Swift vs Tiago Hindi Comparison Review New 2017 Maruti Tata

Maruti-Suzuki New Swift 2017 vs Tata Tiago:


Aaj hum aap ke liye le kar aaye hain Nayi Swift aur Tata Tiago ki vistrit tulana. Tiago ke top-end models khareedne waale har grahak ke mann mein, ek baar ye sawaal jarooor ayega, ke kya Tiago ka top-end model lene ke bajay Swift ka base-model khareedna behtar paryay toh nahin? Aise grahakon ki uljhan door karne ke liye pesh hain CarComparos ka nayi Swift vs Tata Tiago Comparison Video…

Toh doston aaj hum aapko ye batayenge ke dono gaadiyon ke samaan keemat waale models ke features mein kya fark hain, dono mein se kaunsi gaadi mein jyada andruni jagah aur comfort hain, kaunsi gaadi jyada tez hain, kiska mileage acha hain, kis gaadi ki pakad aur santulan behtar hain, ityadi…

Humare aane waale videos ka, aap ke mobile pe, turant notification paane ke liye, humare channel ko subscribe kar ke, iss bell icon pe click karna na bhoolein.

Mileage:
Tata Tiago ke manual athwa automatic petrol models ka ARAI mileage hain teiis dashamlav aath kilometre prati litre. Swift ke petrol-manual athwa automatic models ka mileage hain baiis kilometre prati litre. Lekin humare vishleshan ke dauraan Swift ka mileage Tiago se ded kilometre prati litre behtar paaya gaya. Salaana pandrah hazaar kilometre ke running ke hisaab se aap ko paanch saal mein Tiago ke petrol par Swift se lagbhag pachaas hazaar rupay jyada kharch karne padenge.

Tiago diesel-manual ka ARAI mileage hain sattais dashamlav teen kilometre prati litre, wohin Swift ke diesel-manual athwa automatic models ka ARAI mileage hain atthais dashamlav chaar kilometre prati litre.

Pick-up aur Smoothness:
Dono gaadiyon ke petrol models mein bara-sau cc ke petrol engines maujood hain. Swift mein tirasi horsepower aur ek-sau tera Nm torque maujood hain, jo Tiago se do bhp aur do Nm kam hain. Lekin Swift ka wajan Tiago se lagbhag ded-sau kilo halka hain! Iss wajah se Swift ka pick-up, Tiago se kaafi behtar hain. Smoothness ke maamle mein bhi Swift ka four-cylinder engine, Tiago ke three-cylinder engine se behat acha hain.

Dono gaadiyon mein AMT prakaar ka automatic gearbox maujood hain. Swift ka AMT Tiago se thodasa smooth hain aur thodasa jyada tezi se gear bhi badalta hain.

Tiago mein ek-hazaar pachaas cc ka diesel engine bhi uplabdh hain, lekin itni bhaari gaadi ke liye itna chota engine bahut hi kamjor pad jaata hain. Oopar se usmein turbo-lag ki samasya hain, jiske kaaran traffic mein chalate waqt usmei baar baar gear badalne padte hain, aur highway pe overtaking karte waqt bhi usmein paryapt pick-up uplabdh nahin hain. Uski tulana mein Swift ka diesel engine kaafi behtar hain. Uska pick-up aur smoothness dono Tiago diesel se acha hain.

Petrol:
Power (PS): Tiago – 85@6000, Swift – 83@6000
Torque (Nm): Tiago – 114@3500, Swift – 113@3500
Weight (kg): Tiago – 1024, Swift – 865
Power to weight: Tiago - 83, Swift - 96
Torque to weight: Tiago – 111, Swift – 131

Diesel:
Power (PS): Tiago - 70@4000, Swift - 75@4000
Torque (Nm): Tiago - 140@1800-3000, Swift - 190@2000
Kerb Weight (kg): Tiago - 1080, Swift - 965
Power-to-weight: Tiago - 65, Swift - 77
Torque-to-weight: Tiago - 130, Swift - 196

Andruni jagah aur Comfort:
Swift Tiago se thodisi lambi aur chaudi gaadi hain. Lekin dono gaadiyon ke andar lagbhag ek samaan andruni jagah uplabdh hain. Swift ke front seats Tiago se thodese bade hain. Unka comfort Tiago ke front seats se kaafi acha hain. Iske alava dono gaadiyon ki pichli seat par teen yaatriyon ke liye paryapt jagah uplabdh hain. Dono gaadiyon mein lagbhag dhai-sau litre boot-space maujood hain, Tiago mein do sau bayalees litre aur Swift mein do-sau adsath litre.

Tiago ke interiors ka texture aur design nayi Swift se bhi behtar hain, lekin tikaupan ke maamle mein Swift ke interiors Tiago se behtar saabit honge iss baat mein koi sandeh nahin.

Bootspace: Swift - 268, Tiago - 242

Length: Swift – 3840, Tiago – 3746
Width: Swift – 1735, Tiago – 1647
Height: Swift – 1530, Tiago – 1535

Pakad aur Suspension:
Adhiktar grahakon ke mann mein yah galatfehmi hoti hain ke gaadi ka santulan uske wajan par nirbhar hota hain. Lekin vaastav mein aisa nahin hain. Jis gaadi ka wheelbase - yaane ke agle aur pichle payyon ke beech ka antar jyada hota hain, jis gaadi ke tyres jyada chaude hote hain, wah gaadi halki ho kar bhi uska santulan behtar ho sakta hain.

Yahan par nayi Swift ka wheelbase Tiago se pachaas mm lamba hain aur payye bhi jyada chaude hain. Is liye uska wajan kam hone ke bawajood uska santulan Tiago ke baraabar hain.

Dono gaadiyan badi chusti aur phoorti se dishabadal karti hain, aur modhon par chalane ke liye kaafi mazedaar lagti hain.

Lekin gaddhon aur speed breakers ko Tiago, Swift se saaf saaf behtar sokh leti hain. Tiago ka suspension bharatiya engineers ne bharat ki sadkon ke liye bilkul sahi tune kiya hua hain. Khurdare raaston par Swift mein baithe yatriyon ko Tiago se jyada tez jhatke lagte hain.

Ground Clearance: Swift - 163 (unladen), Tiago – 170/165(unladen)

Wheelbase: Swift - 2450, Tiago – 2400

Tyre Size: Swift – 185/65R15 or 165/80R14 - 14, Tiago – 175/65R14 or 155/80R13

Quality aur maintenance:
Pichle tees saal mein Suzuki ne unki gaadiyan kitni tikau aur bharausemand hoti hain, ye saabit kar diya hain. Doosri ore, Tata ki gaadiyon mein pichle bees saal mein sudharna jaroor aayi hain, lekin aaj bhi wah apne antar-rashtriya pratiyogiyon se do kadam peeche hain. JD Power ke VDS aur IQS jaise quality sarvekshanon mein Tiago aaj bhi aakhri sthaan par aati hain. Tata ki gaadiyon ka paint finish, plastics ka texture, fabrics ye sab kaafi aakarshak ho gaya hain, lekin iska matlab ye nahin ke uski gaadiyan tikau ho gayi hain. Oopar se Tata ke service centres ki karigari aur vyawastha mein bhi kuch khaas sudharna nahin hui. Wohin Maruti ki service aaj bhi adhiktar prastispardiyon se behtar hain. Maruti ke teen hazaar se adhik service centres ka vistaar bhi Tata ki charsau dealerships se kaafi acha hain. Iska asar second hand market mein saaf saaf dikhai deta hain, jahan paanch-saat saal ke istemaal ke baad ye nayi Swift, aap ko samakaaleen Tiago se ded laakh rupay behtar keemat toh jaroor dilayegi.

Agar aap ko nayi Swift ya Tiago ki anya gaadiyon ke saath comparison video dekhne mein dilchaspi hain toh like karein. Humare naye videos ka notification paane ke liye ‘subscribe’ karein. Aur aapki pratikriya darj karne ke liye neeche diye gaye comments section ka upyog karein. DHANYAWAAD!

Related Carcomparos:


Comments

CareOCar.com - Ultimate Tyre Resource

More from CarComparos