New S-Cross 2017 vs Compass Comparison Review

Namashkaar doston! Carcomparos mein aapka swagat hain. Aj hum nayi Suzuki S-cross aur Jeep Compass ki tulana karenge. 



Toh kyon kar rahe hain hum yeh comparison? Waise toh Jeep Compass, S-cross se kaafi jyada mehengi gaadi hain. Lekin, top-end S-cross aur Compass ke base model ki keemat mein sirf chaar laakh rupay ka fark hain. Compass ke base model mein bhi kaafi saare features diye hue hain. Toh agar koi grahak tera laakh rupay de kar S-cross jaisi crossover-hatchback ka top model khareedne wale hain, toh thodese paise jyada de kar Compass jaisi umda SUV khareedne ka khyaal ek baar toh unke mann mein jaroor aata hain.

Lekin kya aise grahakon ko jyada paise de kar Compass khareedne waale grahakon ko wakai mein S-cross se jyada shaktishaali, majboot, tikau, kifayati aur comfortable gaadi milti hain?
Yeh janane ke liye padhte rahiye Compass versus S-cross CarComparo!

Keemat aur features:
Compass ke Sport-diesel model ki keemat hain satrah laakh tees hazaar rupay, aur Sport-diesel model ki keemat hain athara laakh tees hazaar rupay on road Dilli, S-cross ke top-end 'Alpha' model ki keemat hain tera laakh chaalis hazaar rupay, yane ke Compass Sport-petrol se lagbhag chaar laakh rupay kam, aur Compass Sport-diesel se lagbhag paanch laakh rupay kam.

Lekin S-cross 'Alpha' mein Compass 'Sport' se kai jyada features maujood hain jaise Automatic Climate Control, Parking Sensors, Parking Camera, Leather Upholstery, Projector Headlamps, Electrically Folding Mirrors, Android Auto aur Apple CarPlay, Push Button Start & Smart Key, Cruise Control, Fog Lamps, Automatic Rain Sensing Wipers, Automatic Light Sensing Headlamps, Auto Dimming Inside Mirror, Alloy Wheels, LED DRL aur Parcel Shelf.

Compass 'Sport' mein bhi teen aise features hain jo top-end S-cross mein uplabdh nahin hain, jo hain ESP yane ke Traction Control, Hill Hold aur Electric Parking Brake.

S-cross Alpha vs Compass Sport:
Common Features:
ABS, 2 Airbags, AC, Power Steering, Remote wala Central Locking, Power Windows, Infotainment with FM, USB, Aux, Bluetooth + 4 Speakers, Steering Wheel Switches, Touchscreen, Navigation, Height Adjustable Drivers Seat, Electrically Adjustable Mirrors, Rear Wash-Wipe-Defog, Telescopic Steering Adjustment, Auto-up Anti-pinch Drivers Window, ISOFIX Points.
Extra Features in S-cross Alpha:
Automatic Climate Control, Parking Sensors, Parking Camera, Leather Upholstery, LED Projector Headlamps, Automatic Headlamp Leveling, Electrically Folding Mirrors, Android Auto & Apple CarPlay, Push Button Start & Smart Key, Cruise Control, Fog Lamps, Automatic Rain Sensing Wipers, Automatic Light Sensing Headlamps, Auto Dimming Inside Mirror, Alloy Wheels, LED DRLs, Parcel Shelf
Extra Features in Compass Sport:
ESP (i.e. Traction Control), Hill Hold, Electric Parking Brake

Mileage:
Compass diesel four-by-two ka ARAI mileage hain satrah dashamlav ek kilometre prati litre, jo S-cross se nau kilometre prati litre kam hain! Lekin humare vishleshan ke dauraan S-cross ka mileage Compass diesel se paanch kilometre prati litre behtar paaya gaya!

Pick-up aur Smoothness:
Compass aur S-Cross ke pick-up mein zameen aasmaan ka fark hain! Compass mein do hazaar cc ka diesel engine diya gaya hain aur S-Cross mein sirf barasati pachaas cc ka. Compass mein ek-sau bahattar horsepower hain aur S-Cross mein sirf nabbe horsepower. Compass mein sade-teen sau Nm torque maujood hain, aur S-Cross mein sirf do sau Nm. S-Cross Compass se sirf do sau kilo halki hain. Iska nateeja ye hain, ke Compass ka pick-up S-Cross se kaafi acha hain. Low rpm par toh S-Cross ka pick-up bahut hi kamjor hain. Usmein do hazaar rpm ke neeche kaafi jyada turbo lag hain. Traffic mein gaadi chalate waqt usmein baar baar gear badalne padte hain. Iske viparit Compass mein bahut hi kam turbo lag hain, uska turbocharger S-Cross se kaafi jaldi sakriy ho jaata hain. Traffic mein chalane ke liye Compass S-Cross se kaafi asaan hain. Smoothness ke maamle mein dono gaadiyan kaafi badhiya hain.

Filhaal Compass petrol market mein uplabdh nahin hain, lekin kuch hi hafton mein wah market mein launch hone waali hain. Uska launch hote hi hum uska vistrut video reviews pesh karenge.

Power: S-Cross - 90@3750, Compass 172@3750
Torque: S-Cross - 200@1750, Compass 350@1750-2500
Kerb Weight: S-Cross - 1340, Compass - 1525
Power-to-weight: S-Cross - 67, Compass - 113 (69%)
Torque-to-weight: S-Cross - 149, Compass - 230 (54%)


Andruni Jagah aur comfort:
Jeep Compass, S-cross se kaafi badi gaadi lagti hain, lekin vaastav mein wah S-cross se sirf thodisi hi badi hain. Oopar se Compass mein, S-cross se bade engines aur four-wheel drive ke liye, bada engine-bay aur ooncha-floor diya hua hain, jiske kaaran, Compass ke andar S-cross bas thodisi jyada jagah uplabdh hain. Darasal dono gaadiyon mein paanch yaatriyon ke liye paryapt jagah aur unke samaan ke liye paryapt boot-space maujood hain. Dono gaadiyon ka seating bhi behat comfortable hain. Compass ke interiors S-cross se jyada aakarshak jaroor lagte hain, lekin tikaupan ke hisaab se S-cross ke inteiors Compass se jyada tikau aur majboot saabit honge, iss baat ka koi sandeh nahin, kyonki Suzuki ki gaadiyon ke interiors Fiat ki gaadiyon se behat jyada tikau saabit hue hain.

Bootspace: S-cross - 353 to 375, Compass - 410

Length: S-Cross 4300, Compass - 4398
Width: S-Cross - 1785, Compass - 1819
Height: S-Cross - 1595, Compass - 1667

Pakad aur Suspension:
Aapko ye jaan ke ascharya hoga ke Jeep Compass, asal mein Fiat ke Punto ploatform pe aadhaarit hain! Kaise? 2002 mein Fiat aur Opel ne mil SCCS platform vikasit kiya jispe aadhaarit pehli gaadi thi Fiat Punto, uske long wheelbase platform pe bani Linea. Usi platform ke wide-track four-by-four platform pe bani Fiat 500X aur phir Fiat aur Chrysler ka merger ho gaya. Phir usi wide-track four-by-four platform pe bani Jeep Renegade. Aur phir uske long-wheelbase platform pe bani ye Jeep Compass! Iska nateeja ye hua ke Compass, Punto aur Linea ki tarah, uske shreni ki sabse behtareen pakad aur niyantran waali gaadiyon mein se ek hain. Lekin S-cross bhi use kam nahin. S-cross ka wajan aur oonchai, dono Compass se kam hain. Is wajah se wah modhon pe Compass se thodisi behtar pakad banaye rakhti hai.
Dono gaadiyan gaddhon aur speed breakers ko behtareen roop se sokh leti hain aur tez raftaar pe bhi apna santulan banaye rakhti hain.

Wheelbase: S-Cross - 2600, Compass - 2636

Ground Clearance: S-Cross - 180, Compass - 178

Tyre Size: S-Cross 215/60R16, Compass - 225/60R17

Quality aur maintenance:
Jeep Compass American gaadi kam aur Italian gaadi jyada hain. Uska chassis, suspension, engine sab Fiat ne banaya hua hain. Fiat ki gaadiyon ka tikupan aur service kaisa hota hain, yeh to hum pichle bees saal se dekhte aa rahe hain. Fiat ki gaadiyon mein chote-bade bigaad aane ki sambhaavna Suzuki se kaafi jyada hoti hain, aur Compass ke pechida electronics ki wajah se usmein bigaad hone ki sambhavana aur bhi jyada hain. Iske viruddh, Suzuki ne pichle tees saal mein, unki gaadiyan kitni tikau aur bharausemand hoti hain, yah saabit kar diya hain. Maruti ke service ki karigari aur vyawastha hi nahin, balki uske service centres ka vistaar bhi Jeep se kaafi behtar hain. Maruti ke desh bhar mein teen hazaar se jyada service centres maujood hain, wohi Jeep ke filhaal sirf pachaas. Jeep ke service aur repairs ki keemat bhi S-cross se kaafi mehengi rahegi.

Antim Nirnay:
Agar aap aisi gaadi chahate hain, jo saalon saal bini kisi bigaad ke chalti rahe, jo acha mileage de aur jiski service aur maintenance pe jyada kharch na karna pade toh S-cross aap ke liye Compass se behtar vikalp hain. Comfort, smoothness, pakad aur niyantran ke maamle mein bhi wah Compass se kam nahin. Aur toh aur usmein kam paise mein dher saare features bhi mil jaate hain.
Lekin agar aap gaadiyon ke shaukeen hain. Lambi sair pe gaadi chalana pasand karte hain. Modhon aur ghoomaawdaar sadkon par gaadi chalane ka maza lete hain, toh S-cross ko bhool jaiye. S-Cross ke tera sau kilo ke wajan ke hisaab se uska barasau pachaas cc ka engine bahut hi kamjor pad jaata hain. Aane waale panch saat saal aisi underpowered gaadi istemaal karna ek car enthusiast ke liye bahut badi kurbani hogi. Compass ka behtareen steering, suspension aur brakes bhi aap ko bahut pasand ayenge. Oopar se Compass ke base model mein kai saare features maujood hain, jaise ABS, 2 Airbags, Traction Control, Hill Hold, Touchscreen Infotainment System with Navigation, Height Adjustable Drivers Seat, Electrically Adjustable Mirrors, Rear Wash-Wipe-Defogger ityaadi. Chaar-paanch laakh rupay jyada de kar, agar aap ko jindagi ke agle paanch-saat saal S-Cross se behat shrest gaadi chalane ka anand mil raha ho, toh kya wah jyada maulyawaan nahin? Humari nazron mein Compass iss tulana ki saaf saaf vijeta hain.

Comments

CareOCar.com - Ultimate Tyre Resource

More from CarComparos