MG Hector Top 6 Advantages Hindi एमजी हेक्टर की खूबियां Pros Positives Merits


Aaj hum aap ko MG brand ki Bharat mein launch hui pehli gaadi - Hector SUV ki kuch aisi 6 khoobiyan dikhaane waale hain, jo uske shreni ki anya kisi bhi gaadi mein maujood nahin hain! Lekin Hector ka vigyaapan karne ka humara koi irada nahin, isi liye humne Hector ke dosh, uske aib aur uski khaamiyan dikhaane waala video bhi banaya hua hain, jiska link neeche description mein maujood hai. Kya mobile phones aur saare electronic items ki tarah, Chinese utpaadak car-market pe bhi kabja kar sakte hain? Aayiye dekhte hain CarComparos ka MG Hector ki khoobiyaan dikhaane waale video mein...

1. Keemat
MG ki keemat dekhne ke baad ek baat ka yakeen ho gaya ke Creta, Harrier aur Compass jaisi SUVs ne market mein loot macha rakhi hain! Jeep Compass se ye gaadi sasti hogi aisa sabhi ka anumaan tha, lekin ye gaadi Harrier se bhi sasti hogi aisa kisi ne socha nahin tha. Lekin hadd to ye ho gayi, ke MG ne ye gaadi Creta se bhi sasti rakh di! Yakeen nahin aata toh screen pe di gayi tulana dekh lijiye. Creta ke SX Dual-tone aur Hector ke Super-petrol model ki keemat bilkul ek-samaan hain - yane ke Dilli mein on road keemat 15 Lac rupay. Lekin aap yahan screen pe dekh sakte hain ke Hector Super mein Creta SX dual-tone se jyada features maujood hain! Hector Super mein aise 6-7 features maujood hain jo samaan keemat ki Creta mein nahin milte, jabki Creta SX-dual-tone mein sirf 4-5 aise features hain, jo samaan keemat waali Hector mein nahin milte. Hector Super mein ESP-Traction-Control, Hill Hold, Fuel Computer, ISOFIX Points, Remote se neeche hone waali khidkiyaan, Front Parking Sensors aur Creta ke do-guna bada touch-screen milta hai! Sirf features dekh kar hi ye pata chal jaata hain, ke MG, Hyundai se kam daam mein, jyada moolya ki gaadi de raha hain. Lekin yahan par baat khatam nahin hoti doston. MG aap ko Creta se 20 HP aur 100 Nm jyada torque wala engine bhi de raha hain! MG aap ko Creta se bade pahiye aur pichle disc brakes deta hain, jabki Creta mein pichle brakes drum-type milte hain. MG aap ko Creta se 150 litre jyada boot-space aur behtar leg-room, knee-room aur head-room deta hain. Agar Hyundai ne inmein se aadhi cheezein bhi Creta SX mein dene ki koshish ki, toh uski keemat Hector-Super se, kam-se-kam 2 Lac Rs mehengi ho jayegi! Kul milaakar itna samajh lijiye, ke MG aap ko Creta se jyada features, takatwar engine aur jyada andruni jagah waali gaadi utni hi keemat mein de raha hain!

2. Warranty aur buyback
Doston aaj aap ne market mein saikdon baar ye dekha hoga, ke car-utpaadak badi jaldbaazi mein apni nayi gaadi market mein le aate hain, aur phir agle 6-7 mahine apni gaadiyon ki kamiyaan sudhaarne mein ganwa dete hain. Kai baar aisi dikkatein gaadiyon mein paayi jaati hain, ke nayi gaadi service centre pe diye bina unko sudhaarna namumkin hota hain. Lekin koi bhi utpadak apni galati maan ke ye nuksaan jhelne ko raazi nahin hota. Iss samasya ke khilaf unki ye tarkeeb rehti hain, ke gaadi pe kam-se-kam warranty de kar, kisi tarah grahak se 2-3 saal ye dikkat chupa ka rakhna. Ek baar warranty khatam ho jaaye, to usko ek lamba chauda bill chipkana aur kharab purje badal dena. Is liye aaj ye behad jaroori ho gaya hain, ke gaadi khareedte waqt jyada-se-jyada waraanty dene waale utpadak ke paas hi jaayein. Niji istemaal ke liye gaadi khareedne waalon ko warranty ke kilometres se jyada, kitne saal ki warranty mil rahi hain, iss baat par dhyaan dena chahiye, kyonki unki daily running itni kam hoti hai, ke 2 saalon mein laakho kilometre ki warranty unke kisi kaam ki nahin hoti. Warranty ek aisa pehelu hota hain, ke jo dekh kar aap paanch second mein gaadi ki quality ka acha-khaasa anumaan laga sakte hain! Kyonki warranty sab-se pehle ye dikhaati hai, ke utpadak ko khud apni gaadi pe bharosa han ya nahin! Aur iss maamle mein MG ne bilkul sahi kadam uthaaye hain! Wo gaadi ke saath hi 5 saal aur unlimited kilometres ki warranty de rahe hain. Ab iss warranty mein kaunse purje shaamil nahin hain - ye MG ab tak nahin bata raha. Filhaal wo bass isse ‘Complete Warranty Package’ bata rahe hain. Upar se 5 saal ka road-side assistance, taaki beech-raaste mein koi dikkat aa jaaye, toh aap ko turant madad mil jaaye. Aur yahan par baat khatam nahin hoti, MG ne ek aur thos kadam ye uthaya hai, ki 3 saal baad agar aap apni gaadi bechna chahte hain to MG aap se gaadi waapis le kar aap ke 60% paise jaroor lauta dega! Doston isse kehte hain khud ki gaadi pe poora bharosa hona!

3. Dual Clutch Gearbox
Aaj market mein sab-se sasti dual-clutch waali Compass 22 Lac rupay ki mil rahi hain, aur MG ne Hector ka dual-clutch model usse 4.5 Lac laakh rupay sasta rakha hain! 5 saal ki unlimited warranty dete waqt gaadi mein dual-clutch automatic dena bhi bade himmat ki baat hain. Volkswagen aur Ford jaise vikhyaat utpadak apni gaadiyon mein ek tikau dual-clutch nahin de paaye hain. Ford toh maidaan chod ke hi bhaag gaya aur apni gaadiyon se dual-clutch gearbox nikaal kar paarampaarik torque-convertor bitha diya! Volkswagen jaise bade khilaadiyon ko bhi apni dual-clutch gaadiyon ke gabbadi sudharte sudhaarte 6 saal beet chuke hain! Dual-clutch gearbox hote bade smooth, tez aur efficient hain, lekin wo gaadi ke sab-se jatil purja hote hain. Engine ka poora power aur torque unse ho kar gujarta hain aur gaadi ka poora wajan ye purja kheechta hai! Isliye saare utpadak uske tikaaupan ko le kar joonjh rahe hain. Pehli koshish mein toh vishwa ka ek bhi utpadak tikaau dual-clutch gearbox nahin bana paaya hai. Itna hi nahin, dual-clutch ke service aur maintenance ka khaas khyaal rakhna padta hain. Nirdharit samay aur running se pehle uski servicing aur oil change jaroori hai. Ab MG pehle din se uss par paanch saal ki warranty de-baitha hain, matlab waakai mein usko apne tikaupan aur service dono pe 100 pratishat vishwaas hain. Humein darr sirf iss baat ka hain, ke ye confidence kahin naye utpadak ka over-confidence na ho!

4. Andruni Jagah
Doston Hector sirf sasti gaadi nahin, balki aakar mein lagbhag Innova Crysta jitni badi gaadi hain! Uski lambai hain 15 feet 3 inch! Yane ke Innova Crysta se sirf 3 inch kam! Hector ki oonchai bhi 5 feet 9 inch hain. Yane ke Innova Crysta se sirf 1 inch kam. Aur Hector ki chaudai toh Innova Crysta se aadha inch jyada hain! Oopar se Hector ka engine innova se chota hain, aur wo bhi transverse mounted, Innova ki tarah Longitudonal nahin. Iska matlab Innova ke engine ke 4 cylinder ek-ke-peeche-ek hain aur Hector ke ek-ke-bagal-mein-doosra, uske bagal mein teesra ityadi. Iska  nateeja ye hota hain, ke Hector ka engine Innova Crysta se kaafi chote engine kaksh mein fit ho jata hain. Matlab yaatri kaksh ke liye jyada jagah bachti hain. Upar se Innova Crysta mein 2 aur aisi cheezein hain jo kaafi jagah leti hain. Pehla hain uska poora rear-wheel-drive transmission aur usse jude hue purje, jo front-wheel-drive Hector mein maujood nahin hain aur doosra hai Innova Crysta ki ladder-frame chassis, jiske cross-beams, body ke neeche ki jagah khaate hain. Lekin monocoque chassis waali Hector mein wo bhi maujood nahin hain. Kul milakar nateeja ye hain, ke Hector ka yaatri kaksh lagbhag Innova Crysta jitna bada hain. Ab sochiye ke Hyundai Creta, Jeep Compass aur yahan tak ke Harrier jaisi SUVs se kai guna behtar andruni jagah Hector mein kyon milti hain! Aur toh aur, Hector ka pichla seat bhi recline-adjustable hain - yane ke usko seedha ya tedha karne ki suvidha di hui hain, jisse uska seating comfort aur bhi sudhar jaata hain. Upar se usmein panoramic sunroof ka paryaay bhi uplabdh hain, jo iss 2-bhk gaadi ko 3-bhk-with-attached-terrace ka ehsaas dilata hain!

5. Features
In chaar mukhya faaydon ke alava Hector main kai saare chote-chote features maujood hain, jo regular istemaal mein aap ki suvidha badhate hain. Pehla hain MG ka laadla, “Internet Inside’ feature - yane ke MG ne Hector mein ek 5G-ready sim-card diya hain, jo aap ke mobile phone se pairing kiye bina maps, navigation, gaane aur kai saare apps chala sakta hain. Itna hi nahin aap khud ke mobile phone se gaadi ko lock-unlock aur yahan tak ke engine aur saath mein gaadi ka AC bhi on-off kar sakte hain, jo garmiyon mein bade kaam ki cheez hain, warna pehle do-chaar kilometre toh dhoop mein garam hui gaadi ke andar haath paon seikne mein chale jaate hain! Doosra mahatwapoorn feature hain Parking Sensors aur Camere. Sadhaaran gaadiyon mein aaj-kal sirf peeche ki taraf sensors aur ek camera hota hain, lekin Hector mein chaar camere aur age-peeche-dono-taraf sensors diye hue hain! Waise iss haathi jitni badi gaadi mein ye jaroori bhi hain. Lekin isse bhi badi-aur-mehengi gaadiyon mein aaj ye features bahut kam dekhne ko milte hain. Hector ki sasti keemat ke alava, ek aur pehelu aap ko iske Chinese gaadi hone ki baar-baar yaad dilayega, wo hai uska vishaal 10.5 inch ka touch-screen. Adhiktar logon ko ye pata nahin hota, lekin China mein aaj kal kayi saari 5 Lac rupay ki gaadiyon mein Tesla jitna bada touch-screen aa chuka hain aur yaad rakhiyega ki MG ki agli gaadiyon mein bhi aap ko isse bade-bade touch-screen milne waale hain! Rahi baat hybrid system ki toh wo ek aisa feature hain, jiske liye 70,000 rupay jyada dena uchit nirnay nahin hain. Kyonki regular istemaal mein hybrid-aur-non-hybrid mein aap ko mushkil se aadhe km.p.l. Mileage ka fark mileaga. Uske alava hum aap ko sirf ek chetawani dena chahenge ke, ke agar aap ne Hector hi khareedne ki thaan li hain, toh sirf 6-7 mahine apni bhawanaon pe kaboo kijiye. Uske grahakon ki pratikriyaon par nazar rakhein toh agle saal February-March mein apna nirnay lein. Ho sakta hain ke B.S.-six niyam laagoo hone se pehle MG aap ko acha-khaasa discount bhi de de!

Agar aapko kisi aur gaadi ki khoobiyan dekhne mein dilchaspi hain toh iss video ki ‘like’ karein taaki humein aap ki jarooraton ka pata chale. DHANYAWAAD!

Comments

CareOCar.com - Ultimate Tyre Resource

More from CarComparos