Mahindra Thar 700 Dosh Negatives महिंद्रा थार 700 दोष खामियां Problems Disadvantages


Aaj hum Thar ke ‘stock-clearance’ model, yane ke Thar Signature ki kuch kamiyan, kuch dosh, aur Mahindra ne ye gaadi banate waqt khoye hue kuch mahatwapoorn avsar, aap ke saamne pesh karenge. Waise toh Thar Signature ko badnaam karne ke irade se, humne ye video bilkul bhi nahin banaya hain. Uski khoobiyaan dikhane waala video bhi hum Youtube pe daal chuke hain, jiski link iss video ke neeche description mein uplabdh hain. Toh Thar Signature abhi khareedne mein sab-se mein aisi kaunsi jokhim hain? Jaldbaazi mein Thar Signature kheedne mein aap ka kya nuksaan ho sakta hain? Kya aap kaante hain ke satrah june ko launch hui ye gaadi kewal sade-teen mahine baad market mein bechna gair-kanooni hone waala hain? Ek October ke baad Mahindra Thar ka poori-tarah se naya model Mahindra ko le kar aana hi padga! Iske peeche kya kaaran hain? Aise kaunse raaz hain jo saare Youtubers jaanate hue bhi aap ko batane se darr rahe hain? Aaiye dekhte hain, CarComparos ke Thar Signature Dosh video mein...

1. Safety
Toh doston, kya aap ko pata hain, ke maujooda Thar, October ki ek tareekh se band kyon ho rahi hain? Iski wajah hain, ke humare desh mein pehli baar, B.N.V - sap naamak Crash test norms laagoo ho rahe hain aur maujooda Thar in mein pass hona namumkin hain. Sharam ki baat hain, ke satra-sau kilo wajan ke bawajood ye Thar Signature apne Crash Norms pass nahin kar paati, jo uske aadhe wajan waali gaadiyan asaani se pass karti hain. Gaadi ka wajan dekh kar uski safety ka anumaan lagane waale har bewakoof ko jaa ke samjhao doston, ke aath-sau kilo ki Ignis mein accident hone pe unki jaan bachne ki sambhavana Thar se kai guna jyada hain! Crash test mein pass ho paaye, isliye Mahindra ko Thar ke liye poori tarah se nayi chassis, naye body panels aur platform badalna pada. Toh doston humari aap se ye binati hain, ke apni jaan ko surakshit rakhne ke liye, kya aap teen mahine aur intezaar nahin kar sakte ye ek baar thande dimaag se soch lo.

2. Hard top
Doston Thar ki off-road kshamata ka bess-tees laakh rupay mehengi gaadiyon ke paas bhi koi tod nahin, lekin usmein kuch bahut hi moolabhoot suvidhaon ki kami ke wajah se grahakon ko dainindin istemaal mein kaafi dikkat jhelni padi hain. Unmein se sab-se badi dikkat rahi hain Thar ka soft-top - yane ke kapde ka chatt. Mana ke grahak local hard-top laga sakte hain, lekin uski fitting, vibration, paani ka leakage, warranty ke pange aur kai saari samasya aati hain, jiske liye Mahindra agli Thar mein khud se Hard-top dene waala hain. Kyonki Mahindra khud maanta hain, ke Soft-top se kitni dikkat hoti hain. Pehli dikkat ye, ke gaadi mein aap kuch bhi keemti samaan nahin rakh sakte, warna koi bhi gaadi ka tirpaan kaat kar andar ka samaan le sakta hain. Doosri dikkat ye hain, ke soft-top gaadi mein AC cooling utna kargar nahin rehta, jitni humein sadhaaran gaadiyon mein aadat lag chuki hain, kyonki uska kala kapda dher saari garmi sokh leta hain aur kahin na kahi chote-chote ched rehte hain, jisse thandi hawa bahar nikal jaati hain. Teesri dikkat hain ke canvas ka kapda, engine ki awaaz, tez raftaar pe hawa ki awaaz, Thar ke bhadde tryres se aanewaali awaaz aur baaki gaadiyon ki aur Trucks ki jordaar awaaz Thar ke andar bahut jyada sunai deti hain, jiski humein sadharan gaadiyon mein aadat nahin hoti.

3. Andruni jagah:
Thar ka aane-waala model, maujooda model se kaafi lamba-chauda hone waala hain. Thar Signature mein Mahindra ne front-facing middle seat toh daal di, lekin uski knee-room, leg-room aur shoulder-room kuch khaas nahin hain. Us par teen yaatri araam se nahin baith paate. Iske viparit, aanewaali Thar mein paanch yaatri phail ke baith payenge, kyonki uski andruni jagah Scoprio se milti-julti rahegi. Naye Thar ki Bootspace bhi aap ko maujooda Thar se achi-khaasi do-sau litre jyada milegi.

4. Interiors:
Mahindra kehta hain ke Thar ke peeche sattar saal ka itihaas juda hain, shayad isi liye uske interiors bhi utne hi pracheen lagte hain. Aj Thar ki hi keemat mein Verna aur Venue jaisi gaadiyaan ek alag hi darje ke interiors tak pahunch gayi hain, Magar Thar ke interiors toh paanch laakh ki Santro ke darje tak bhi nahin pahunche hain. Dashboard ka design, Plastics ki gunwatta, Upholstery ki quality aur Trims ki banawat mein aanewaali Thar aadhunik gaadiyon ke kareeb pahunch jayegi, jabki ye Thar Signature ka interior toh pandrah saal purnaani Swift aur i10 ke saamne bhi unse aur das saal puraana lagta hain! Jeep Wrangler, Land Rover Defender, Mercedes G-Wagen jaisi gaadiyon ke interiors ki nakal karne ki porri-ki-poori koshish Mahindra karega iss baat mein koi sandeh nahin!
X
5. Naya engine:
Khed ki baat hain doston, ke Mahindra ke paas kai saalon se m-Hawk engine jaisa heera uplabdh hone ke bawajood wah Thar mein uska pracheen dhai-litre engine deta raha. Lekin ab use apni galati ka ehsaas ho gaya hain. Nahi Thar mein wah m-Hawk se bhi naya, ek-sau-chaalis horsepower waala, do-hazaar-cc, B.S.-six engine dene waala hain. Iss naye engine ka pick-up aur usse bhi jyada uska smoothness, maujooda Thar ke gaye-gujare engine se kai guna behtar rahega, iss baat mein koi sandeh nahin! Lo ye ek aur wajah apni bhawanaon ko sade-teen mahine ke liye kaaboo mein rakhne ki aur Thar Signature khareedne ki galati se apne-aap ko bachaane ki!

6. Naye Features:
Signature Model ke ABS, do-airbags, Parking Sensors aur Seat-belt Reminder jaise tamaam naye features ke bawajood aaj Thar mein Alto VXi aur Kwid RXT-O se do-chaar features kam hi milte hain! Bara laakh ki gaadi ke liye ye bahutahi sahrmindgi ki baat hain. Mahindra ab ye samajh gaya hain, ke itne paise dene waale grahak ko ek laakh aur dena koi mushkil baat nahin hain, lekin Alto se kam-features waali gaadi khareedna, uske liye izzat ka sawaal ban gaya hain. Aanewaali Thar is samasya ko mita degi. Scorpio aur XUV ke liye Mahindra ne jo bhi features vikasit kiye hain unko wah aanewaali Thar mein thoosne ki poori-koshish karega. Aaj bara laakh mein Thar ka top-end model mil raha hain wohin kuch dino baad tera se le ke bees laakh tak chaar variants ki range ban jayegi! Touchscreen waali Infotainment System, Electric Mirrors, Climate Control, Driver Information System aur Steering Wheel Switches jaise kai saare upkarn agli Thar mein aa rahe hain.

7. Naya Chassis Suspension:
Toh doston jaisa aap ne ab tak dekha, Thar ka lagbhag har ek purja badal ke jyada aadhunik aur behtar hone waala hain. Iski wajah ye hain, ke maujooda Thar ka platform itna battar hain, ke usko thoda-bahut marham-patti kar-ke Crash Test mein pass karwana bilkul namumkin tha, ke Mahindra ko na chahte hue bhi usko poori tarah se badalna pada. Mana ke wah jyada-se-jyada TUV waala hi platform istemaal karne ki koshish karega, aur iska Thar ke pakad aur suspension comfort ko sab-se bada faayda milega. Aaj TUV aur Thar ke suspension comfort mein zameen aasmaan ka fark hain. TUV gaddhon aur speed breakers ko asaani se sokh leti hain, jabki Thar to khurdari sadkon par, apne yaatriyon ki haddi-pasli ek kar deti hain! Modhon par TUV, Thar se kai guna behtar niyantran darshati hain, jabki Thar toh bilkul bhi surakshit nahin lagti. Aisa lagta hain ke wah daaye-baaye dolte dolte kabhi-na-kabhi ludakh jayegi!

Toh doston ye the kaaran Thar Signature na khareedne ke. Agar aap ko anya kisi gaadi ke dosh, kamiyaan aur khoye hue avsar dikhaane waale videos dekhne mein dilchaspi hain, toh iss video ko ‘like’ karien, aur comments mein gaadi ka naam likhein. DHANYAWAAD!

Comments

CareOCar.com - Ultimate Tyre Resource

More from CarComparos