Omni vs Alto 800 Comparison Review

Alto 800 vs Omni Comparison Review:


Toh kyon kar rahe hain hum ye tulana?
Mana ke Omni ek van hain aur Alto ek hatchback. Lekin aaj bhi kai saare grahak Maruti ki ye do sabse kifayati gaadiyon ki tulana karte hain. Toh aise grahakon ke liye kaunsi gaadi jyada aaraamdayak rahegi, kaunsi jyada majboot rahegi, kis gaadi ka mileage acha rahega, kiski keemat kam hain, kunsi jyada safe hain, kiska pick-up behtar hain, aise saare sawaalon ka jawaab paane ke liye dekhte rahiye CarComparos ka Alto vs Omni Comparison Video.

Humare aane waale videos ka, aap ke mobile pe, turant notification paane ke liye, humare channel ko subscribe kar ke, iss bell icon pe click karna na bhoolein.

Alto 800 vs Omni Comparison Video:


Keemat aur features:
Omni mein do model aate hain paanch-seater aur saat-seater. Dono ki keemat hain do laakh nabbe hazaar rupay, on road Dilli aur dono mein na Air-conditioning uplabdh nahin hain aur na hi Power Steering. Alto 800 ke non-AC, Standard model ki keemat hain do laakh sattar hazaar rupay, jo Omni se bees hazaar rupay sasti hain.
Alto ke Air-conditioning waale LX model ki keemat hain teen laakh rupay, jo Omni se sirf das hazaar rupay mehenga hain. Humari ray mein ab non-AC gaadi toh bilkul bhi khareedni nahin chahiye. AC sirf garmi mein kaam nahin aata, balki aap ko badhte hue pollution aur dhool se bhi bachata hain.

Agar aap apna budget tees hazaar se badha sakte ho, toh aap ko Alto ka Power Steering wala LXi model mil jayega, jiski keemat hain teen laakh tees hazaar rupay on road Dilli. Parking karte waqt aur traffic mein gaadi chelate waqt, power steering chalakon ke liye behat kaam ki cheez hain. Wah aapki steering ghumaane mein lagne waali taakat ko nabbe pratishat se kam kar deta hain.

AC aur Power Steering ke saath saath Alto LXi mein aap ko Front Power Windows, Body Coloured Bumpers, Wheel Covers aur Internally Adjustable Mirrors bhi mil jaate hain, jo Omni aur Alto ke nichle models mein nahin milte.

Alto 800 mein mein gas pe chalne waala 'LXi CNG' model bhi uplabdh hain, jiski keemat hain chaar laakh rupay on road Dilli. Agar aap ke ghar ke paas CNG pump uplabdh hain, toh Alto CNG kaafi acha paryay hain, lekin yaad rahe uske boot mein CNG cylinder ki wajah se, samaan rakhne ke liye bilkul bhi jagah nahin bachti.

Omni vs Alto LXi:
Common Features: none
Extra Features in Alto LXi: AC, Power Steering, Body Coloured Bumpers, Internally Adjustable Mirrors, Wheel Covers
Extra Features in Omni: none

Mileage:
Maruti Omni ka ARAI mileage hain sola dashamlav aath kilometre prati litre, Alto-petrol ka mileage hain chaubees dashamlav saat kilometre prati litre. Lekin humare vishleshan ke dauraan Alto 800 ka mileage Omni se sirf ded kilometre prati litre behtar paaya gaya.
Alto ke CNG model ka mileage hain taintees dashamlav chaar kilometer prati kilo.

Pick-up aur Smoothness:
Dono gaadiyon mein Suzuki ka aath-sau cc, three-cylinder petrol engine hain. Lekin dono gaadiyon mein uska tuning alag hain. Alto 800 mein adtaalis horsepower hain, lekin Omni mein sirf paintees. Torque ke maamle mein bhi Alto mein unhattar Nm torque maujood hain, magar Omni mein sirf unsath Nm. Itna hi nahin, Omni mein sirf four-speed gearbox maujood hain aur Alto mein five-speed. Aur toh aur, Omni Alto 800 se assi kilo bhaari bhi hain. Iss wajah se Omni ka pick-up Alto 800 se kaafi kamjor hain. Smoothness ke maamle mein bhi Alto 800 Omni se jyada shaant hain.

Power (PS): Alto 800 petrol - 48@6000, Omni - 35@5000, Alto 800 CNG - 41@6000
Torque (Nm): Alto 800 petrol - 69@3500, Omni  59@2500, Alto 800 CNG - 60@3500
Weight (kg): Alto 800 petrol - 720, Omni  800, Alto 800 CNG - 810

Power to weight: Alto 800 petrol  67, Omni  44, Alto 800 CNG - 51
Torque to weight: Alto 800 petrol  96, Omni  74, Alto 800 CNG - 74

Andruni jagah aur Comfort:
Jyada tar grahakon ke mann mein yah galatfehmi hoti hain, ke Omni Alto se se lambi gaadi hogi. Lekin asal mein Alto Omni se jyada lambi aur chaudi gaadi hain. Lekin Omni Alto se kaafi oonchi gaadi hain, aur iska engine front seats ke neeche sthit hain. Iss wajah se Omni mein yaatriyon ke liye Alto se kaafi jyada jagah uplabdh hain. Omni ke 5 seater model ke pichle seat ki leg-room, knee-room aur headroom Alto se behtar hain. Lekin Alto ke seats Omni se jyada  araamdayak hain.

Omni mein 7 seater vikalp bhi maujood hain, lekin uska jo middle seat hain wah rear-facing hain. Iske kaaran pichle seat pe baithe saare yaatriyon ko paryapt legroom nahin milti. Doosri samasya ye hain, ke adhik tar yaatriyon ko ulta baithne pe nausea ho jaata hain.

Alto mein sirf ek-sau-satattar litre ka boot space hain jo ki bahut hi chota hain. Omni ka boot usse thodasa bada hain. Lekin interiors ke maamle mein Omni Alto ki barabari nahin kar sakti. Omni ke interiors ab bahut hi purane aur cheap lagte hain. Alto ke seedhe-saade interiors bhi Omni ki tulana mein kaafi jyada modern aur aakarshak lagte hain.

Length: Alto 800 - 3430, Omni - 3370
Width: Alto 800  1490, Omni - 1410
Height: Alto 800  1475, Omni  1640

Pakad aur Suspension: 
Omni ka wheelbase yane ke aage aur peeche ke payyon ke beech ka antar, market ki anya kisi bhi gaadi se chota hain, aur uska track yane ke dae aur baye ke payyon ke beech ka antar bhi sabse kam hain. Iss wajah se Omni ka santulan, baki saari gaadiyon se kaafi kharaab hain. Aur toh aur uski oonchai bhi kaafi jyada hain aur uska CG yane ke centre of gravity kaafi oopar hain. Is liye usmein body roll - yane ke dae bae dolne ki pravritti kaafi jyaada hain. Modhon pe wah kaafi jaldi apna santulan kho deti hain aur phisal ne lagti hain. Body roll ki wajah se gaadi ludakne ki sambhavana bhi badh jaati hain. Kul milakar Omni market ki any kisi bhi gaadi se jyada asurakshit gaadi hain.

Iske viparit Alto ki oonchai kaafi kam hain. Is kiye uski pakad aur santulan Omni se kaafi behtar hain. Alto gaddhon ko bhi Omni se kaafi behtar sokh leti hain. Khurdari sadkon pe Omni mein chalakon ko kaafi tez jhatke sehne padte hain.

Crash safety ke maamle mein dono gaadiyan kaafi asurakshit hain, lekin phir bhi Alto ke mukable Omni kaafi jyada asurakshit hain, kyonki wah lagbag chalis saal purane platform pe aadhaarit hain, jab crash safety ke baare mein bilkul bhi jagrukta nahin thi.

Ground Clearance: Alto 800 - 160 (unladen), Omni  165 (unladen)
Wheelbase: Alto 800 - 2360, Omni - 1840
Tyre Size: Alto 800  145/80R13, Omni  145/80R12

Quality aur maintenance:
Pichle chaalis saal mein Suzuki ne ye saabit kiya hain ke unki halke se halki gaadiyan bhi saalon saal bina kisi bigaad ke, bina jyada maintenance ke chalti rehti hain. Iss wajah se aaj bhi ye dono gaadiyan har mahine che saat hazaar units bikti hain. Unke spare parts aur service ka kharch bhi bahut hi kam hota hain, aur Maruti ke teen hazaar service centres ki badaulat in gaadiyon ka service desh ke kone kone mein uplabdh hain.

Antim Nirnay:
Alto 800 Omni se kaafi shreshth gaadi hain. Andruni jagah chhod ke har ek pehelu mein Alto Omni se behtar hain. Phir chahe wah safety ho, pakad ho, mileage ho, pick-up ho, smoothness ho ya features. Dainandin istemaal ke liye AC aur Power Steering yah behat jaroori feature usmein uplabdh hain. Saat hazaar rupay de kar aap Alto mein driver airbag bhi le sakte hain. Rahi baat andruni jagah ki, to asal mein Omni mein sirf chaar yaatri hi aaraam se baith sakte hain, kyonki middle row mein baithe yaatriyon ke liye bilkul bhi leg-room nahin bachti, doosri baat unhe ulta baitna padta hain aur teesri baat unhe behat jyada jhatke lagte hain.

Toh doston iss baat mein koi sandeh nahin ke Alto 800 is comparison ki saaf saaf vijeta hain.

Agar aap ko Omni ya Alto ki anya gaadiyon ke saath comparison video dekhne mein dilchaspi hain toh like karein. Humare naye videos ka notification paane ke liye subscribe karein. Aur aapki pratikriya darj karne ke liye neeche diye gaye comments section ka upyog karein. DHANYAWAAD!

Comments

CareOCar.com - Ultimate Tyre Resource

More from CarComparos