Triber vs Eeco Hindi 6 Pros & Cons ट्रायबर v/s ईको Review


Aaj hum aap ko nayi Renault Triber ki 5 aisi khoobiyaan batayenge, jo uski pratispardhi Maruti Eeco mein maujood nahin hain. Ab aisa mat sochiyega ki har rahak ke liye Triber hi Eeco se behtar saabit hogi. Eeco mein bhi kuch aisi khoobiyaan hain jo Triber main maujood nahin hain. Jin sab ke baare mein hum aap ko is video ke aakhir mein batayenge. Toh doston aayiye dekhte hain Renault Triber aur Maruti Eeco ke faayde aur nuksaan kya hain…

T1. Andhruni Jagah aur Comfort
Bharat Sarkar ke dwara rakhi hui chaar-metre ki seema ke andar, yaatri kaksh ko jyada bada kaise banayein, ye to koi Renault se seekhe. Triber ke andar, 7 yaatri, Eeco se kai guna jyada araam se baith sakte hain. Pehli baat toh ye ki Triber Eeco se 1 foot lambi aur 7 inch chaudi gaadi hain, upar se Triber ke seats, Eeco se kai guna jyada aadhunik aur araamdayak hain. Aur to aur, Triber ki sab-se pichli seat split-folding Hain, jise fold karne ke baad 625 litre ka boot-space milta hai. Iske vipareet Eeco ki koi seats fold nahin hoti aur sab-se pichli seat nikaal ke bhi rakh di to Triber se 125 litre kam boot-space milega.

T2. Suspension aur Comfort
Eeco ka suspension comfort saadharan gaadiyon ki tulana mein bahut hi maamuli hain. Eeco jaisi oonchi aur patli gaadi mein modon par palat jaane ki sambhavana rehti hain. Usse bachne ke liye Suzuki ke engineers ko suspension itna sakhth karna pada hai, ke chote se chote gaddhon ko bhi Eeco theek se sokh nahin paati. Doosri taraf hai Triber, jo bani hain Renault ke, Kwid waale, C.M.F-A platform par. Oopar se Triber ka wheelbase - yaane ke agle aur pichle pahiyon ke beech ki doori, Kwid se badhaayi gayi hai aur bade athwa chaude pahiye bhi bithaye gaye hain. Nateeja ye ke aap ko Eeco ki tulana, suspension comfort mein zameen aasmaan ka fark mehsoos hoga.

T3. Interiors
Omni ke band hone ke baad ab Eeco hi Maruti ki sab-se saadharan interiors waali gaadi reh gayi hain. Unka 20 saal puraana design aur behad 'cheap' plastics aapko achhi feeling bilkul nahi dete. Iske viparit Triber mein Renault ne interiors pe khaasa mehnat ki hai, is baat ka ehsaas uska darwaja kholte hi lag jata hai. Kwid mein hui galatiyon se Renault ne acha sabak liya hain. Triber ka aadhunik, dual-tone dashboard design, upholstery ki gunwatta aur trims ki banawat, Ertiga tak ko takkar de sakte hain!

T4. Automatic Transmission
Jin grahakon ke parivaar mein 6-7 sadasya hain, lekin Ertiga khareedne ka budget nahi hain, wo aaj majboori mein Eeco khareed rahe hain, aur sirf chote gaon mein hi nahi, balki shehron mein bhi. Shehri traffic ki paristhiti toh din-ba-din bigadti hi jaa rahi hain. Isliye Renault ne Triber mein AMT-automatic gearbox diya hain. Shehri grahakon ke liye isse bada vardaan nahin ho sakta. Ab 7-seater gaadi ke grahak bhi har-roz clutch-gearbox ragadne se chutkara paa sakte hain aur wo bhi Ertiga automatic se 5 laakh kam mein!

T5. Pakad Santulan
Eeco aadhaarit hain Maruti-Suzuki ki puraani Versa gaadi pe, jiske vigyapan mein Amitabh aur Abhishek Bacchan aate the, yaad hain na? Wo 20 saal pehle antar-rashtreey markets mein launch hui thi! In bees saalon mein gaadiyon ke utpadak kaafi vikasit ho gaye hain. 20 saal  puraani chassis aur aadhunik chassis mein zameen aasmaan ka fark hai. Computer aided design aur engineering ke upyog se aaj samaan wajan ki chassis 10-guna jyada majboot ban rahi hain! Chassis jitni kadi hoti hai, utni badhiya pakad aur santulan banaye rakhti hain. Eeco toh modon par bilkul achhi pakad nahin rakhtti aur kaafi dheemi raftar par hi understeer karne lagti hain - yane ke phisalne lagti hain. Renault ne Triber ko bilkul sahi size ke air tyres diye hain. Honda Amaze jaisi gaadi se bhi 1 inch bade aur 10 mm chaude! Upar se Kwid ki pakad, niyantran aur suspension tuning karne ki kshamata. Kisi bhi haalat mein Renault Triber ki handling, Hyundai ki Xcent aur Grand i10 se behtar hogi, is baat par shat pratishat vishwaas kiya ja sakta hai! Aur Xcent aur Grand i10 ke shreni ki sab se kamzor niyantran waali gaadiyan bhi Eeco se 100 guna behtar hain, ye toh aap ko pata hi hoga!

T6. Keemat aur Features
Renault-Nissan ki Datsun Go Plus 7-seater gaadi ka AC, Power Steering wala model Eeco se 1.5 Lacs Rs mehenga hain. Ab Go Plus bani hai Nissan ke V Platform pe, jo Micra, Sunny, Renault Pulse aur Renault Scala mein istemaal kiya gaya tha aur kaafi mehenga platform tha. Lekin Triber bani hain saste, C.M.F.A. platform pe, jo Kwid aur Datsun Redi-Go mein istemaal hota hain. Toh aisi bhi sambhavana hain ke Triber ka sab-se sasta AC Power Steering model Go Plus se thoda sasta rahe! Aur Eeco mein AC, Power Steering ke alava koi feature milte nahin. Toh agar samaan feature waali Eeco aur Triber mein sirf 1- 1.25 Lac ka fark hoga, toh bhala koi Eeco kyon khareedega?

Mid-ro
Toh doston Triber ke Eeco ke oopar kya faayde hain ye toh aap ne dekh liya. Toh ab ye dekhte ke Eeco mein aise kaunse faayde hain, jo Triber mein maujood nahin hain.

E1. Rear Wheel Drive:
Doston Eeco ki sab-se badi khaasiyat ye hai ke wo ek rear-wheel-drive gaadi hain, jabki Triber ek front-wheel-drive gaadi hain. Mitti aur keechad se bhare raaston par front-wheel-drive gaadiyaan bahut jald apni pakad kho deti hain aur keechad mein ye gaadiyan asaani se phans jaati hain. Rear-wheel-drive gaadiyan keechad mein bhi kai guna behtar pakad banaye rakhti hain. Iski wajah ye hai ki rear-wheels gaadi ko dhakelte hain, jabki front-wheels gaadi ko kheechte hain. Toh agar aap kacche raaston par gaadi ka istemaal karne waale hain, toh aap ke liye Eeco, Triber se behtar paryaay hai.

E2. Tikaaupan aur Service:
Suzuki ki gaadiyon ne pichle 30 saalon mein apna tikaaupan saabit kar diya hai. Doosri or, Renault ki CMF-A platform ki gaadiyon ka tikaupan bilkul achha nahin raha hain. Shuruwaat mein toh Kwid mein dher saari kamiyaan paayi gayi thi. Ab un mein se aadhe se adhik kamiyaan Renault ne sudhaar li hain. Magar aaj bhi 4 saal puraani, 50,000-60,000 km chali hui Eeco aur Kwid ki tulana ki jaaye, toh Eeco, Kwid se kaafi behtar haalat mein paayi jaati hai. Upar se Maruti ke service centres ki kaarigari aur vyawastha bhi Renault ke service centres se kai guna behtar rehti hain. Aur toh aur, Maruti ke 3000 se adhik service centres desh ke kone-kone tak pahunch chuke hain, jabki Renault ke mushkil se 200 service centres hi aapko mil payenge! Agar aap grameen kshetron mein, Renault ke service centres se saikdo kilometre door apni gaadi istemaal karne waale hain, toh aaj bhi Eeco hi aap ke liye Triber se jyada uchit vikalp hain.

E3. CNG:
Eeco ko teesra aur aakhri faayda hai uska CNG model. Jo graahak din mein 30 kilometre se jyada gaadi chalate hain, aur wo Delhi NCR jaise ilake mein rehte hain, jahan CNG bahut asaani se mil jaata hai, wahan par Eeco CNG aap ke bahut paise bacha sakti hai. Aise graahakon ko Triber mein petrol bharane pe, Eeco mein CNG bharane se 2 Lac Rs jyada kharch karne padenge. Aise grahakon ke liye Eeco ka CNG model behat kifaayati paryaay saabit ho sakta hai.

Antim Nirnay:
Toh doston, rahi baat pick-up aur mileage ki, toh uss maamle mein dono gaadiyon mein aap ko Kuch khaas fark mehsoos nahin hoga. Sirf grameen kshetron mein, jahan Renault ke Service Centres uplabdh nahin hain aur kacche raaston par gaadi chalani padti hain, wahan Eeco, Triber se behtar vikalp hai. Warna, baaki sabhi graahakon ke liye Triber, Eeco se kai guna shreshth parsaay hain.

Toh Doston, agar aap ko aise hi aur gaadiyon ki tulana dekhni ho, toh iss video ko ‘like’ karein, taaki humein pata chale ke aise videos ki demand hai. Dhanyawaad!

Comments

CareOCar.com - Ultimate Tyre Resource

More from CarComparos