara banyenge aur Hector ko vijeta ghoshit karenge, lekin filhaal toh Jeep Compass hi humaari iss tulana ki vijeta hain.

Agar aap ko Hector ki Innova Crysta, Fortuner aur Scorpio jaisi gaadiyon ke saath tulana dekhne mein dilchaspi hain, toh iss video ko like kijiye, taake humein aap ki maang pata chale. Dhanyawaad!

Comments

CareOCar.com - Ultimate Tyre Resource

More from CarComparos