Kwid vs WagonR Hindi Comparison Review

Maruti Suzuki Wagon R vs Renault Kwid Hindi Comparison:


Prastaavana: Aj hum WagonR aur Renault Kwid ki tulana karenge, aur aapko ye batayenge ki kaunsi gaadi jyada comfortable hain, kiska mileage acha hain, kisme jyada features hain, kis gaadi ki pakad aur santulan behtar hain, kausni gaadi jyada safe hain ityadi…

Kwid vs Wagon R Hindi Comparison Video:


Keemat aur features:
Kwid ke top-end, hazaar cc model, ‘RXT one-point-zero o.p.t.’ ki keemat hain chaar laakh tees hazaar rupay, jo WagonR ke base-model ‘LXi’ se bhi bees hazaar rupay sasti hain. Sasti hone ke bawajood Kwid 1.0 RXT Opt mein Driver Airbag, Central Locking Remote, Touchscreen Infotainment System, Navigation, Tachometer aur Fog Lamps jaise feature maujood hain, jo WagonR LXi mein uplabdh nahin hain.

WagonR ke ‘VXi’ model ki keemat hain chaar laakh pichattar hazaar rupay, jo Kwid ‘RXT one-point-zero o.p.t.’ se paintalees hazaar rupay mehengi hain. Dono gaadiyon mein do-teen aise feature hain, jo doosri gaadi mein maujood nahin hain. Jaise WagonR VXi mein Tilt Adjustable Steering, Electrically Adjustable Mirrors aur Rear Wash-Wipe-Defogger hain jo Kwid RXT Opt mein nahin hain, lekin Kwid RXT Opt mein Driver Airbag, Touchscreen Infotainment System, Navigation aur Tachometer maujood hain, jo WagonR VXi mein maujood nahin.

Dono gaadiyon mein automatic gear waale models bhi uplabdh hain. WagonR ke VXi AMT model ki keemat hain paanch laakh tees hazaar rupay, jo Kwid ‘one-point-zero RXT AMT’ se saath hazaar rupay mehengi hain.

Itna hi nahin Kwid mein RXL trim mein bhi AMT gearbox waala model uplabdh hain, jiski keemat hain sirf chaar laakh pandrah hazaar rupay on-road Dilli, jo WagonR ke manual geared base-model se bhi pandrah hazaar rupay sasta hain!

WagonR LXi vs Kwid 1.0 RXT Opt:
Common Features: AC, Power Steering, Front Power Windows, Central Locking by Key, Parcel Shelf, Front Power Socket, Wheel Covers

Extra Features in WagonR LXi: none

Extra Features in Kwid RXT Opt 1.0: Driver Airbags, Central Locking Remote, Touchscreen Infotainment System, Navigation, Tachometer, Fog Lamps

WagonR VXi vs Kwid 1.0 RXT Opt:
Common Features: AC, Power Steering, Front Power Socket, Power Windows, Central Locking by Remote, Music System with FM, USB & Aux, Fog Lamps

Extra Features in WagonR VXi: Tilt Steering, Electrically Adjustable Mirrors, Rear Wash-Wipe-Defogger

Extra Features in Kwid 1.0 RXT Opt: Driver Airbags, Touchscreen Infotainment System, Navigation aur Tachometer

Mileage:
WagonR petrol-manual ka ARAI mileage hain bees dashamlav paanch kilometre prati litre, jo Kwid ke 1-litre model se dhai kilometre prati litre kam hain aur Kwid eight-hundred cc model se sade-chaar kilometre prati litre kam hain.

Kwid ke petrol-automatic model ka mileage hain chaubees kilometre prati litre, jo WagonR petrol-automatic ka se sade-teen kilometer prati litre kam hain.

Humare vishleshan ke dauraan thousand cc Kwid ka mileage WagonR se bas aadha kilometre prati litre behtar paaya gaya, aur aathsau cc Kwid ka WagonR se ded kilometre prati litre behtar paaya gaya.

Pick-up aur Smoothness:
Kwid aur WagonR dono mein hazaar cc ka engine uplabdh hain. Dono engines ek samaan, adsath horsepower, aur lagbag naabe Nm torque dete hain. Lekin Kwid ka wajan WagonR se lagbag do-sau kilo halka hain! Iss wajah se uska pick-up WagonR se kaafi tez hain. Lekin smoothness e maamle mein Renault ka 1-litre engine WagonR ke K10 engine ke barabari nahin kar sakta.

Kwid mei aath-sau cc ka engine bhi uplabdh hain, jisme WagonR se chaudah horsepower aur athara Nm torque kam hain. Lekin WagonR se halki hone ke kaaran Kwid aathsau ka pick-up bhi WagonR ke barabar hain.

WagonR ko sau kilometre prati ghante ke raftaar pakadne mein padrah second lag jaate hain aur Kwid aathsau ko chaudah second. Wohin Kwid 1-litre ko bas bara second lagte hain.
Kwid ka AMT gearbox bhi WagonR ke AMT se jyaada smooh aur tez hain.

Petrol:
Power (PS): Kwid 1.0 – 68@5500, Kwid 0.8 – 54@5678, WagonR – 68@6000/6200
Torque (Nm): Kwid 1.0 – 91@4250, Kwid 0.8 – 72@4386, WagonR – 90@3500
Weight (kg): Kwid 1.0 - 699, Kwid 0.8 – 669, WagonR – 890

Power to weight: Kwid 1.0 – 97, Kwid 0.8 – 81, WagonR – 76

Torque to weight: Kwid 1.0 – 130, Kwid 0.8 – 108, WagonR – 101

Andruni jagah aur Comfort:
Kwid Wagon R se assi mm lambi aur pichasi mm chaudi gaadi hain. Iss wajah se uske andar WagonR se kaafi jyada jagah uplabdh hain. Kwid ki pichli seat pe jaroorat padne par teen yaatriyon ko kuch der bithaya jaa sakta hain, lekin WagonR ke pichle seat par do se jyaada yaatrion ko bithane ki koi goonjaish nahin hain. Kwid ka teen-sau litre ka boot bhi WagonR ke chote-se ek-sau assi litre boot se kaafi jyada samaan rakh sakta hain.
Bass interiors ke maamle mein WagonR ke plastics ki gunwatta Kwid se behtar lagti hain.

Safety:
WagonR Kwid se do-sau kilo bhaari jaroor hain, lekin Kwid jitni hi asurakshit gaadi hain. Sirf wajan jyaada hone se gaadi surakshit nahin ho jaati ye toh aap athrasau kilo ke Scorpio ka crash test video dekh kar samajh sakte hain. Global NCAP se abhi tak to Maruti ne WagonR ka Crash test karne se bachaya hain, lekin jis platform pew ah aadharit hain, uski doosri gaadi, yane ke Alto 800 crash test fail kar chuki hain. Kwid bhi Global NCAP ka crash test fail ho chuki hain aur wo bhi driver Airbag bithane ke bawajood!

Bootspace: Kwid - 300, WagonR - 180

Length: Kwid - 3679, WagonR – 3599/3636
Width: Kwid - 1579, WagonR – 1495/1475
Height: Kwid – 1478, WagonR – 1700/1670

Pakad aur Suspension:
Safety ke maamle mein dono gaadiyon mein kuch antar ho na ho, santulan ke maamle mein dono gaadiyon mein zameen aasmaan ka fark hain. Kwid ka wheel-base – yane kea age aur peeche ke payyon ke beech ka antar, WagonR se lamba hain. Kwid ka track-yane ke uske dae aur baye paayon ke beech ka antar bhi WagonR se jyada hain. Itna hi nahin, Kwid ka CG yane ke centre of gravity bhi WagonR se kaafi neeche hain. Iss wajah se tez raftaar pe Kwid WagonR se behat acha santulan banaye rakhti hain.

WagonR ki had se jyaada lambai ki wajah se usmein kaafi jyaada body-roll – yane ked ae bae dolne ki pravrutti maujood hain. Iss wajah se Wah modho pe bilkul bhi achi pakad aur niyantran nahin rakhti. Tez raftaar pe modh lene par wah phisalne lagti hain. Is samasya ko ghataane ke liye uska suspension kathin banaya gaya hain, jisse wah gaadhon aur speed breakers pe bahut jyada uchalti hain, aur andar baithe yaatriyon ko tez jhatke pohchati hain. Iske viparit Kwid gaddhon aur speed breakers ko achi tarah se sokh leti hain, aur uska ek-sau assi mm ground clearance use humare desh ki tooti-phooti sadkon ko laanghne ke liye jyada uchit bana deta hain.

Ground Clearance: Kwid – 180 (unladen), WagonR – 165 (unladen)

Wheelbase: Kwid – 2422, WagonR – 2400

Tyre Size: Kwid – 155/80R13, WagonR – 155/65R14 or 145/80R13

Quality aur maintenance:
Kwid lagbag saare pehelu mein WagonR se behtar hain, siwaye ek ke. Wo hain tikaupan aur service. Suzuki ki gaadiyan kitni bharausemand hoti hain ye to hum pichle tees saal se dekhte aa rahe hain. Lekin Renault ki gaadiyan tikaupan ke maamle mein theek-thaak hi rahi hain. Aaj bhi JD Power ke VDS aur IQS jaise quality sarvekshanon mein Kwid grahakon ne WagonR grahakon se dugne bigaadon kaa saamna kiya hain. Renault ke service centres ki karigari aur vyawastha bhi Maruti jitni achi nahin hain. Renault ke dhaisau service centres Maruti ke teen hazaar se adhik service centres ke vistaar ki barabari bhi nahin kar sakta. Lekin agar aap bade sheron mein rehte hain, to aap ko Renault ki service asani se mil sakti hain.

Antim Nirnay:
Takniki roop se Kwid WagonR se bahut hi umda gaadi hain. Uska pick-up, uska mileage, uski pakad uska comfort, sabhi WagonR se kaafi behtar hain.
Itna hi nahin, Kwid ka automatic-geared model bhi WagonR ke manual geared base model se sasta hain! Jyada paise de kar har roj ki clutch gear ragadne ki jhanjhat ka saamna karne mein koi samajhdaari nahin hain.
Value-for-money ke hisaab se Kwid, WagonR se meelon aage hain aur isi liye humare is pratiyogita ki saaf saaf vijeta hain.
Lekin kuch comparisons mein bas vijeta ghoshit karna samuchit nahin hota. Sach kahe toh, Kwid ki quality aur tikaupan abhi bhi poori tarah se pakka nahin hain. Humari aap se yah sifarish hain ke thode paise aur bacha kar Celerio khareedne ka vicar karein, usmein na WagonR ki pakad aur santulan ki samasya hain aur na Kwid ke tikaupan aur service ki.

Agar aap ko WagonR ya Kwid ki anya gaadiyon ke saath comparison video dekhne mein dilchaspi hain toh Youtube pe humare video ko like karein. Humare naye videos ka notification paane ke liye ‘subscribe’ karein. Aur aapki pratikriya darj karne ke liye neeche diye gaye comments section ka upyog karein. DHANYAWAAD!

Comments

CareOCar.com - Ultimate Tyre Resource

More from CarComparos