Ertiga 1.5D vs TUV300 अर्टिगा 1.5 🆚 TUV 300 हिंदी Review


Aaj hum nayi TUV-three-double-oh aur naye ded-litre, diesel-engine waali Ertiga ki tulana karenge. Kehne ko toh ye dono gaadiyaan seven seater hain, dono mein pandra-sau cc ka diesel engine hain aur dono ki keemat mein bhi jyada fark nahin hain. Lekin doorsi aur, dono gaadiyon ka look bilkul alag hain, ek SUV hain aur doosri MPV, ek mein monocock chassis hain aur doosri mein ladder frame, ek front weel drive hain aur doosri rear-wheel-drive. Isse in gaadiyon ke pick-up mein, unke mileage mein, unke pakad-santulan mein aur unki comfort mein kitna fark aaya hain, ye janane ke liye dekhte rahiye CarComparos ka TUV vs Ertiga comparison...

Keemat aur features:
TUV ka top-end, T10-O model, Ertiga ke top-end diesel model, ZDi-plus se ek laakh rupay sasta hain. Lekin TUV mein Ertiga se paanch saat features bhi kam milte hain, jo hain Automatic Climate Control, Rear AC Vents, Electrically Folding Mirrors, Auto-up Anti-Pinch Driver Window, Android Auto, Apple Carplay aur Push BUtton Start & Smartkey. TUV mein do-teen aise features bhi hain, jo Ertia mein nahin milte, jo hain Cornering Lamps, LED DRL aur Leatherette Upholstery.

Mileage:
Suzuki ke naye, ded-litre diesel waali Ertiga ka ARAI mileage hain 24.2 kmpl, jo chote, Fiat-engine-waale Ertiga se, lagbhag ded k.p.l. kam hain. Gaur farmayiye, Ertiga ke Fiat engine waale model mein aaj bhi S.H.V.S Smart Hybrid System maujood hain, lekin naye ded-litre-diesel-engine waali Ertiga mein ye system uplapdh nahin hain. TUV ka ARAI mileage hain sirf athara dashamlav paanch k.p.l. - yane ke nayi Ertiga se lagbhag saat k.p.l. kam! Humaare vishleshan ke dauraan bhi humein nyi Ertiga ka mileage TUV se paanch k.p.l. jyada mila tha. Iska matlab, salaana pandrah hazaar kilometre ke hisaab se, paanch saal mein aap ko TUV ke diesel pe, Ertiga se lagbhag do laakh rupay jyada kharch karne padenge!

Pick-up & Smoothness:
TUV ke brochure pe kahin pe bhi Mahindra ne uska wajan nahin likha. Kyon chupaana chahta hain Mahindra TUV ka wajan? Kya use pata nahin ke ARAI ki website pe jaa kar koi bhi saari haqueekat dekh sakta hain? Mahindra ko lagta hain ke brochure pe power aur torque ke bade-bade ank dekh kar grahak prabhaawit ho jayenge. Lekin hum Youtubers hain na, uski pol kholne ke liye! Toh doston TUV, Ertiga se paanch h.p. jyada power aur pandrah Nm jyada torque de rahi hain, matlab uska pick-up Ertiga se tez hoga aisi galatfehmi mein na rahe. TUV ka wajan hain pandra-sau-sattar kilo aur Ertiga ka bara-sau-pachaas kilo. Nateeja ye, ke Ertiga ka pick-up TUV se saaf-saaf behtar hain. Jab aap power aur torque-to-weight ratio ka hisaab lagate ho, tab pata chalta hain, ke Ertiga toh TUV se tees pratishat jyada shaktishaali hain! Aur yahan pe baat khatam nahin hoti. Smoothness ke maamle mein bhi, Ertiga ka naya engine TUV se kai guna behtar hain.

Andruni Jagah aur comfort:
Dono gaadiyon ke front seats behat comfortable hain. TUV ka middle seat Ertiga se thoda-sa behtar hain, kyonki uski chaudai Ertiga se do-inch jyada hain, jiske kaaran uspe teen yaatri jyada araam se baith paate hain. Lekin TUV ki sab-se pichli seats bilkul ghatiya hain. Un par kisi yaatri ko bithana matlab use kaale-paani ki sazaa sunaane se kam nahin. Iska pehla kaaran hain ke wo side-facing hain, yane ke do yaatri aamne-saamne baithne waali. Aisa baithne se dono yaatriyon ke ghutne ek-doosre se takraate hain. Doosri samasya ye ke unpe nausea-aur-ulti hone ki sambhavana bahut jyada rehti hain. Kya aap ko pata hain kyon ghoomaawdaar raaston par yaatriyon ko ulti aati hain? Gaadi mein baithe hue jab aap kaa sar kai-baar daaye-baaye dolta hain, toh aapke kaan ke andar ka drav uchalta hain aur aap ki ulti aati hain. Side facing seats mein toh seedhe raaste pe jitne baar brake lagoge, utni baar yaatriyon ka sar daaye-baaye dolta hain, ab soch lo isse kya nuksaan ho sakta hain.. Teesri samasya hain ke seats bilkul pichle payyon ke oopar sthit hain, nateeja ye ke har gaddhe aur speed-breaker pe yaatriyon ko tevr jhatke lagte rahenge. Chauthi samasya bhi hain, wo ye ke jabardasti aap ne in seats pe kisi ko bitha liya, toh gaadi mein samaan rakhne ke liye bilkul bhi jagah nahi bachti! Iske vipareet Ertiga ki sabse pichli seat par avsar kad ke do yaatri bilkul araam se baith sakte hain aur unke peeche do-sau-litre - matlab Alto jitni boot-space bhi aap ko milti hain. Rahi baat interiors ki, toh iss maamle mein Ertiga ke plastics aur trims ki gunwatta aur banawat TUV se saaf saaf behtar hain.
 
Pakad aur Suspension:
Doston iss maamlemein ye dono gaadiyaan ek-doosre se bilkul alag hain. Ek taraf hain Ertiga, jo monocock prakaar ke platform bar bani hain, aur dosri taraf hain TUV jo ladder-frame platform par aadhaarit hain, jo das saal puraani Xylo mein pehli baar launch hua tha. Ye platform kaafi kharaab hain ye pichle das saal se hum dekhte aa rahe hain. Ye platform behat bhaari hain, aur uske wajan ke hisaab se jitna kada hona chahiye, utna bilkul nahin hain. Usmein kaafi saara flex yane ke lacheelapan maujood hain, jo ek ghatiya chassis ka nirdeshak hota hain. Isse gaadi mein yaw aur body-roll - yane ke modhon par daaye-baaye dolne ki pravritti jaise dosh aate hain. Oopar se TUV ki oonchai bhi che-foot hain, jo hadd se jyada hain! Iske kaaran uska C.G. - yane ke centre of gravity kaafi ooncha ho gaya hain aur iss wajah se body-roll ki samasya aur bhi badh jaati hain. Iske viparit Ertiga ki monocoque chassis halki ho kar bhi TUV se kai guna kadi hain aur uska pakad aur niyantran TUV se behat shreshth hain. Modhon par TUV Ertiga se kaafi kam raftaar pe under-steer karne lagti hain - yane ke phisalne lagti hain. Wah Ertiga ki tarah chapalata aur phoorti se dishabadal nahi kar paati. Lekin TUV ke kuch faayde bhi hain. Uska suspension Ertiga se naram hain, jiske kaaran wah gaddhon aur speed breakers ko Ertiga se saaf-saaf behtar sokh leti hain. Tooti-phooti sadkon pe toh uski suspension comfort Ertiga se kaafi badhiya hain. TUV ka ek aur faayda ye hain, ke uske rear-wheel-drive hone ki wajah se wahh matti aur keechad se bhare raaston par Ertiga se behtar niyantran rakh paati hain.


Quality aur maintenance:
Maruti ki gaadiyon ne pichle tees saal mein ye saabit kar diya hain, ke wah desh ki sabse bharausemand aur tikau car utpadakon mein se ek hain. Doosri aur Mahindra ki gaadiyan unmein aanewaale bigaad aur ghatiya service ki wajah se badnaam hain. TUV ki look, uske plastics, fabrics ka texture sudhar gaya hain, matlab gaadi ka tikaupan bhi apne-aap sudhar gaya hoga, aisi galatfehmi mein na rahein. TUV aaj bhi JD Power ke VDS aur IQS, in-do, tikaupan naapne waale sarvekshano mein, aakhri sthaan par aati hain. JD Power ke sirf ye do sarvekshan gaadi mein aaye hue bigaad ginate hain, baaki ke saare sarvekhsan grahakon ki raay naapte hain, gunwatta nahin naapte, itna yaad rakhna. Service ke maamle mein bhi Maruti ke dealerships ki karigari aur vyawastha Mahindra se kaafi achi hain. Iska asar aap ko bhugatna padega second hand market mein, jahan par Ertiga, TUV se takreeban chaar laakh rupay jyada keemat dilayegi! Ab lagao hisaab. Ertiga ek laakh rupay mehengi hain, magar indhan ka kharch TUV se do laakh rupay kam hain aur resale value teen-chaar laakh rupay jyada. Iska matlab lambi-daud mein aap ko Ertiga, TUV se chaar-paanch laakh rupay sasti padegi!

Antim Nirnay:
Toh doston in mein se aap ke liye kaunsi gaadi behtar rahegi, ye aap ke istemaal pe nirbhar hain. Agar aap grameen ilako mein gaadi istemaal karne waale ho, jahan sadkein kharaab hain, jahan kacche raaste hain, jahan baarish ke mausam mein keechad rehta hain, toh TUV aap ke liye jyada uchit vikalp hain. Lekin agar aap ki adhiktar driving shehri traffic mein rehti hain ya phir do bade shehron mein highway par jyada running rehta ho, toh Ertiga aap ke liye TUV se jyada uchit vikalp hain. Takniki roop se dekha jaaye to Ertiga iss tulana ki vijeta hain, uska pick-up, uska mileage, seating comfort, features, tikaupan aur smoothness TUV se behat acha hain. Aur agar aap ka running nabbe pratishat shehri traffic mein hota hoga toh kam-se-kam ek baar Ertiga Automatic test-drive kar-ke dekhiyega. Wah aap ko aane waale paanch saal mein laakho baar clutch gear ragadne se bacha sakti hain aur sirf automatic mein ESP - yane ke traction control aur hill-hold ye do mahatwapoorn safety features milte hain.

Agar aapko TUV ki baki gaadiyon ke saath comparison dekhne mein dilchaspi hain toh ‘like’ karein aur comments mein aap ko kaunse comparison dekhne hain ye lihk bhejiye. DHANYAWAAD

Comments

CareOCar.com - Ultimate Tyre Resource

More from CarComparos